Gure eskuetara iritsi da esku-orri bat, Gasteizko sarraski faxistaren urteurrena dela-eta, Euskal Herriko kale eta karriketan langile iraultzaile batzuk idatzia eta zabaldua. Talde zein sare ugari eta aunitz ari dira sortzen Euskal Iraultza Sozialistaren bidean, eta pozgarria da blog honetara burkide hauen gogoeta ekartzea. Beren pentsamenduarekin bat gatoz erabat. Ekimen hauek guztiek bat eginen dutelakoan gaude, eta hori da hain zuzen gure esperantza eta Euskal Langileriaren itxaropena. Larunbatean, Ondarruko Gaztetxean, bistan da, honetaz guztiaz mintzatuko gara luze eta zabal. Biba zuek, burkideok!
MARTXOAK 3:
ATZO ETA GAUR BIDE BAKARRA:
EUSKAL LANGILERIAREN ANTOLAKUNTZA ETA BORROKA IRAULTZAILEA
Martxoaren 3a gorriz
seinalatutako data da Euskal Herri Langilearen egutegian. 1976an,
Gasteizko Langileriaren greba eta borroka zapuzteko asmoz, Burgesiak
bere mertzenario armatuak bidali zituen klase gatazka argi bat zena
odoletan itotzera. Eta horrela suertatu zen. Asanblada burutzen ari
ziren langileen aurka basakeriaz oldartu eta gero, bost langile erail
zituzten Gasteizen bertan. Langileriaren aurkako erasoaren kontrako
protesta ekimenetan berriz, beste hiru langile zendu ziren burgesiaren
mertzenarioen eraginez, Basaurin, Herrialde Katalanetako Tarragonan eta
Italiako Erroman.
Hamarkada batzuk
igaro diren arren euskal langileon egoerak ez du batere hobera egin.
Franco hil ezkeroko "erreformarekin", hau da, Monarkia Borboitarraren II Berrezarkuntzarekin, dena “ondo lotuta” zeukatela argi
utzi zigun Espainiar Oligarkiak bere Estatuaren aparatuen laguntzarekin
langileon esplotazioa eta nazio zapalduon egoera bere horretan
mantentzeko helburuarekin inposatutako Konstituzioaren bidez. Eta zeozer
aldatu zuten, bai, baina denak berdin irauteko helburuarekin.
Ordudanik, Burgesiak
eta euren Estatuaren mesedetan Langileriaren borroka desitxuratzen eta
itzaltzen saiatu diren sozialdemokratek aldarrikatutako “Ongizate Estatu Demokratikoaren” gezurraren gainbeherak argi uzten digu euskal
langileoi zer den horretaz guztiaz geratu zaiguna: langabezia, kaleratze
librea, lan esplotazioa, esku lanaren merketzea, bereziki gazteriaren
eta emakumeen lan baldintzen esklabutzea... laburbilduz, erreximen
faxista baten tankerako terrorismo pratronala, legedia inkisitorialak,
errepresio basatia eta Herri zein Langile Klaseak zapalduta mantentzeko
hauteskunde ustel eta “hitzarmen sozial”aren iruzur etengabea.
Mundu mailan Kapitalismoak inoiz pairatutako krisialdi sakon eta beltzenaren
testuinguruan langileon oroimenera ekartzen dugun 2013 honetako
Martxoaren 3a, Euskal Langileriari klase antolakuntza independenterako
eta borroka iraultzailerako deia egiteko aprobetxatu nahi dugu.
Gasteizen erori eta zauritutako euskal langileek, mundu osoko langile mugimenduak izerdiz eta odolez idatzitako historiaren kapitulu bat idatzi zuten Euskal Herrian eta harrotasun osoz diogu eurek hartutako bidea, klase ANTOLAKUNTZA eta BORROKA iraultzailearena, euskal langileoi gure askapen sozial eta nazionalerako geratzen zaigun bide baliagarri bakarra dela.
Kapitalisten jokoaren arauak onartu eta euren aurrean
makurtzen diren burgesia eta sozialdemokraten alderdi eta sindikatuek
langileen aurrean duten sinesgarritasun apurrarekin behingoz amaitu,
terrorismo patronalari erantzun kolektiboa emateko langile asanbladak
osatu eta pairatzen dugun ofentsiba kapitalistaren aurrean borroka molde
erradikalak erabiltzea da, beste gauza batzuen artean, uneak langile
klaseari ezartzen dizkion betebehar historikoak.
Burgesiaren zapalkuntza faxistaren aurka
eta
sozialdemokraten saldukeria erreformistaren aurrean:
EUSKAL HERRI LANGILEAREN
FORMAKUNTZA,
ANTOLAKUNTZA ETA
BORROKA IRAULTZAILEAREN ALDE!!!
iruzkinik ez:
Argitaratu iruzkina