VENEZUELA: Iraultza bolivartarraren krisia (1)

Atal honetan Venezuelako Iraultza Bolivartarrari buruzko idazkiak argitaratuko ditugu, eta haien kritika.  Venezuelako Iraultza Bolivartarrarekin elkartasun kritikoa dugu, aldekoa erabat Inperialismoaren aurka borrokatzen den neurrian, kritikoa (era baikor eta eraikitzailean...) bere mugak, kontraesanak eta arriskuak seinalatzeko, iraultzaileon artean izan behar den kritika/autokritika dinamikaren ildotik.

Pasa den igandeko hauteskundeen emaitzak ikusita, agerikoa da Venezuelako Iraultza bidegurutze batera iritsia dela: Sistema politiko burgesaren baitan jokatzen segitu, hau da, parlamentarismo kapitalistaren muga estuen barnean, eta ondorioz, Gobernua galdu, laster ala berandu, ala haustura demokratiko eta iraultzailea Kapitalismo eta Inperialismoarekin, Burgesiari eskubide politikoak ukatuz, Herri Boterea eraikiz eta Proletalgoaren Diktadura ezarriz Venezuelan. Gure ustez, epe luzera ez dago bertze irtenbiderik, aurreko prozesu iraultzaile GUZTIEK argiro frogatu duten gisan. Baina monentuz, Langilegoaren  eta Burgesiaren indarrak parekatuta daude maila elektoralean, eta Venezuelako Oligarkiak 700.000 bozka gehiago bildu ditu Chavez hil ondoren, Capriles hautagaiaren bidez. Sistema parlamentario partidukratikoaren bidez ezin da haratago joan: Burgesiak laster Gobernua berreskuratuko du modu "demokratikoan", hau da, bere Diktaduraren tresna politiko, ekonomiko, instituzional eta ideologikoen bidez. Afera hurrengo urteetan trenkatuko da, klase borroka gogor baten ondorioz. 

Burgesia eta Kapitalismoa ezin dira garaitu beren tresna politiko eta ideologiko berberak erabiliz, tresna horiek kapitalisten botere eta hegemonia ekonomiko, politiko, kultural eta militarra bermatzeko diseinatuta daudelakotz. Burgesiaren zapalkuntzaren bizkarrezurra hausteko, Langileen Biltzarren Boterea behar da, Herri Boterea, Zapalduen Demokrazia Iraultzailea, hau da, eta hitz zahar eta argigarri batez errateko, PROLETALGOAREN DIKTADURA. Venezuelako Iraultza Bolivartarra bide horretan sartzen ez bada hurrengo urteetan, garaitua izanen da, eta erabat ezabatua, ondorio lazgarriak ekarriz Ameriketako Herri Langileendako lehendabizi, eta mundu honetako zapaldu guztiondako ondoren. Hauxe da gure hipotesia. Praxi iraultzaileak argituko du ea egia denentz...


AZKEN ORDUKO OHARRA: Venezuelako Oligarkiak Herri Langilearen kontrako terrorismoa erabiltzen ari da, hauteskundeetako emaitzak indargabetu nahian, gerra zibila pizteko eta balizko estatu kolpea eta eraso inperialista justifikatzeko. Euskal Herritik gure elkartasun osoa borrokan ari diren iraultzaile bolivartarrei: NO PASARÁN!!!!

Gure ustez, une egokia da Venezuelako Burgesia behin betikotz xehetzeko, eta Errepublika Sozialista eta Proletalgoaren Diktadura aldarrikatzeko!

AURRERA 

VENEZUELAKO IRAULTZA BOLIVARTARRA!!!

GORA

VENEZUELAKO

ERREPUBLIKA SOZIALISTA

ETA BOLIVARTARRA!!! 

 

 

Iraultza babesteko hamaika arrazoi

Venezuelak orain arte zerbait argi izan badu internazionalismoaren beharra da. Iraultza Bolivartarraren ezaugarri garrantzitsua da berau dudarik gabe, bere sorreratik gaurdaino.

Venezuela edo prozesu bolivartarraren lorpen eta aurrerapausoen inguruan, askotan aritu gara eta nonahi aurki daitezke iritzi, hausnarketa eta ondorio aski esanguratsuak, betiere prozesuari zilegitasuna emate bidean. Gaurkoan ordea, igandeko hauteskundeak eta Chavez komandantearen gertuko heriotza direla medio, Venezuelako prozesua zergatik babestu izan dugun eta babesten jarraitu behar genukeen azpimarratzea dagokigu, elkartasunaren arrazoiak eta zergatiak azaleratuz.

Hamaika urte dira Venezuelara brigadak antolatzen ditugula, bi Herrien arteko zubiak eraikitzen gabiltzala. Garrantzitsua da oso guretzat, Venezuela bolivartarra, Venezuela gorria, bertatik bertara ezagutu eta babestea. Hain zuzen, Dominazio Sistema, Sistema Kapitalista-Inperialista zalantzan jartzen duelako, bere jardunean, Inperioari aurre egiten ahalegintzen delako.

Honexegatik diogu, Venezuelarekiko elkartasunak maila estrategikoa duela, ez da unean uneko erabaki bati lotzen zaion irizpidea, ezta izaniko hanka sartze, barne kontraesan edo erritmoen gorabeheretara mugatzen; sozialismorantz eta utopiarantz bidelagun paregabea dugu berau.

Bigarrenik, Iraultza Bolivartarrak argi eta garbi erakusten digu Estatu bat izatea ez dela aski Herri baten subiranotasuna bermatzeko. Abya Yalan adibide paregabeak ditugu, bi mendetik gorako independentzia oraindik kakotx artean jarri beharrean gauden heinean... atzerriko interes ekonomiko, transnazionalen eta bertako Burgesia titereen mende dauden bitartean. Mendeak joan, mendeak etorri, Estatuak, Estatu izaten jarraitzen du, Herria ordea saldua aurkitzen da, ez du egiazko subiranotasunik, ez nazio askapen, ez askapen sozialik. Adibide ugari topatu ditzakegu Inperioaren periferian Abya Yalan bezala Afrikan edo Asian, hala nola, baita Inperioaren erdigunean bertan ere, egun EBren barnean esaterako, azken urteetako agintari zenbait Europar Bankuek ezarri dituztela kontuan hartuz.

 

Honegatik, Herri baten subiranotasuna, osotariko askatasuna izango bada Sozialismoaren bidetik izango da. Sozialismoak botere politiko, ekonomiko edo kulturala herritarren mesedetan eta Herriaren eskuetan egotea esan nahi du. Bitartean muga zenbait aldatu ditzakegu, banderei koloreak aldatu, baina Venezuelan egiten ari diren bezala Sozialismoaren bidea da benetako independentziarako bide bakarra.

Inork ez dezala uste, baina, Sozialismorako bide hau, askapen prozesu egiazkoa, traba edo eraso gabea izango denik. Honela, kanpoko nahiz bertako Burgesien interesak kontrajartzean, munstro eta makineria zital honi aurre egiteko beharrezkoa da Herri Boterea. Venezuelan sortzen ari diren bezala, auzo, lantegi, nekazaritza eremuetan, komunikabide, ikastetxe edo kaleetan antolakuntza bultzatuz, auto eraketa bermatu eta Herriari boterea emanez.

Herri Botere honen egitekoa bikoitza da, batetik, prozesua bera elikatu eta sortzen joan behar du, batzarretan parte hartuz, eztabaidatuz, formatuz, autokritika bideratuz. Bestetik ordea, erasoen aurrean edo desestabilizazio saiakeren aurrean prozesua bera defenditu behar du. Erasoei aurre egin eta hortzak erakutsi. Horregatik, bi egiteko horiengatik Herri Boterea beharrezkoa da ongi landua eta bideratua egotea,Venezuelan bezala gurean, prozesu iraultzailea ez dadin bere kasa gera, ez dezaten gera.

Azkenik, Venezuelak orain arte zerbait argi izan badu internazionalismoaren beharra da. Iraultza bolivartarraren ezaugarri garrantzitsua da berau dudarik gabe, bere sorreratik gaurdaino.

Horregatik sortu diren nazioarteko egitasmo askok eta askok Herrien arteko elkartasunean dute geltoki: ALBA, Kubarekiko harremanak, palestinarren aldeko egitasmoak. Jakitun dira Sozialismorako bidean, bidelagunak beharrezko dituela, kontrabotere honek mundu mailakoa behar duela izan izango bada. Internazionalismoaren bitartez, prozesua bera aberastu, babestu eta haziak ereinez, etorkizuna egun zapalduak gauden Herriona, Herri langileona, emakume eta gizonena izan dadin.

Julen Zulaika (Askapenako kidea)

2013ko apiriaren 13n GARA egunkarian argitaratua

B E R R I A

Analisia

 (Martxelo Otamendi): 

DOMINO ARRISKUA?

 

"Alderantzizkoa gerta ez dadin ardura dauka hurrengo sei urteetan Venezuelako Chavismoak, ez dadila Venezuela izan kontrako domino partida baten lehen fitxa".

Berria.info   2013-04-15 - 16:43:26

Joan den astelehenen, Bilbon Venezuelak daukan kontsuletxeak gonbidatuta, hauteskundeei buruzko mahai-inguru batean hartu nuen parte. Euforia handia ikusi nuen mahaikide eta entzuleen artean. Esan nien emaitza estuak izango zirela, Maduro ez delako Chavez, nahiz Chavezen heriotza gertatu berriak lagun ziezaioken Madurori. Estuak bai, baina ez horren estuak. Madurok botoen %50,66 lortu du, eta Caprilesek %49,07.

Lehenagotik ere gori gori zegoen Venezuelako politikaren labeari ikatza botako dio atzoko emaitza larriak. Oso polarizatuta dago politika Venezuelan, biziki hartzen dutelako herritarrek politika. Ahal izanez gero, chavistek krokodiloetara botako zuten Capriles, eta Caprilesen aldekoek Maduro pirañetara.

Nabarmena da Chavismoaren jaitsiera azken hiru hauteskunde presidentzialetan: %62 2006an, %55 iaz eta 50,66 atzo. Amildegiaren mugan geratu zen atzo Maduro, eta berarekin batera Venezuelako Chavismoa eta Ameriketako Herri askotakoa: Kuba, Nikaragua, Peru, Ekuador, Bolivia...

Nekea dago Venezuelan, neke handia, atzoko emaitzetan isladatu zena; eta hobe du, norabidea eta gauzak egiteko estiloa aldatu nahi badu, ez bilatzea Chavismoak errua nazioarteko konfabulazio batean. Barruari begiratu behar dio, klase ertainen nekeari, gobernuan hamalau urte egon eta gero segurtasunaren arazoa ez konpontzeari... etxeko kontuei begiratu behar die.

Venezuelan Chavezek, hasieran, eduki zuen arrakastak bultzatu zituen Ameriketako klase popularrak sinestera posiblea zela gobernua eskuratzea baldin eta kontzientzia hori hartzen zuten. Alderantzizkoa gerta ez dadin ardura dauka hurrengo sei urteetan Venezuelako Chavismoak, ez dadila Venezuela izan kontrako domino partida baten lehen fitxa.

Estatu kolpe giroa Venezuelan?

2013-04-16

Martin Vicioso

Nicolas Maduro garaipena ospatzen (Argazkia: rt.com)

Igandeko hauteskundetan Nicolas Madurok garaipena lortu ostean, giroa sutu egin da. Oposizioko buru Henrique Caprilesek botoen zenbaketa berria eskatu du, eta hura egin gabe Maduro presidente izendatzeak haserrarazi du oposizioa. Horren ondorioz, istiluak izan dira herrialde osoan eta presidente berriak salatu du estatu kolpea jotzeko giroa eratzen ari dela.

 

Botoen kontaketa eskatzeko “eltzejotzeak” egiteko deia egin du Caprilesek. Alabaina, istiluak izan dira. Kubako medikuen laguntza duten Diagnostiko Osorako Gune Medikuak (CDI gaztelaniaz) eta Venezuelako Alderdi Sozialista Batuaren (PSUV) egoitzak erre dituzte hainbat hiritan, besteak beste. Aporrea.org webguneak dioenez, 

Tachira, Miranda eta La Limonera hirietan Chavezen aldeko militanteak hil dituzte.
 

 

Eraso batzuk oposizioko hedabideek bultzatuak direla salatu du Aporreak. Esaterako, Nelson Bocaranda kazetariak bere twitter kontuan CDIetan hauteskunde kutxa ezkutatuak daudela publikatu eta, ondorioz, horiek erasotzen hasi dira.

Hedabideak ere oposizioaren xede izan dira. Telesur telebista kateko presidente Patricia Villegasek salatu du Caprilesen aldekoek Caracaseko egoitza inguratu eta langileak mehatxatu dituztela. VTV kateak ere erasoak jasan ditu.

Nicolas Madurok azpimarratu du oposizioa estatu kolpea prestatzen ari dela. Horregatik, “era baketsuan borrokatzeko” deia egin du.

Bestalde, Maduroren aldekoek adierazi dute legerik ez dutela hautsi. Izan ere, bozketaren aktak berrikusteko borondatea azaldu dute, eta hori dela legeak eskatzen duena eta ez Caprilesek eskatzen duen “botoz botoko” kontaketa.

BIRKONTAKETA, ZERGATIK?

                                                                      Hauteskundeak egin aurreko inkestek Maduro ematen zuten nabarmen garaile. Emaitza ofizialak, berriz, oso parekatuak izan ziren: %50,6 Madurok, %49,1 Caprilesek.

Andrea Coa kazetariak dio hauteskunde egunean momentuan atzeman ez zÈn birus informatiko batek erasotu zituela botoak jasotzen zituzten ordenagailuak. Bere ustez, “plana” gaizki atera izanak eraman du oposizioa emaitzen berrikusketa eskatzera. Aurreikuspenak ikusita, Coaren ustez, emaitzak “susmagarriak” izatekotan, ez dirudi Maduroren alde direnik.

Madurok legearekin

 erantzungo dio

 "indarkeria kolpistari"

Martin Vicioso

2013-04-17 

 

Oposizioak eragindako istiluak (Argazkia: El Pais)

Nicolas Madurok azaldu du ez duela jarrera “kolpistarik” onartuko, eta legearekin erantzungo diola. Hauteskundeak tarte txikiz irabazi ondoren, oposizioak bultzatutako istiluak gero eta gehiago dira Venezuelako kaleetan. Zazpi hildako eta 61 zauritu izan dira orain arte, gehienak ‘chavistak’.

“Indarkeriaren bidetik datorrenak, Estatuarekin egingo du topo”. Horrela erantzun die Madurok nahasmena eragiten ari direnei, eta azaldu du dagoeneko Errepublikako Fiskal Orokorrarekin hitz egin duela, neurriak har ditzan.

Oposizioak eta haren buru Henrique Caprilesek eragin dituzte istiluak, Maduroren arabera. Azpimarratu du AEBen laguntza izan duela kanpaina osoan, baita orain ere. Libian eta Sirian bezala, hainbat indarkeri gune (ospitaleak, Alderdi Sozialista Batuaren egoitzak, urbanizazio herritarrak…) sortu nahi dituztela salatu du presidente berriak, barne gatazka indartzeko.

2002ko apirilaren 11ko estatu kolpearen antzeko egoera bat erraztu nahi dutela nabarmendu du Madurok. Orduan ere, protesta eta istiluekin hasi zen oposizioa, nahasmena baliatuz Chavez kargutik kentzeko.

Oposizioko buru Henrique Caprilesek bertan behera utzi du Hauteskunde Batzorde Nazionalaren aurrean gaurko deitua zuen mobilizazioa. Indarkeria ez baliatzeko eskatu die bere jarraitzaileei. Hala ere, onartu du herritarrak euren kabuz protestarekin jarraitzeko aukera dagoela. Eltzejotze gehiago antolatu ditu hurrengo egunetarako.

AEBentzako mehatxua

Nazioarteak, orokorrean, Venezuelako presidentea onartu du. Salbuespena AEBak dira. Haien arabera, Caprilesen eskakizunak bete eta emaitzak berrikusi arte ez dute Maduroren zilegitasuna onartuko. AEBen ohiko aliatu Mexikok eta Kolonbiak, ordea, bestelako jarrera izan dute, presidente berria aitortuz.

AEBen oposizioaren arrazoia izan daiteke Venezuelaren orain arteko politika haientzako mehatxua izatea. Nazioarteko gaietan kazetari aditu Don DeBarrek Russian Today hedabideari azaldu dionez, “hegoaldea lotzen duen puntua da Venezuela”. Bultzatzen duten “ekonomia alternatibo eta askea” AEBentzako mehatxua da DeBarren ustez.

 


BERRIA 

2013-04-17

Venezuela. Presidentetzarako hauteskundeak

HUGO CHAVEZEN TESTAMENTUA

Caracasko 23 de enero auzoan, Mendiko kuartelean daukate Chavezen gorpua. Azken geltokian, hil aurretik idatzi zuen esaldi bat dago, eta oposizioak hauteskundeak galdu ostean hartu duen jarrera azaltzen du.

Amagoia Mujika Caracas

Berriemaile berezia

Ohorezko guardia, Hugo Chavez komandantearen hilobian, Caracasko Mendiko kuartelean. / AMAGOIA MUJIKA

Mendiko kuarteleko bisita gidatuan, azken geltokian, Hugo Chavezek iazko abenduaren 8an idatzitako esaldia dago, panel erraldoi batean: «Gaur Aberria daukagu, eta, edozer gertatuta ere, edozein egoeratan, Aberria izaten jarraituko dugu: batasuna, batasuna eta batasuna. Ez dira faltako testuinguru zailak baliatuko dituztenak, enpeinuari eutsiko diotenak, Kapitalismoa eta Neoliberalismoa berrezartzeko, Aberria amaitzeko asmoz. Egoera zail horiei aurre egiteko, berdin da zein den maila, denon erantzuna hau da: batasuna, borroka, bataila eta garaipena».

Bera hil ondoren gerta zitekeena aurreikusi zuen komandanteak, eta hain justu, orain, oposizioak egin dezakeen indar erakustaldiari erantzuteko pauta moduko bat da herritarrentzat. «Chavezek bere jakituriarekin gidatzen jarraituko gaitu». Muriela Marquez bisitariak komandantearen estanpa bat dauka esku artean, eta hatzekin laztantzen duen bitartean egin du bisita osoa.

Kuartela 23 de enero auzo mitikoaren gainean dago. Doako autobusak jartzen dituzte, bisita egin nahi duen ororentzat. 4 F handi bat dago kuartelaren atarian, Chavezek egun hartan egin baitzuen estatu-kolpe saioa, kuartelean. «Oraingoz» esan zuen lekua da lehen geltokia; iraultza berandu baino lehen etorriko zela jakinarazi zion orduan herriari, handik atera zutenean. Atea zeharkatu eta lau guardiak zaintzen dute Hugo Chavezen hilkutxa. «Urak inguratzen du, ura bizitza delako», dio gidariak. Hilkutxara heltzean, bisitariek ukitu egiten dute harri beltza, musukatu, eta negar egin.

Handik, kapera batera. Errezorako lekua, komandanteari eskeak egitekoa. Bi argazki handi daude aldarearen alde banatara. Jainkoa balitz bezala, «jende asko etortzen hasi da hona Chavezi eskeak egitera», azaldu du grabagailura gerturatuz Morena Jimenezek. Bisita erakusten duten bi soldaduetatik bat da Jimenez. Baina eskeek denbora mugatua dute, bisitarekin aurrera egin behar da.

Areto eguzkitsu batean jarri dituzte familiarekin eta lagunekin hartutako argazki batzuk, baita herriaren aurrean egindako mitin gogoangarrien irudiak ere. Han dago euripean eman zuen azken mitina. Gitarra jotzen, beisbolean jokatzen, umeekin barrez ikus daitezke Chavez; denak, sabaitik zintzilikatutako argazki handiak. Marquezek ezin dio negarrari eutsi. «Gizon ona zen bai, eskuzabala».

Ondoren, bere bizitza politiko eta militarraren pasarteak daude paretan: hastapenak, estatu kolpea, konstituzioaren zin egitea, eta hainbat hitzordu instituzional garrantzitsu. Nicolas Madurorekin argazki batzuk ageri dira, baina gehiago Diosdado Cabello Batzar Nazionaleko presidentearekin —botere militarra dauka—. Argazkien bildumaren amaieran, abenduaren 5ean Kubara hegazkina hartu zuenekoa ageri da, haren azken irudia. Musu ematen dio ikusleari. «Bazekien, bai, azkena izango zela», dio Marquezek.

Kuarteletik atera baino lehen, hilkutxaren ondotik igarotzen da berriz bisitaria. Guardia aldaketa dago, bi ordutik behin egiten dute. Beti egongo dira hura zaintzen guardiak. «Hil zenean presidente zenez, betebeharra dute hura babestea, bizitza arriskuan jarrita ere», azaldu du Jimenezek. Agurtzean, kopetara eskua eraman eta keinu militarra egiten dute askok. Bat, bi eta hiru, denak batera. «Chavez vive, la lucha sigue», oihuarekin amaitzen da bisita.

2013-04-17

Venezuela. Presidentetzarako hauteskundeak

NAHASMEN POZOITUA

 ETA ISTILU LARRIAK

 

Zazpi hildako eta 61 zauritu izan dira, gutxienez, bozak eta gero; gobernuak oposizioari leporatu dizkio.Egoera desegonkortzen saiatzen ari dira oposizioa eta AEBak, gobernuaren ustez.

Amagoia Mujika Caracas

Berriemaile berezia

Giroa itogarria da Caracasen. Zentroan, oraindik liskarrik izan ez den arren, segurtasun indarren presentziak ez dela ezer onik gertatzen irudikatzen dute. Ez daude ekintzarako ekipajearekin. Defentsarako baino ez, momentuz. Bart gauean zazpi hildako eta 61 zauritu izan zirela jakinarazi du Luisa Ortega Venezuelako fiskal nagusiak, baina gaua iristear dago.

Hiri honetan iluntasuna beti izaten da arriskutsua, legeak ezer gutxi egin dezakeen lurralde zaildua bilakatzen da. Egunotan gehiago, igandeko emaitzez gero Henrique Capriles oposizioko buruak bere jarraitzaileak protestara ateratzeko agindua eman ondoren. Kalea chavistena izan da orain arte, baina hemendik aurrera, eskuina indarberrituta, guda eremu gerta daiteke. Hildakoak oposizioko motorzaleei leporatu dizkie gobernuak.

Chavezekin ezin izan zutena egiten ari dira orain. Hauteskundeak ia 300.000 botoren alde estuarekin irabazi zituen Nicolas Madurok, eta irregulartasunak egon direla salatu du behin eta berriz oposizioak. Caprilesek igandean hauteskundeak ez zituztela onartuko esan zuen, eta herenegun eta atzo bina prentsaurreko eman ditu botoak ehuneko ehunean konta daitezela eskatzeko, eta iruzurra sala dezaten jendeari eta kalera atera dadila eskatzeko.

Maduroren ustez, gorrotoa mugiarazten ari dira oposizioko liderrak, Capriles bereziki, eta lasaitasunerako deia egin du. Estatu kolpe saiakeraz hitz egin du, ordea, eta jakinarazi du presidentea bota nahi badute hor izango dela: «Etor zaitezte nigana. Zenbat milioi aterako lirateke auzoetan kalera ateratzeko deia egingo banu? Zer gertatuko litzateke?». Madurok iradoki du muinoak —favela modukoak daude—, eta armada berekin dituela. «AEBek herria herriaren kontra jarri nahi dute». Baina ez dela hori gertatuko ziurtatu du. Kalean beharrezkoak direnak ez beste segurtasun indar guztiak kuarteletara joateko agindua eman du Madurok, eta armak erabiltzeko debekua ezarri du.

Sirian eta Libian egindako joko bera erabiltzen ari dira, presidentearen ustez, Venezuelako oposizioa eta AEBak. 

«Herria desegonkortzeko hainbat lekutan indarkeria fokuak zabaltzen ari dira». Horregatik, AEE Amerikako Estatuen Erakundean eta NBE Nazio Batuenean salaketak jarriko ditu hildakoengatik, oposizioari leporatuz. Erantzun beharko duela esan dio Madurok Caprilesi.

Oposizioak, berriz, indarkeria gobernuari leporatzen dio, eta hori egiten ez uzteko esan die herritarrei. «Maduro, ez zaituzte presidente aukeratu, eta alde egin behar duzu».Gaur, protestara

Gaua gorabehera, gaurko eguna ere ez da xamurra izango. Goizeko 10:00etan da hitzordua CNE Hauteskundeen Batzorde Nazionalaren aurrean. Botoen zenbaketa egin dezaten eskatzeko aitzakia hartuta, indar erakustaldia egingo dute oposiziokoek. Sutea pizteko gune arriskutsua. Gobernuak ez zuen baimenik eman protestarako, eta arratsaldean (gauerdia pasatxo Euskal Herrian) baimena lortzekotan ziren oposiziokoak, «Ez dugu arriskurik nahi, kalera atera nahi dugu dagokiguna eskatzera». Caprilesek esandakoak dira horiek, bere azken partean.

Bien bitartean, Nicolas Madurok presidente kargua etzi hartuko du, eta etorriko diren presidenteen izenak baieztatzen ari dira, asko eta asko. AEBei «ezustean» harrapatu die, Maduroren kargu hartzea ohikoa dena baino lehen egingo dutelako. Espainiak ez du errekonozitu; EBk, beti bezala, jokaera anbiguoa erakutsi du.

 

EUTSI GOGOR,  

VENEZUELAKO IRAULTZAILEAK!!!

BURGESIA ETA KAPITALISMOA

BIRRINDU BEHIN BETIKOTZ!!!

NO PASARÁN!!!

GORA IRAULTZA SOZIALISTA BOLIVARTARRA!!!

JO TA KE IRABAZI  ARTE!!!

IRAULTZA ALA HIL!!!