LEHEN ORRIALDEA

Euskal Iraultza Sozialistaren bidean...



Aupa denok! Ongi etorri!

Blog honen helburua Euskal Iraultza Sozialistaz gogoeta eta eztabaida egitea da.
Karl Marx militante komunista iraultzailearen esaldi maiteen bidean kokatzen gara:
"De omnibus dubitandum" : "Guztia zalantzan jarri"
"Nihil humanum a me alienum puto": "Humanoa den ezer, ez dut arrotzat jotzen".

Iritzi eta gogoeta guztiak, ados egon ala ez, ongi etorriak dira, adimen kolektiboa eztabaidatuz eraikitzen baita.
Baldintza bakarra: irainak eta zakarkeriak ez erabiltzea, eta eztabaida datuz eta dataz, arrazoiz zein argudioz egitea, jendetasunez eta adeitasunez.
Oroz gainetik, geure egiten dugu XVI. mendeko komunista iraultzaileen oihua:

OMNIA SUNT COMMUNIA!!!

2012/07/31

Eireko albisteak: blokeo informatiboa hausten (1)


THIOCFAIDH ÁR LÁ! (1)


“Hara, hogeita zazpi urte betetzera iritsia naiz, bada zerbait.
Ni hilen naiz, beharbada, baina 1916ko Errepublika ez da inoiz hilen.
 Aurrera, bada, Errepublika eta gure Herriaren askatasunerantz!”
Bobby Sands, 1981eko martxoaren 9an.

Azken egunetan, berri garrantzitsu aunitz iristen ari dira Irlandatik. Idazki honen helburua egoeraren azterketa kritikoa egitea da. Inkomunikabide inperialistek eta intoxikabide kapitalistek, hedabide erreformista, sozialdemokrata eta postmodernoen laguntza paregabeaz, Irlandako iraultzaile eta independentisten borrokari ezarri dioten blokeoa haustea da gaur egun Euskal Herriko iraultzaileok dugun betebehar internazionalistarik gorenetariko bat.

Hasteko, hemen duzue IRA Berriaren lehen agiria, jatorrizko bertsio ingelesean (ez dakigu Gaelikozko agiririk ote dagoen, eskuratzen badugu, bistan da, argitaratuko dugu ...). Ondoren Euskarazko itzulpena, jakina!



ÓGLAIGH NA H’ÉIREANN
IRA - ARMY COUNCIL

"Following extensive consultations, Irish republicans and a number of organisations involved in armed actions against the armed forces of the British crown have come together within a unified structure, under a single leadership, subservient to the constitution of the Irish Republican Army.

"The leadership of the Irish Republican Army remains committed to the full realisation of the ideals and principles enshrined in the Proclamation of 1916.



"In recent years the establishment of a free and independent Ireland has suffered setbacks due to the failure among the leadership of Irish nationalism and fractures within republicanism. The root cause of conflict in our country is the subversion of the nation's inalienable right to self-determination and this has yet to be addressed. Instead the Irish people have been sold a phoney peace, rubber-stamped by a token legislature in Stormont.

"Non-conformist republicans are being subjected to harassment, arrest and violence by the forces of the British crown; others have been interned on the direction of an English overlord. It is Britain, not the IRA, which has chosen provocation and conflict.



"The IRA's mandate for armed struggle derives from Britain's denial of the fundamental right of the Irish people to national self-determination and sovereignty – so long as Britain persists in its denial of national and democratic rights in Ireland the IRA will have to continue to assert those rights.

"The necessity of armed struggle in pursuit of Irish freedom can be avoided through the removal of the British military presence in our country, the dismantling of their armed militias and the declaration of an internationally observed timescale that details the dismantling of British political interference in our country.
"Signed Army Council … IRA."







AGIRIAREN EUSKARAZKO ITZULPENA

 “Kontsulta zabalak egin ondoren, errepublikano irlandar eta Koroa Britainiarraren indar armatuaren aurkako ekintza armatuetan parte hartzen duten zenbait erakunde egitura bateratu batean elkartu dira, zuzendaritza bakar baten menpe, Irlandako Armada Errepublikarraren Konstituzioari subordinatua.

Irlandako Armada Errepublikarraren buruzagitzak 1916ko Aldarrikapenean kontsakratu zirèn ideal eta printzipioen erabateko betetzearekin engaiatua segitzen du. 

Azken urteetan Irlanda aske eta independentearen eraikuntzak atzerapausoak jasan ditu, abertzaletasun irlandarraren lidergo faltarengatik, eta mugimendu errepublikarraren hausturengatik. Gure herrialdean dagoen gatazkaren erroa, Nazioaren autodeterminaziorako eskubide besterenezinaren subertsioa da, eta hau ez da oraindik konpondu. Aitzitik, irlandarrak bake faltsu baten truke  salduak izan dira, Stormont-en kokatzen den Legebiltzar sinboliko batek berretsia.

Egoera honekin ados ez dauden errepublikarrak jazarriak izaten ari dira, atxilotuak eta Koroa Britainiarraren bortizkeria jasaten dute, eta beste batzuk presondegiratuak izan dira jauntxo feudal ingeles baten aginduz. Britainia Handia da, eta ez IRA, probokazio eta gatazkaren aldeko apustua egin duena.

IRAk borroka armatua egiteko duen betebeharra, Britainia Handiak egiten duen ukaziotik eratortzen da,  Irlandako Herriak duen autodeterminazio nazional eta burujabetzarako oinarrizko eskubidearen ukaziotik hain zuzen ere. Britainia Handia Irlandaren eskubide nazional eta demokratikoen ukazioan tematzen den bitartean, IRAk borrokan segituko du eskubide horien defentsan.

Irlandaren askatasunaren aldeko borroka armatuaren beharra saihesten ahal da gure herrialdean dagoen presentzia militar britainiarra eliminatuz, bere milizia armatuak eraitsiz eta gure herrialdean, interferentzia politiko britainiarra amaitzeko, nazioarteko begiraleek egin beharreko ikuskaritzako egutegiaren adierazpena eginez.

Sinadura  :  IRAko Kontseilu Militarra.


Antza denez, antolakunde batzuk elkartu dira IRA berria osatzeko: RIRA (Real IRA), Republican Action Againts Drugs, (RAAD), eta bertze talde independente ttikiago batzuk. Momentuz, eta guk dakigula, bi erakunde armatu gelditu dira batasun honetatik kanpo: CIRA (Continuity IRA) eta ONH (Óglaigh Na H’Éireann). Bainan hau guztia kontuz hartu behar da, Irlandan  egoera nahasia delakotz, bereziki Sei konderri okupatuetan.. 

IRA Berriak indarra omen du Belfast eta Derryn, Lurgan eta Tyronen, eta Down konderriko hegoaldean. Baina bere indar armatu eta militarra eta bere babes zein sostengu politiko eta herritarra ikuskizun daude oraindik.


Northern Ireland News 

Newly-merged dissident republican groups in terrorism vow 

By David McKittrick Friday, 27 July 2012


File picture of dissident republicans

Belfast Telegraph egunkarian, uztailaren 30ean, Suzanne Breen kazetariak IRA Berriko arduradun baten adierazpenak argitaratu ditu: “Gu elkartzean, mugimendu errepublikarrari alternatiba sinesgarriagoa eskaintzen ahal diogu”. ”Oinarri honen gainean eraikiko dugu erakunde berria, menderakuntza britainiarrari eta Irlandan egiten duen zapalkuntzari indartsuago aurre egiteko. Iraganean hainbeste erakunde errepublikarren existentziak gure aurkarien mesedetan jokatu du, zeinak gure zatiketez profitatzen ahal ziren, eta taldexka gisa kontsideratzen ahal gintuzten. Bainan hori fini da. Gure batasuna gure indarra da.”


Northern Ireland News 

'New IRA' ... publicity stunt or real cause for concern? 

Politicians slam plan to merge dissident groups

By Suzanne Breen
Monday, 30 July 2012

File pictures of republican  dissident group, the Real IRA  at a 'training camp' in the border counties of Northern Ireland taken in January 2008 

Bozeramale honen arabera, IRA Berriaren helburu militarrak PSNIko poliziak (Irlandako zipaioak) eta soldadu britainiarrak izanen bide dira, eta onartu omen du  oraingo erakunde armatuak ezin izanen duela kanpaina iraunkor bat mantendu, lehen IRA probisonalak (PIRA) egiten zuen bezala. “Garai horiek amaitu dira. Bere existentzia beraren bidez, borroka armatua gezurtatu egiten ditu gatazka bukatu eta dena bide onean dela esaten dutenen pretentsioak. Honek frogatzen du hemen badela jendea menderakuntza britainiarrari aurre egiteko prest dagoena.

Talde bakoitzak bere indarrak jarri ditu batasuna egiteko: RIRAk (Benetako IRA) kide eta militante franko ditu 26 konderrietan, gazteak batez ere, eta hobekien armaturik dagoen erakundea da. Errepublikar independenteen taldekoak PIRAko militante zaharrak dira, esperientzia handikoak, behin baino gehiagotan frogatu duten bezala.

Irlandan, eta bereziki Estatu britainiarrak okupatutako Sei Konderrietan, gauzak mugitzen hasi dira sakonki. Preso politiko errepublikarrak ere borrokan dira espetxeetan, zikinkeria greba egiten 80. hamarkadan bezala, Honetaz hurrengo artikuluan mintzatuko gara.




Poesia gorria (1)

MANEX ERDOZAINTZI-ETXART :
EUSKAL HERRI LANGILEAREN POETA 

Manex Erdozaintzi-Etxart Behe Nafarroako Ibarla herrian sortu zen 1934ko uztailaren 15ean, laborarien familia langile batean. Zortzi haurretarik seigarrena zen eta bederatzi urterekin Donapaleuko frantziskotarren eskolan sartu zen. Geroztik bere ibilbidea erlijio-ordena horrekin loturik dago. Filosofia, Psikologia eta Teologia ikasketak egin zituen Estatu Frantsesean gaindi: Gaskoinian eta Okzitanian (Briven, Paben, Tolosan eta Biterrin -Béziers Frantsesez-), Bretainian (Kemperren) eta Frantzian (Parisen eta Orsaiyn). Bere pastoralgintza-lanetan, Estatu Batuetara eta Irlandara joan izan zen batzuetan.
Euskal Herri Langilearen zerbitzuan aritu zèn anaidi frantziskotar bat sortu zuen Domintxinen: "Anaitasuna", eta Askapen Teologiaren bidean buru-belarri aritu ziren bertako lagunak: errefuxiatuen aldeko manifestazio eta gose grebak, "Fededunak" taldearen sorrera, "Fedegintza" aldizkaria, AEKn irakasle, Ipar eta Hegoaldeko kristau iraultzaileen topaketak, langile eta laborarien sindikalismoa, artikuluak euskal aldizkari gehienetan: "Herria", "Elgar", "Jakin", "Gure Herria", "Frères du monde", "Anaitasuna", poesia eta literatura, "Herriarekin" apez taldea, "Herriz-Herri" aldizkaria, pastoralgintza lanak Ipar Euskal Herriko herri gehienetan, Etxarriko laborari eskolan irakasle, Seaskan laguntzaile, Askagintzaren Teologiaren aldeko idazki eta gogoeak, Amnesty International-eko partaide, HBren aldeko botoa eskatu zuen 1984an, eta euskaldunon "gaueko lanetan" mila zereginetan aritu izan zen, Euskara Ta Askatasunaren alde...vHerriak bizi behar duelakotz!
Akitaniako frantziskotarren idazkari eta buruzagia izan zen. Euskaltzain urgazlea ere bai. Joseba Arregi ETAko militantearen lagun eta adiskidea, "gaueko lanetan" elkar ezagutu zutelakotz. Sozialista iraultzailetzat jotzen zuen bere burua.
1984ko apirilaren 29an hil zen Okzitaniako Tolosan. Bere hileta Donapaulen egin zuten, maiatzaren 1ean, Langileriaren egunean, hain xuxen.
"Hinki-hanka" poesia liburua idatzi zuen 1978an, "Gauaren atzekaldean" nobela 1982an, eta zendu ondoren, "Herri honen erraietan/Bizitza pilpirak/Nafarroari poema irekia" poema bilduma argitaratu zioten 1994an.  

Bere poema eder bat ekarri dugu orriotara: 


ASKATASUNAREN AMETS ZOHARDIA


I
Hodei beltzak
Hodei beltzak
Jautsi dira
Mendi kaskoetatik behera ... 
Euskadiko bide zaharretan
Askatasuna
Izitua galdu da ...

ZER EGIN ZUEN APARTEKORIK GURE HERRIAK?

Euri eta zitzer erauntsiak
Hodei beltz harmatuak
Lehertu dira
Hirietako karriketan ...
Euskadiko plaza inguruetan
Askatasuna 
Funditua itzali da ...

NONGO MADARIKAZIOAK JO ZUEN GURE HERRIA?

Hodei marrumak
Hodei garrasiak
Daderabiltza
Itsas hertzetik zelai barruraino ...
Euskadiko leize ziloetan
Askatasuna
Ezindua amildu da ...

NORK ZUEN ERABAKI GURE HERRIA SUNTSITZEA?



II


Euria eta zitzerra
Ez baitziren atertzen
Hodei harmatuak
Eta hodei marrumak
Ez baitziren jabaltzen
Madarikazioak ez baitziren ixiltzen ...
Askatasuna
Berebaitaratu zen eta 
Oroitzen hasi zen ...

  
Txabi, Poeta, Iharra,
Mikelon eta Txikia eta Txapela
Eta Euskadiko xenderetan hil dizkiguten 
Iraultzaileen zerrenda luzea
Nere haurrak ziren
Maliziarik gabeko
Nere semeak ziren ...
 
Eta Txiki eta Gotzon Otaegi  eta Jesus Maria Zabala
Hedailo errautsean odol hustuak utziak
Nere semeak ziren
Beren aita-amak eta beren haurrideak
Beren hauzokoak eta beren herrikoak
Nere haurrak diren bezala ...
Beren aita-amak eta beren haurrideak
Beren hauzokoak eta beren herrikoak
Esplotatuz eta zapalduz eta umiliatuz
Hiltzen dituzten bezala, egunero, beren legearen izenean
Hil dizkidate beren justiziaren izenean!

ZERTAZ HOBENDUN ZEN GURE HERRIA?

Askatasuna
Oroitzen ari zen oraino eta
Kezkatzen hasi zen ...
Bat, biga, hirur eta ... ehun
Berrehun-eta-berrogoita bost
Besteak beste ...
Espainiako presondegietan sakatuak
Nere haurretarik dira
Eta min dut bihotzean
Eta sofritzen dut hezurretan ...
Maite zuten primaderako loreen usaina
Arrats apalean maite zuten iguzkiaren pereka
Itsas bareab eta mendi kaskoetan ...
Aitatxiren kondaira behatzen zuten, harrituak eta xoratuak
Negu minean supazter xokoan
Eta lasterka egurtegian kukutzen ziren
Amatxik erasiak hastean ...
Lagunkinak ziren nere haurrak eta maitagarriak
Plazaz-plaza eta ostatuz-ostatu zoatzilarik
Lagunkinak ziren lanean eta jostetan
Kantuan eta dantzan berantzen zirelarik gauaren luzean
Presondegietan zurmintzera kondenatu dizkidaten 
Nere izerdiaren haurrak
Eta min dut erraietan ...
Beren aita-amak eta beren haurrideak
Beren hauzokoak eta beren herriko lagunak
Baserrietan eta uzinetan eta eskoletan
Heziz eta alienatuz eta burtxoratuz
Xurgatzen dituzten bezala, egunero, beren legearen izenean
Ebakitzen dizkidate beren justiziaren izenean!

NONGO MADARIKAZIOAK JO ZUEN GURE HERRIA?



III

Hodei beltzak
Euri eta zitzer erauntsiak
Hodei harmatuak
Lehertzen dira
Euskadiren 
Hego eta Iparraldean ...

ZER ZUEN APARTEKORIK GURE HERRIAK?


Askatasuna
Kexatu zen eta
Erabaki zuen
Xutitzea ...
Hego eta Iparraldea 
Nere lurrak dira
Mixel, Peio, Arantxa, eta Terexa
Nere seme-alabak diren bezala ...
Hego eta Iparraldeak
Burrukan diraute
Iñaki eta Miren
Arrosa eta Ellande
Eta nere beste seme-alaba guziek
Burrukan dirauten bezala
Mendi-zelaietan eta itsasoaren zabalean
Baserri eta uzinetan eta eskoletan
Nere seme-alaba guziek
Burrukan dirauten bezala
Esplotatuak eta alienatuak eta umiliatuak
Ez izateko
Xurgatuak eta zapalduak eta madarikatuak
Ez izateko ...
Beren aita-amak eta beren haurrideak
Beren hauzokoak eta beren herrikoak
Egunero burrukan dirauten bezala
Hego eta Iparraldeko
Nere lurretan
Gure lurretan
Jende libroak izateko ...

 

OI GAU ZOHARDIA NERE BEGIEN AMETSA
ETA LARRAZKENEKO HAIZE EPELAREN HUNKIA
SOIN HEGIETATIK BIZKARREAN BEHERA
ETA IGUZKIAREN BEROA NERE AURPEGI BUSTIAN ...
JOANGO NAIZELARIK 
BIDEZ-BIDE 
ETA KARRIKAZ-KARRIKA
NERE HERRI LANGILEAREN URRATSEAN
NERE HERRI LANGILEAREN BIHOTZEAN
NERE HERRI LANGILEAREN ERRAIETAN ...
HASIKO NAIZELARIK KANTAN ETA DANTZAN
NERE HERRI LANGILEAREN PLAZETAN ...
OI GAU ZOHARDIAREN BETEA
NERE BIHOTZEKO AMETSA!

 

Batekoak hamarrekoa dakar
Hamarrekoak ehunekoa dakar
Ehunekoak milakoa dakar
Eta milakoak
Miliunak, miliunak eta miliunak dakarzki ...
Hego eta Iparraldean
Euskadik
Milakoan
Miliunak, miliunak eta miliunak dakarzki
Nere izerdiaren seme-alabak
Beren aita-amekin eta beren haurridekin,
Beren hauzokoekin eta beren herritarrekin
Hitzartzen direlarik
Juntatzen direlarik
Burrukarako
Iraultzarako
Amodiorako
Zin egiten dutelarik
Beren leearen izenean
Beren justiziaren izenean ...


OI AMETS ZOHARDIA NERE GOGOAREN AMETSA
ETA LARRAZKENEKO HAIZE EPELAREN HUNKIA
SOIN HEGIETATIK BIZKARREAN BEHERA
ETA IGUZKIAREN BEROA NERE AURPEGI BUSTIAN ...
JOANGO NAIZELARIK 
BIDEZ-BIDE
ETA KARRIKAZ-KARRIKA 
NERE HERRI LANGILEAREN URRATSEAN
NERE HERRI LANGILEAREN BIHOTZEAN
NERE HERRI LANGILEAREN ERRAIETAN ...
HASIKO NAIZELARIK KANTAN ETA DANTZAN
NERE HERRI LANGILEAREN PLAZETAN ...
OI AMETS ZOHARDIAREN BETEA
NERE GOGOAREN AMETSA!

1976ko urrian izkiriatua.

  
      

2012/07/29

SIRIA : bertzelako iritzi eta arrazoiak (1)


SIRIA :
AHOTS ANTIINPERIALISTAK (1)

THIERRY MEYSSAN


Itsuenak ere ikusten du Siria, lehenago Libia bezala, eraso inperialista basatia jasaten ari dela. Eskema errepikatzen ari da: sistema/estatu/gobernu antiinperialista zurrun eta autoritario bat, urte luzez bere burua behar bezala eraberritu eta Herri Langilearengan errotu ez dena, okerrak eta hanka-sartzeak, tentsioak eta kontraesanak metatu dituena, eta ondorioz, populazioaren zati baten oposizioa indartu duena. 

Egoera zail eta lehergai / lehergarri / leherbera horretan Inperialismoaren esku hartzeak eragiten du, gobernu antiinperialista bat uzkaili eta irauli nahian. Oposizio nazional eta antiinperialista guztiak baztertuz eta isilduz, erreforma eta elkarrizketa oro errefusatuz eta talde armatuak lagunduz eta hornituz, sasi gerra zibil bat piztu eta irabaztea da Inperialismoaren helburua, Libian bezala, kapitalismoaren aldeko gobernu txotxongilo bat ezarriz. 

Sasi gerra zibila diogu, zeren gero eta ageriagoa da “Siriako Armada Askea” delako talde armatua, mertzenario edota fundamentalista fanatiko kanpotarrez osatuta dagoela gehien bat, eta beraz, gerraz zibilaz baino eraso inperialistaz mintzatu behar dugula. III. Mundu Gerrako hasiera-garaietako bertze atal bat, aurretik Afganistan, Irak, Pakistan, Libano, Palestina, Libia ... izan diren bezala.

Bainan hau guztia gure iritzia da, bertzerik ez. Zuen iritzia osatzen laguntzeko, militante antiinperialista batzuen ahotsak ekarriko ditugu honat. Ahots horiek dira, hain zuzen ere, inkomunikabide kapitalistek egunero ezkutatzen dizkigutenak, eta intoxikabide inperialistek etengabe zikindu, desprestigiatu eta deabrutzen dituztenak. Zuek irakurri eta iritzi kritikoa osatu! Zuen ekarpen, iruzkin eta kritiken zain gaituzue!


THIERRY MEYSSAN

Thierry Meyssan kazetari frantses bat da, 1957ko maiatzaren 18an Talencen sortua (Gironda, Bordele ondoan),  Frantziako mundu politiko eta militarrean oso ezaguna den familia biziki katoliko batean. 2001eko irailaren 11ko atentatuak Inperialismoaren jukutria eta konspirazioa direla salatu zuen hasieratik, konplot bat zirela argudiatuz bere liburuan: “Iruzur ikaragarria” (L’Effroyable imposture, Paris, 2002). Geroztik inkomunikabide inperialisten eta sionisten betoa jasan du, eta disidente bezala Europatik ihes egin behar izan zuen. Gaur egun Libanon bizi da. 


Militante antiinperialista, Venezuelako Iraultza Bolivariarra eta Libanoko Hezbollah sustengatzen ditu; Irango Iraultza Islamikoaren alde ere agertu da. “Voltaire sarea” eratu du, eta oso aditu entzuna eta estimatua da komunikabide latinoamerikar, arabiar-musulman eta errusiarretan. Ekintzaile homosexuala izan da. Librepentsalaria, erlijioan biziki interesaturik, Teologia ikasketak egin ditu.

Hemen agertzen dugun artikulua, bere web orritik hartu dugu eta zuzen Frantsesetik Euskararat itzuli. Gehiago sakondu nahi baduzue, jo Voltairenet.org web orrirat (blog honetan bertan esteka duzue!). Han, informazio hau guztia eskuratuko duzue Frantsesez, Ingelesez, Espainolez, Italieraz, Portugesez, Alemanez, Errusieraz, Arabieraz ... Guk Voltaire sarearen Euskarazko ahots euskalduna izanen gara blog honetan, gure ahal ttipien arabera.


SIRIAKO ARMADA ASKEA:
IRAULTZAILEA ALA KONTRAIRAULTZAILEA?

Damaskon (Sirian) idatzia, 2012ko uztailaren 23an



Duela 18 hilabetetatik honat, Siriak gero eta handiago bilakatzen ari diren liskarrak bizi ditu, azkenik gatazka armatu handi bihurtu dena, zeinak 20.000 pertsona ingururen heriotza eragin duena.

Mendebaldeko Estatu eta beren prentsaren ustez, siriarrek nahiko lukete mendebaleko maneran bizi, merkatu-demokrazietan. “Udaberri arabiarreko” eredu tunisiar, egiptoar eta libiarrari jarraiki, Bashar Al-Assad, beren diktadorea uzkailtzeko matxinatuko ziratekeen. Honek manifestazioak odolez jazarriko zituzkeen. Orduan, Mendebaldekoek sarraskia gelditzeko esku hartze bat egin nahi izanen zuketen, bainan Errusiarrak eta Txinatarrak, interesengatik edota bizi humanoaren mespretxuarengatik, horren kontra agertuko ziratekeen.


Guztiz alderantziz, Estatu Batuen eta beren prentsaren mende ez dauden Estatu guztien ustez, USAk  aspaldian planifikaturiko operazioa burutuko zuketen. Lehendabizi, beren aliatu eskualdekoen bidez, eta ondoren zuzenki, Siria desestabilizatuko zituzkeen talde armatuak infiltratuko zituzketen, Nikaraguako Kontraren ereduari jarraiki. Hala ere, talde hauek oso sostengu ttipia aurkituko zuketen herrialde barnean, eta garaituak izanen ziratekeen; bitartean,  Errusiak eta Txinak,  OTANek Siriako Armada suntsitzea eta Ekialde Hurbileko ekuazioa iraultzea eragotziko zuketen.
Nork erraten du egia? Nor tronpatzen da?


SIRIAN TALDE ARMATUEK EZ DUTE DEMOKRAZIA DEFENDITZEN, BERE KONTRA JOTZEN DUTE

Lehen-lehenik, Sirian gertatzen ari dena “Udaberri arabiarraren” episodioa bailitzan interpretatzeak ilusio bat da, zeren “Udaberri” hori ez baita izan. Publizitate-slogan  bat da, gertaera heteroklitoak alde baikor batez agertzeko. Herri-matxinadak Tunisian, Yemenen eta Bahreinen, izan badira ere, ez da halorik izan, ez Egipton, ezta Libian ere. Egipton kale-manifestazioak hiriburura eta burgesiaren sektore zehatz batera mugatu dira, eta Herri egiptoarra ez da sekulan, absolutuki sekulan identifikatu Tahrir plazako ikuskizun telegeniko horrekin. Libian ez da matxinatze politikorik izan, baizik eta Zirenaika eskualdeko mugimendu separatista bat Tripoliko boterearen aurka, eta ondoren OTANen esku hartzea, zeinak 160.000 hildako eragin dituen.


Libanoko “NurTV” telebistak (Nur hitzak Arabieraz Argia erran nahi du) arrakasta handia erdietsi du Hassan Hamadek eta Georges Rahmek egindako emanaldi sail bat hedatzean: “Udaberri arabiarra, Arabiako Lawrence-rengandik Bernard Henry-Lévy-renganaino”. Autoreek bertan garatzen duten ideia da “Udaberri arabiarra” dela 1916-1918 urteetan Britanikoek Otomanen aurka antolatutako operazio sekretuaren “remake” bat.


 Oraingo honetan, Mendebaldekoek egoerak manipulatu dituzte lider-belaunaldi bat uzkailtzeko eta “Anaia musulmanak” inposatzeko. De facto, “Udaberri arabiarra” gezur publizitario bat bertzerik ez da. Hemendik aitzina, Maroko, Tunisia, Libia, Egipto eta Gaza anaitasun batek gobernatzen ditu, zeinak alde batetik orden moral bat inposatzen duen, eta bertzaldetik sionismoa eta kapitalismo sasi-liberala sostengatzen dituen. Ilusioa urtu da. Autore batzuk, Siriako Said Hilal Alcharifi bezala, “Udaberri OTANiarraz”  trufatzen dira.


Bigarrenik, hala Siriako Kontseilu Nazionala (SKN Euskaraz, CNS erdarez) erakundeko kideak nola Siriako Armada Askea (SAA Euskaraz, ASL erdarez) talde armatuko kideak ere ez dira bat ere demokratak, Abraham Lincoln-en formularen ildotik “Herriaren gobernamendua, Herriak egina eta Herriarendako”, zeina Frantziako Konstituzioan ere agertzen baita. Adibidez, SKNko lehen presidentea, Burhan Ghalioun izan zen. Bera ez zen inolaz ere “Siriako opositore bat erregimenak jazarria” zeren eta bere herrialdera joaten eta bertan  ibilki zen libreki. Bera ez zen “intelektual laiko bat”, gizon honek pretenditzen duen bezala, zeren eta Aljeriako Front Islamique du Salut FIS alderdiko Abbassi Madani-ren kontseilari politikoa baitzen, gaur egun Qatarren errefuxiatua.

Bere ondorengoa, Abdel Basset Syda politikan sartu da azken hilabeteotan, eta berehala ageri izan da bera dela estatu batuarren nahien exekutatzaile fidela. SKNko buru hautatu zutenez geroztik, ez da engaiatu bere Herriaren nahia defenditzera, baizik eta Washington-ek Siriarako izkiriatu duen “bide-orria” aplikatzera: “The Day after”.

 



Siriako Armada Askea taldeko gudulariak ere ez dira demokraziaren militanteak. Adnan al-Arur xeikh (buruzagi izpiritual)aren autoritatea onartzen dute, predikatzaile  takfirista bat, zeinak Bassar al-Assad uzkaili eta hiltzera deitzen du, ez motibo politikoengatik, baizik eta alauita delakotz bakar-bakarrik, hau da heretikoa bere ustez. (Alauitak dira xiismoaren adar berezi bat, eta takfiristak sunismo fundamentalistaren adar extremista bat). SAAko ofizial identifikatu guztiak sunitak dira, eta SAAko brigada guztiek figura historiko suniten izen dituzte. SAAko “epaitegi irauktzaileek” heriotzera kondenatzen dituzte beren opositore politikoak (eta ez bakarrik Bassar al-Assad-en aldekoak) eta fedegabeak, zeinei jendaurrean zintzurra ebakitzen diete. SAAren programa da erregimen laikoa suntsitzea, zeina eraiki duten Baas alderdiak (Sozialismo arabiarraren partidua) , PSNSk (Siriako Alderdi Sozial Nazionala) eta komunistek, eta bere ordez erregimen konfesional sunita hutsa ezartzea Sirian.


Honaino Thierry Meyssane-en artikuluko lehen zatia. Bigarrena, “Mendebaldekoek aldez aurretik prestatu dute Siriako gatazka”, bihar-etzi argitaratuko dugu.   


2012/07/25

Bobby Sandsen biografia (2)

Nuair a thigeann ar lá :  Gure eguna etorririk
Bobby Sandsen biografia 

(2)




Bobby Sands, Irlandako hizkuntza nazional bakarrean, Gaelikoz, alegia, Roibeard Gearóid Ó Seachnasaigh, 1954ko martxoaren 9an sortu zen, Belfastetik zortzi kilometrora dagoen Newtowabbey herrian, Antrim konderrian.

Bere ama, Rosaleen Kelly, 1951eko martxoaren 28an ezkondu zen John Sands, Bobbyren aitarekin,  eta bikoteak etxe berria erosi zuen Abbot Cross kalean, 6. zenbakian. Bi gurasoak Belfasteko langileak ziren, Markets auzokoak. Auzoko biztanle gehienak erlijioz katolikoak ziren, eta beraz, sentimendu eta nortasun irlandesa zuten. John Sandsen ama eta beraz, Bobbyren amatxi, aldiz, Elizabeth Forsythe, protestantea zen, presbiteriar erreformatua, hain zuzen. John Sands protestanteen artean bizi izan zen gurasoen etxetik joan zen arte. Orduan Mc Watters okindegian hasi zen lanean, Markets auzoan, eta hantxe ezagutu zuen Rosaleen, ehungintzako langilea. Bere aita zaldizaina zen, Johnen aita, tabernaria.

 


1920an Inperialismo britanikoak Irlanda bi zatitan hautsi zuen. Modu anker, basati, kolonial eta ezinago artifizial batean, Irlandako sei konderri “ebaki” zituzten gainontzeko hogeita sei konderrietatik: Aontroim (Antrim), Ard Mhacha (Armagh), An Dun (Down), Fear Manach (Fermanagh), Doire (Derry) eta Tír Eoghain (Tyrone). Ulster eskualde historikoa bera ere urratu zuten: hiru konderri, An Cabhán (Cavan), Dún na nGall (Donegal) eta Muineachán (Monaghan), zatiketa doilor honetan “bertzaldean” ezarri zituzten inperialista britanikoek eta kolaborazionista irlandesek, “Irlandako Estatu Askea”,  Saorstát Éireann izeneko egitura neokolonialean.



Jakin behar da Irlandak lau eskualde historiko dituela: Laighin (Leinster), bere hiriburua, Baile Átha Cliath (Dublin); Connachta (Connacht), bere hiriburua, Gaillimh (Galway); Ann Mhumhain (Munster), bere hiriburua Corcaigh (Cork), eta Ulaidh (Ulster), bere hiriburua, Béal Feirste (Belfast).
Kapitalismo inperialista britanikoaren asmoak ezin maltzurragoak ziren: gehiengo kolonial britaniko bat segurtatu Irlandako ipar-ekialdean, horretarako nortasun erlijiosoaz baliatuz eta sektarismo zein fanatismoa erabiliz. Azpimarratu behar da Theobald Wolfe Tone, Irlandako abertzaletasun errepublikanoaren sortzaile nagusia, protestantea zela, eta historian zehar irlandar protestante aunitzek eman dutela bizitza independentziaren alde. Egitura zapaltzaile, kolonial eta sektarioa zen Sei Konderri okupatuak, arrazismoan oinarritua: kolono britanikoek den-dena kontrolatzen zuten: parlamentu autonomoa, industria, hezkuntza, polizia, epaitegiak... “Estatu protestante bat Herri protestantearendako”.

Abbot Cross auzo berria zen, modernoa, ongi egina, baina sakonki sektarioa: sei eliza britaniko-protestante zeuden, bainan eliza irlandes-katolikorik ez. Eskola britaniko-protestantea zegoen, bainan ez irlandes-katolikorik. Sektarismoa jaun eta jabe zen itxura atsegin eta abegikorra zuèn Abbot Cross auzoan.
Bobby Sandsen ama, Rosaleen, oroitzen zen txikitan, bera oraindik haurra zela, nola sartzen ziren basatiki eta bortizki paramilitar britanikoak, “B-Specials”, Markets auzoan. 1920-1930 urteetan ekintza terrorista kolonial ugari bizi behar izan zuten Sei Konderrietan bizi zirèn irlandesak. Abbot Crossen polizia eta paramilitar kolonial britaniko aunitz bizi ziren. Gauzak honela Rosaleenek bere identitate irlandesa ezkutatu zuen: ez zion inori erran katolikoa zela, eta Sands abizenak ez zuen ezaugarri berezirik: aise izaten ahal zen britaniko-protestantea. Ezkonberriak lasai bizi ziren beren auzo berrian, eta 1954ko martxoan Robert Gerard, Bobby sortu zen. 1955ko apirilean, bere arreba Marcella jaio zen. Geroago, 1958ko azaroan, Bernadette.

 


1956an Óglaigh na hÉireann, Irish Republican Army, IRA, berriz hasi zen borroka armatuan Sei Konderrietako muga kolonial eta artifizialean. Giroa zakartu zen, eta tentsioak areagotu ziren kolono britaniko eta herritar irlandesen artean. Sektarismoa eta arrazismoa gogortu eta areagotu ziren, eta auzokide britaniko batek jakin zuen Rosaleenen identitatea: katolikoa eta irlandesa zen auzo birtaniko-protestante batean! Infernua hasi zen Sands familiarendako.

Auzokidea zèn emazte horrek Rosaleen izorratzeko ahalegin guztiak egin zituen, eguneroko bizitzan: zarata, irainak, irri maltzur eta ironikoak, etengabeko kolpeak paretetan... Azkenean Rosaleen, estresak jota, gaixotu egin zen. Medikuak argiro erran zion John Sandsi: bere emazteren eritasunaren iturburua auzokide britanikoen jazarpen gupidagabea zen. Salatu behar zituen, ala alde egin.

John Sands eta Rosaleen Kelly jende lasai, goxo, adeitsu eta bakezalea zen. Ez zuten inolako gatazkarik nahi, ez zituzten liskarrak maite. Beren etxe maitea utzi behar izan zuten, penaren penaz, 1961ean, eta sei hilabetez ahaideen etxeetara bizitzera joan, ahal bezala. Bobbyk zazpi urte zituen orduan. Bere haur jolasetan murgildurik, ez zekien Inperio Britanikoa zer zen. Bainan bere uztarpean bizi zen, eta zapalkuntza inperialista eta kolonial horren bere bizitza markatzen zuen goiti-beheiti. 1961eko abenduan, azkenean, Sands familak etxe berria lortu zuen Rathcoole auzoan, Doonbeg Drive kalean, 68 zenbakian. Etxe zabal eta ederra, Carnmoney Hill muinoaren magalean. Bizitza berri bat, sektarismo eta arrazekeriatik urrun, bakean...