LEHEN ORRIALDEA

Euskal Iraultza Sozialistaren bidean...



Aupa denok! Ongi etorri!

Blog honen helburua Euskal Iraultza Sozialistaz gogoeta eta eztabaida egitea da.
Karl Marx militante komunista iraultzailearen esaldi maiteen bidean kokatzen gara:
"De omnibus dubitandum" : "Guztia zalantzan jarri"
"Nihil humanum a me alienum puto": "Humanoa den ezer, ez dut arrotzat jotzen".

Iritzi eta gogoeta guztiak, ados egon ala ez, ongi etorriak dira, adimen kolektiboa eztabaidatuz eraikitzen baita.
Baldintza bakarra: irainak eta zakarkeriak ez erabiltzea, eta eztabaida datuz eta dataz, arrazoiz zein argudioz egitea, jendetasunez eta adeitasunez.
Oroz gainetik, geure egiten dugu XVI. mendeko komunista iraultzaileen oihua:

OMNIA SUNT COMMUNIA!!!

2012/09/26

Lenin: Estatua eta Iraultza (6)



ESTATUA ETA IRAULTZA
(6)



ESTATUARI BURUZKO TEORIA MARXISTA
ETA PROLETARGOAREN EGINKIZUNAK IRAULTZAN

LENIN


Gaur, Greba Orokorra dugu Hego Euskal Herrian. Egun egokia Leninen gogoeta eta pentsamenduak argitaratzeko, eta aldi berean kalean borroka egiteko. Biak behar baitira, Teoria eta Praktika, bien sintesia baita Praxi Iraultzailea. Iraultza Sozialistaren bidea.

Eta gaur, irailaren 26 hau, Praxi Iraultzailearen egun paregabea da, kale eta karriketan milaka eta milaka langileak erakusten ari diren bezala. Leninek berak 1917an idatzi zuen gisan :“askoz atseginagoa eta probetxugarriagoa baita “Iraultzaren esperientzia” bizitzea horretaz idaztea baino”.

Beraz, goazen denok kalera! Denok borrokara! Gaur Euskal Herri Langileak Burgesia guztiei bere indarra eta erabakimena erakutsiko die. Euskal langileok geure klase kontzientzia eta geure borrokarako adorea erakusten ari gara gaur. Gaur Greba Orokorra, bihar Gudari Eguna, etzi eta etzidamu, egunero, Borroka Egunak. Gaurkoa hasiera bertzerik ez da, etorriko dira borroka handiagoak, gogorragoak, erabakigarriagoak... Biba zuek, neba-arrebak! Aurrera Euskal Langileria! Elkarrekin Kapitalismoa suntsituko dugu, Euskal Iraultza Sozialista eginen dugu, Euskal Errepublika Sozialista eraikiko dugu! Aurrera, atxik eta jo aitzina!


Baina gaur ere bada bertze gai garrantzitsua: behin eta berriz Euskal Herri Langileari saldu eta irentsarazi nahi zaion Estatu Burges Baskoaren kritika sistematikoa egitea. Eta horretarakoxe ari gara, hain zuzen ere, Leninen “Estatua eta Iraultza” atalka argitaratzen. Euskal militante iraultzaileei, eta bereziki komunista euskaldunei zein euskaldun komunistei ere arrazoi, argudio eta argibideak eman nahi dizkizuegu borroka teoriko-ideologikoan aritzeko. Zeren eta oraingo Ezker Abertzalearen ildo erreformista eta sozialdemokrataren ardatza, delako “Estatu librea Europan” baita. 


Egun hauetan EH Bilduko lehendakarigaia den Laura Mintegik behin eta berriz adierazi du beren helburua “Euskal Estatu libre bat Europan” sortzea dela. Astelehen honetan bertan erran zuen hori Gasteiz hotelean. Hitzez hitz, BERRIA egunkariaren arabera (azpimarrak gureak dira):



“Mintegi: "Itun zabala egiteko prest gaude, euskal estatu libre egiteko bada"
 
Edurne Begiristain (Gasteiz)  2012-09-24 - 21:15:09

Laura Mintegi EH Bilduko lehendakarigaia prest agertu da EAJrekin itun politikoa egiteko, baldin eta erabakitzeko ahalmena oinarri badu: "EH Bildu itun politiko bat egiteko prest dago,  baldin eta Herri honen aitortza eta erabakitzeko ahalmenean oinarritzen bada eta  euskal estatu libre baten aldeko hautua egiteko bada".  Elkarrizketaren eta akordioaren beharraz aritu da Mintegi, Gasteizen eskaini duen hitzaldian: «Burujabetzan sakondu nahi badugu, indarrak batzea ezinbestekoa dugu». Hala, EH Bilduren lehendakarigaiak esan du «akordio zabalak eta sendoak» behar direla  «euskal estatu librea» lortzeko.

Carlos Garaikoetxea lehendakari ohiarekin batera hitzaldia eskaini du Mintegik, gaur arratsaldean. Duela 26 urte EAren sorreraren lekuko izen zen hotel berbera aukeratu du EH Bildu koalizioak kanpainaurreko ekitaldi politikoa egiteko. EAren sorrera batzorde hartan onartu ziren printzipioak hizpide hartu ditu Garaikoetxeak, hau da, autodeterminazio eskubidea, sozialdemokrazia, giza eskubideen defentsa eta bide politiko eta demokratikoen erabilera. «Printzipio horiek ere badira egun EH Bilduren oinarriak, eta horregatik guztiz koherentea ikusten dut nire burua hemen».

Euskal Herria estatu propio bilakatzea eta gizarte «zuzenagoa» lortzea jada ez dela «ameskeria» esan du Garaikoetxeak. Mintegi ere baikor agertu da: «Gero eta gertuago ikusten dut aspaldi amesten genuen estatu independientea Europan, eta ziur naiz urtebete barru gobernu abertzalea izango dugula»

Eta atzo bertan ere, Bilbon, antzeko adierazpenak egin zituen, NAIZ INFOren arabera, beti ere: 

Mintegik dio bere ahaleginak «Europan estatu libre bat sortzearen aldekoak» izango direla

Laura Mintegi EH Bilduko lehendakarigaiak Bilbon egin dituen adierazpenen arabera, bere ahaleginak «Europan estatu libre bat sortzearen aldekoak» izango dira eta bide horretan elkarlanerako prest dagoela esan dio EAJri.



NAIZ.INFO|BILBO|25/09/2012|

Bilboko Alhondigan egin den Berbalagunean izan dira Laura Mintegi EH Bilduko lehendakarigaia, Maribi Ugarteburu eta Dani Maeztu zerrenda kideak, baita Iratxe Ibarra hizkuntza normalizazioaren ataleko arduraduna ere.

Bertan egin dituen adierazpenen arabera, bat dator Mintegi EAJrekin Euskal Herriaren egituran eta estatuaren eraikuntzan gehiago sakontzeko orduan, baina bere ahaleginak «Europan estatu libre bat sortzearen aldekoak» izango direla esan du.

Bestalde, Katalunian ematen ari den eztabaida «oso interesgarria» iruditzen zaio lehendakarigaiari. «EH Bilduk bere programan jasotzen du herritarrei galdetu egin behar zaiela independentziari buruz», aipatu du.

Independentziaren inguruko eztabaida Gasteizko Legebiltzarrera eramateko asmoa erakutsi du Mintegik.”

Ikusten dugunez, EH Bilduren helburua “Europan Euskal Estatu Libre” bat sortzea da. Irlandako historia pixka bat ezagutuz gero, hotzikara izanen dugu bizkarrezurrean barrena, zeren han ere erreformista eta likidazionista batzuk “Irish Free State” aldarrikatu baitzuten 1921-1922 urteetan. Ikusi duzue “Michael Collins” filma? Eta “The wind that shakes the barley”? (Frantsesez : “Le vent se lève” , Espainolez: “El viento que agita la cebada”).


Irlandako historia ezagutzen ez duten lagunendako, hurrengo egunetan artikulu sorta bat hasiko dugu gai honi buruz, euskaldunok jakin dezagun, zehazki, “Euskal Estatu Librea” aipatzen zaigularik zer saldu nahi diguten, eta zer inposatu zioten Irlandako Herri Langileari Irlandako burgesia zipaioak eta Britainiar Inperioak. 

Polemika eta eztabaida luze-korapilatsu hauetan, Leninen gogoetak biziki argigarriak dira.


ESTATUA ETA IRAULTZA
LENIN

II.- KAPITULUA
ESTATUA ETA IRAULTZA
1848tik 1851ra BITARTEKO URTEETAKO ESPERIENTZIA

1.- IRAULTZAREN  BEZPERAN


Marxismo helduaren lehen lanak, Filosofiaren Miseria eta Manifestu Komunista, hain zuzen ere, 1848ko Iraultzaren bezperakoak dira. Egoera honek, puntu bateraino, aipaturiko lanek Marxismoaren oinarri orokorren azalpenaz gain, garai hartako egoera iraultzaile konkretuaren isla bat edukitzea eragiten du; horregatik, beharbada, komenigarriagoa izanen da liburu hauen autoreek Estatuari buruz esaten zutena aztertzea, 1848-1851 urteetako esperientziatik atera zituztèn ondorioak aztertu baino lehenago.

“Bere garapenaren igarotzean -idazten du Marxek Filosofiaren Miserian- langile klaseak, klaseak eta hauen arteko antagonismoak baztertuko dituen elkarte batengatik ordezkatuko du sozietate zibil zaharra; eta ez da existituko jada botere politiko bat bere zentzu hertsian, botere politikoa baita, hain zuzen ere, klase arteko antagonismoen adierazgarri ofiziala sozietate zibilaren barnean (182. or. 1885eko argitalpen alemaniarrean).


Hezigarria da, Estatua klaseen abolizioaren ondoren desagertzen delako ideiaren azalpen orokor hau, Manifestu Komunistak duen azalpenarekin alderatzea; berau Marx eta Engelsek hilabete batzuk geroago, hots, 1847ko azaroan idatzia:

“... Proletalgoaren garapeneko fase orokorrenak zirriborratzean, egungo sozietatearen barnean gutxiago edo gehiago ezkutatzen den gerra zibilaren garapenaren ibilbidea jarraituko dugu, ageriko iraultza bilakatzen den unera arte, eta proletalgoak, burgesia bortiztasunaren bidez eraitsiz, bere agintea ezarri arte...

“ ...Gorago ikusi dugun bezala, langile iraultzarako lehen pausua proletalgoa klase agintari bezala zutitzea da, demokraziaren konkista.

Proletalgoa bere aginte politikoaz baliatuko da burgesiari gradualki bere kapital guztia erauzteko, ekoizpen instrumentu guztiak Estatuaren, hau da, klase dominatzaile bezala antolaturiko proletalgoaren eskuetan zentralizatzeko, eta ekoizpen indarren kopurua ahal bezain azkar handitzeko.” (31. eta 37. orr. 1906ko 7. argitalpen alemaniarrean)

 

Hemen Marxismoaren ideia aipagarrienetako eta garrantzitsuenetako bat aurkitzen dugu Estatuari dagokionean: proletalgoaren diktaduraren ideia (Marx eta Engels Parisko Commune eta gero izendatzen hasi ziren bezala) eta halaber Estatuaren definizio bat, izugarri interesgarria, hau ere Marxismoaren “ahaztutako hitzen” kontatzen dena: Estatua, hau da, klase dominatzaile bezala antolatutako proletalgoa”.

Estatuaren definizio hau ez da inoiz azaldu alderdi sozialdemokrata ofizialen propaganda eta agitazioko literatura nagusian. Bainan honetaz gain, bereziki ahazmenera ere eramana izan da, zeren erreformismoarekin puntu guztietan bateraezina baita eta ohiko aurreiritzi oportunistekin eta “demokraziaren garapen baketsuaren” inguruko ilusio filistearrekin belarrondoka aritzen baita.

Proletalgoak Estatua behar du, errepikatzen dute oportunista, sozial-chauvinista eta kautskiar guztiek, ziurtatuz hau dela Marxen doktrina eta “ahantziz”, lehenik eta behin, Marxen arabera, proletalgoak iraungitzen den Estatua bakarrik behar duela, hau da, halako moduan antolatua non berehala iraungitzen hasiko den eta ezin ahal izanen duen iraungi besterik egin; eta bigarrenik, langileek “Estatu” bat, “hau da, proletalgoa klase dominatzaile bezala antolatua” behar dutela.

Estatua indarraren erakunde berezi bat da, biolentziaren erakunde bat klase bat erreprimitzeko. Zein da proletalgoak erreprimitu behar duen klasea? Noski, soilik klase esplotatzailea, hau da, burgesia. Langileek Estatua zapaltzaileen erresistentzia zapaltzeko bakarrik behar dute, eta soilik proletalgoak zuzen dezake, soilik berak gauza dezake zapalkuntza hau. Proletalgoa da kontsekuenteki iraultzailea den klase bakarra, bera da burgesiaren aurkako borrokan, honen erabateko erauzketaren aldeko borrokan, langile eta zapaldu guztiak batzeko gai den klase bakarra.

Klase zapaltzaileek dominazio politikoa zapalkuntza mantentzeko behar dute, hau da, gutxiengo ziztrin baten interes berekoiak Herriaren gehiengo zabalaren aurka. Klase zapalduek dominazio politikoa zapalkuntza oro ezabatzeko behar dute, hau da, Herriaren gehiengo zabalaren interesetan esklabista modernoek osaturiko gutxiengo ziztrin baten aurka, hau da, lurjabe handien eta burgesiaren aurka.


Demokrata burges txikiek, klase arteko borroka klaseen adiskidetzearen ametsengatik ordezkatu duten sasisozialista hauek, eraldaketa sozialista ere modu ametsezko batean imajinatu dute, ez klase zapaltzailea eraistearen moduan, baizik eta gutxiengoa gehiengora baketsuki makurtzearen moduan, honek bere eginkizunaren kontzientzia hartuko duelakoan. Klaseen gainetik dagoen Estatu baten aitorpenari atxikirik doan utopia burges txiki honek, praktikan langileen klaseen interesak traizionatzera eraman izan du; adibidez, 1848ko eta 1871ko Frantziako Iraultzen historiak erakutsi duen bezala, eta ministerio burgesetako parte hartze “sozialistaren” esperientziak erakutsi duen bezala Ingalaterran, Frantzian eta beste herrialdeetan XIX. mende amaieran eta XX. mende hasieran.

Marx bere bizitza osoan zehar sozialismo burges txiki honen aurka borrokatu zen, gaur egun Alderdi Sozial-iraultzaileak eta Mentxebikeak Errusian berpiztu dutena. Marxek kontsekuenteki garatu zuen klase arteko borrokaren teoria, botere politikoaren, Estatuaren teoriarat iritsiz.

 

Burgesiaren agintearen eraisketa proletalgoak bakarrik gauza dezake, klase berezi bezala bere existentziako baldintza ekonomikoek eraiketarako prestatzen baitute eta hau egiteko aukerak eta indarrak ematen baitizkio. Burgesiak, nekazariak eta burges txikien geruza guztiak aldentzen eta sakabanatzen dituen bitartean, proletalgoa batu, antolatu eta kohesionatu egiten du. Soilik proletalgoa da -ekoizpen handian duen funtzioarengatik- langile eta esplotatu guztien buru izateko gai, nahiz askotan burgesiak ez dituen hauek, proletalgoa baino gutxiago esplotatzen, esklabutzen eta zapaltzen, gehiago baizik, bainan ez dira gai bere askapena lortzerako orduan bere kabuz borrokatzeko.

Klase arteko borrokaren teoriak, Marxengandik Estatuaren auziari eta Iraultza Sozialistari aplikaturik, nahitaez eramaten du proletalgoaren dominazio politikoa, bere diktadura aitortzera, hau da, inorekin tartekatzen ez den eta zuzenki masen indar armatuan oinarritzen den botere bat aitortzera. Burgesiaren eraisketa, proletalgoa klase dominatzaile bihurtuz bakarrik gauza daiteke, hau gai izanik burgesiaren erresistentzia ekidinezina eta etsia zapaltzeko eta erregimen ekonomiko berrian langileen eta esplotatuen masa guztiak antolatzeko.

Proletalgoak Estatuaren boterea behar du, indarraren erakunde zentralizatua, bortiztasunaren erakundea, bai esplotatzaileen erresistentzia zapaltzeko, baita ekonomia sozialista “martxan jartzeko” lanean, biztanleriaren masa ikaragarria, nekazariak, burgesia txikia, erdi-proletarioak gidatzeko ere.

Langile Alderdia heziz, marxismoak proletalgoaren abangoardia hezten du, boterea hartzeko eta Herri guztia Sozialismorat gidatzeko, erregimen berria zuzendu eta antolatzeko, langile eta esplotatu guztien maisu, buruzagi eta zuzendari izateko gai den abangoardia, bere bizitza soziala burgesiarik gabe eta burgesiaren aurka antolatzeko lanean. Aldiz, gaur egun nagusi den oportunismoak Langile Alderdian hobekien ordaindutako langile ordezkariak hezten ditu, masetatik banantzen direnak eta Kapitalismoan hala-hola “moldatzen” direnak, beren oinordekotza eskubidea dilista plater batengatik salduz, hau da, burgesiaren aurka Herriaren buruzagi iraultzaile izatearen eginkizuna ukatuz.


“Estatua, hau da, klase dominatzaile bezala antolaturiko proletalgoa” : Marxen teoria hau, proletalgoak historian duen eginkizun iraultzailearen inguruko bere doktrina guztiarekin lotura etenezinean dago. Eginkizun honen gailurra proletalgoaren diktadura da, proletalgoaren dominazio politikoa

Baina proletalgoak Estatua burgesiaren aurkako bortiztasunaren erakunde berezi bat bezala behar badu, hemendik bere kabuz ondorioztatzen da ea posible den horrelako erakunderik sortzea aurretik burgesiak beretzat sortutako estatu makinaria suntsitu gabe. Ondorio honetara eramaten du zuzenean Manifestu Komunistak, eta Marxek honetaz hitz egiten du 1848tik 1851ko Iraultzako esperientziaren azterketa egitean.




2012/09/25

Mintza gaitezen terrorismoaz ... (1)


KAPITALISMOA TERRORISMOA DA!!!

 


Batzuetan detaile batek Sistema osoaren funtzionamendu hiltzailea erakusten du, eta ez dira teoria eta diskurtso luzerik behar ongi ulertzeko Kapitalismoa sistema terrorista hutsa dela.

Irailaren 16an gertatu zen, igande batean, Herrialde Katalanetan, Picassent hirian, Valentzia ondoan.

Javier Defez Pla, 40 urteko langilea, anbulantzian hil zen, hiru aldiz Valentziako Ospitalean eman nahi zioten alta eta sendagiria errefusatu ondoren. Izan ere, Valentziako Ospitale Klinikoko Larrialdi Zerbitzuan hiru aldiz saiatu ziren bera etxera bidaltzen, erranez ez zuela deus ere. Langileak ez zuen etxera joan nahi, goizean joana baitzen Larrialdi Zerbitzurat bularreko mina eta arnasa hartzeko zailtasuna zuela erranez. 



Larrialdi Zerbitzuan bortizki anestesiatu zuten ansiolitiko batez, eta familiarekin batera ospitaletik fueratu zuten. Familiak berak eskatu zuen anbulantzia, etxerat itzuli ahal izateko, Javier Defez Pla ez baitzen bat ere ongi sentitzen,

Bere ama, Susi Pla, anbulantzian zihoan Javierrekin etxerako bidean, Valentziatik Picassentrerat.  Semea lotan zegoela uste zuen, bainan etxerat iristean, eta esnatzen ez zela konturatzean, hilda zegoela ohartu zen. Ondoan zuen senarra, Modest Defez, eta Javierren emaztea. Javierren alargun berria.

Irailaren 18an gurasoek salaketa bat aurkeztu zuten Valentziako Ospitale Klinikoaren aurka: ordu luzez itxarongelan aulki batean eserita egon zen Javier, inolako atentzio medikurik gabe, eta tentsio arteriala bakar-bakarrik hartu zioten. Medikuek erraten zuten antsietate-krisi bat zuela, eta lasaigarriak eman zizkioten.

Javierrek bere aitarekin lan egiten zuen zurgindegi metaliko batean. Anaia bat bazuen. Irailaren 19an ehortzi zuten Picassenten.

Zer erran? Zenbat kasu holako gertatzen ari dira egunero Herrialde Katalanetan, Euskal Herrian, Espainian, Frantzian, eta nonahi?

Sistemak erranen digu “istripu” bat izan dela, “negligentzia tragiko” bat, edota errudun eta arduradunak Ospitaleko mediku eta sendagileak direla. Baina guk badakigu zein diren zinezko errudunak, benetako hiltzaileak.

Murrizketak egitea Osasun Zerbitzuetan terrorismoa da, terrorismo kapitalista. Zenbat langile hilen dira aurten lan-istripuz? Eta zenbat langile hilen dira osasun zerbitzu txarrengatik? Eta bitartean, bankuak, espekulatzaileak, kapitalistak, multinazionalak, diruz gainezka, negozioak egiten munduko langile guztion bizkar…

Noiz ohartuko gara Burgesia gerran dela gure kontra, gure lanetik, gure odol, malko eta izerdietatik ahalik eta etekin handiena lortzeko? Noiz konturatuko gara klase-gerra dugula egunero, eta Burgesia dela klase-kontzientziarik zorrotzena duen talde soziala? Noiz jabetuko gara Burgesiaren Demokrazia gure kontrako Diktadura kapitalista dela, eta beraz, Langileon Demokrazia Burgesiaren kontrako Diktadura komunista izanen dela?


Bihar Greba Orokorra dugu Hego Euskal Herrian eta Grezian. Euskal Sute Iraultzailea ESI Taldeak eta Euskal Iraultza Sozialista blogak dei egin diegu euskal langile guztiei Kapitalismoaren aurka hotzez eta haginez borrokatzeko, eta alternatiba sozialista iraultzailea lehenbailehen eraikitzeko. Hori izanen da, gure ustez, Javier Defez Pla gure anaia eta langile xume honen oroimena ohoratzeko biderik hoberena.

Omenaldirik onena, garaipena!


JOTA KE
 KAPITALISMOA SUNTSITU ARTE!

GORA EUSKAL IRAULTZA SOZIALISTA!

GORA INTERNAZIONALISMO PROLETARIOA!



  

2012/09/24

Irailaren 26an: Euskal Iraultza Sozialista!


GREBA OROKORREZ HARATAGO ...

EUSKAL
IRAULTZA
SOZIALISTA!!!
 


Heldu den asteazkenean azken aldiko bosgarren Greba Orokorra eginen dugu. 2009ko maiatzaren 21ean egin genuen lehendabizikoa, krisiaren aurka. 2010eko ekainaren 29an bigarrena egin genuen, PSOEko Gobernuak inposatutako kontrarreformen kontra. 2011ko urtarrilaren 27an egin genuen hirugarrena, PSOEko politikero sozialdemokratek pentsioen aurka egindako kontrarreformen aurka borrokatzeko. Aurtengo martxoaren 29an laugarrena egin genuen, PPko Gobernu neofrankistak erabakitako neurri basatien kontra. Eta etzi eginen dugu bosgarrena. Orain arte urtean behin egin izan dugu Greba Orokorra, aurten bigarrena dugu, momentuz.


http://borrokagaraia.files.wordpress.com/2012/07/irailak26greba.jpg

Greba Orokor honetan Hego Euskal Herriko langileok ez gaude bakarrik: Grezian ere langileek greba orokorra eginen dute, PAME langileen fronteak deiturik, Kapitalismo Inperialistak aurrera daraman ofentsiba anker eta basatiaren aurka. Katalunian, Galizian eta Estatu Espainoleko nazio eta eskualdeetan ere, borroka eguna dute greba orokorraren alde, hango “sindikatu” nagusiak, UGT eta CCOO, Kapitalaren morroi hutsak baitira, patronalaren egitura parasindikalak. Langileria Kapitalaren kontrolpean mantentzeko egitura ustelak. 

Mundu osoan, langileok borrokan ari gara Kapitalaren Diktaduraren aurka, Merkatuen Tiraniaren kontra, nahiz eta gure klase kontzientzia eta praxi iraultzailea oraindik oso ahula izan. Horregatik estrategia eta aldarrikapen iraultzaileak egin behar ditugu, langileok jakin eta onar dezagun alternatiba bakarra dagoela Kapitalismoaren krisi globalaren aitzinean: Herri Langileek Iraultza Sozialistak egitea planeta osoan, Zibilizazio Komunistaren bidean!  

Euskal Sute Iraultzailea -ESI taldeak- , eta Euskal Iraultza Sozialista blogak deiadarra egin nahi dugu Greba Orokor hau gure indar guztiez bultzatzeko, Europar Batasuneko Kapitalismo Inperialistak oro har eta Espainiako Oligarkiak bereziki inposatu nahi dituen kontrarreforma guztien kontra hortzez eta haginez borroka egiteko eta Kapitalaren ofentsiba orokorraren aurka Euskal Herri Langilearen alternatiba sozialista iraultzailea eraikitzeko. 

Greba orokorrak ezin dira izan egun bateko kontua. Euskal langileon ofentsiba orokorra behar dugu, programa antikapitalista eta iraultzaile baten alde, Euskal Iraultza Sozialistaren bidean. Horregatik argi eta garbi diogu: irailaren 26an Greba Orokorra dugu Hego Euskal Herrian, eta irailaren 27an Gudari Eguna Euskal Herri osoan, eta irailaren 28an, 29an, 30ean, urriaren 1ean, 2an, 3an … BORROKA EGUNAK!!!

http://turrune.files.wordpress.com/2011/09/65881_1725932.png
 
Greba Orokorra borroka dinamika iraunkor baten hasiera izan behar da. Ezin gara defentsiban egon, behialako Ongizate Estatuaren lorpenak berreskuratu nahian. Kapitalismo Inperialistaren ofentsiba basatiaren aurrean, Iraultza Sozialista da bide bakarra. Kapitalaren logikak, bere metatze-beharrek agindu eta agintzen dute langileon eskubideen kontrako ofentsiba basati eta mugagabe hau. Eta Kapitalaren boterea hautsi gabe, ez dago eraso hauek gelditzerik. Kontrakoa dioena gezurretan ari da, Euskal Langileria engainatu eta anestesiatu nahian.

Horregatik, dei berezia egiten diegu euskal langileei sindikatu erreformisten leloak gainditzeko: “Euskal Herrian murrizketarik ez!”, “Zerbitzu publikoak garatu!”, “Por los derechos laborales y sociales”, “Madrildik inposatu nahi dizkiguten murrizketen kontra”  bezalako esloganak, berez, ez dira erabat kaltegarriak, estrategia iraultzaile eta antikapitalista baten bidean kokatzen diren heinean. Bainan horretara mugatzen bagara, desegokiak ditugu, ilusio faltsuak sortzen dituztelakotz. Kapitalaren eraso frontala gelditzeko bide bakarra dugu: Iraultza Sozialista!

Kapitalismoaren baitan ez dago langileontzako irtenbide onik. Inperialismo kapitalistak emanen digun bakarra, gerra, miseria eta zapalkuntza dira. Kasu! Inperialismo kapitalista esan dugu, eta ez PPko gobernua, PSOEkoa, UPNkoa edota PNVkoa. Alderdi horiek guztiak burgesak dira, eta Kapitalaren programa politiko eta ekonomikoa aplikatuko dute, Burgesiaren Diktaduraren alde baitaude. Formetan eta ñabarduretan desberdinak ematen dute, detailetan “diferente” izaten saiatzen dira, batzuk espainolistak dira, bertzeak baskoak, baina funtsean den-denek Burgesiaren Diktadura onartu eta defenditzen dute. Diktadura, langileendako; Demokrazia burgesendako, jakina.

Horregatik, lelo eta eslogan iraultzaileak ere oihukatu behar ditugu: “Kapitalismoa suntsitu!”, “Iraultza da bide bakarra!”, “Sozialismoa, irtenbidea!”, “Zuek kapitalistak, zarete terroristak!”, “Euskal Errepublika Sozialista!”, “Así, así, ni un paso atrás, contra el terrorismo del Gran Capital!”, eta bertze holako aunitz.  

Eta zer esan orain arte Amaiur, Bildu edota EH Bildu bezala agertu diren indar politiko horiei buruz? Kapitalaren logika eta diktaduraren aurka jotzen ez duten heinean, Iraultza Sozialistaren alde borrokatzen ez diren neurrian, Euskal Herri Langilea ilusio eta lilura erreformista eta instituzionalisten bidez lokartzen duten proportzioan, haiek ere Kapitalismo Inperialistaren baitan kokatzen ari dira, gero eta argiago egunetik egunera. Ez dute Kapitalismoa suntsitu nahi, bainan “ezkerretik” “bestelako” ekonomia eredua kudeatu; ez dute Euskal Errepublika Sozialista nahi, baizik eta “Euskal Estatu librea”, hau da, Estatu basko burgesa, Irlandan 1921ean bezala, “the Irish Free State”, honek ekarri zuèn guztiarekin; ez dute OTANetik, Eurotik eta Europar Batasun Inperialistatik irten nahi, bainan Europan “Estatu berri bat” sortu, Katalunia eta Eskoziako burges txikiekin batera, “Nazioarteko Komunitatearen” onespenarekin, hots, Inperialismo anglo-saxoi eta sionistaren balizko babesean, nolabaiteko Kosovo berriak; ez dute Euskal Iraultza Sozialista nahi, bainan “aldaketa sozial eta politikoa”, eta horrelako hamaika adibide. Euskal Langileria engainatu nahi dute beren diskurtso erreformista eta sozialdemokratarekin, gero PNVko burgesia baskoaren besoetara lasterka joateko, “batasun nazionalaren” izenean.

Horregatik, Euskal Sute Iraultzailea -ESI taldeak- , eta Euskal Iraultza Sozialista blogak bozka iraultzailea eskatzen dugu urriaren 21ean Euskal Herriko mendebaldeko hiru herrialdeetan eginen diren hauteskunde autonomiko espainoletan. Bozka iraultzailea, Euskal Errepublika Sozialistaren alde; bozka iraultzailea, Abiadura Handiko Trenaren aurka; bozka iraultzailea Kapitalismoaren kontra; bozka iraultzailea Euskal Herri Langilearen Iraultza Sozialistaren alde; bozka iraultzailea,  OTAN eta Inperialismoaren aurka; bozka iraultzailea, Amnistia Osoaren alde; bozka iraultzailea matxismo eta patriarkatuaren kontra; bozka iraultzailea Euskal Herri euskaldunaren alde, bozka iraultzailea gure amets, utopia eta helburu guztien alde!

Sozialismoa ala basakeria! 

Iraultza Sozialista ala Esklabutza Kapitalista!


GORA EUSKAL IRAULTZA SOZIALISTA!

IRAILAREN 26an, GREBA OROKORRA!

IRAILAREN 27an, GUDARI EGUNA!

IRAILAREN 28an, 29an, 30ean … BORROKA EGUNAK!

JOTAKE IRABAZI ARTE!!!