ZER EGIN?

"BASQUE PEACE PROCESS" 

KOLAPSOAREN ATARIAN:

ZER EGIN BEHAR DUGU

EUSKAL IRAULTZAILEOK?



 

Lehendabizi, prentsa euskaldunean azken egunetan agertutako albiste batzuk:

1.- ARGIAn agertutakoa, martxoaren 5ean:

ETAko buruzagitza kanporatu du Norvegiak, Ser irratiaren arabera

ARGIA

2013-03-05

Josu Urrutikoetxea izango litzateke kanporatuetako bat.

"Ser irrati kate espainiarrak zabaldutakoaren arabera, zortzi hilabetez Norvegian izan diren ETAko kideak kanporatu ditu herrialdeko Gobernuak, bake prozesuan aurrerapausorik eman ez dela-eta. Josu Urrutikoetxea, David Pla eta Iratxe Sorzabal dagoeneko Frantzian leudeke, informazio hauen arabera.

Ezker abertzaleak ez du gaiari buruzko adierazpenik egin oraingoz.

Ser-eko iturrien arabera, zortzi hilabetez, hiru buruzagiek bilerak egin dituzte nazioarteko egiaztatzaileekin, Oslon eta Norvegiako beste hainbat herritan. Helburua, preso politikoentzako bide-orria zehaztea zen. Negoziazioek, ordea, ez dute aurrera egin, egoera blokeatuta dago eta Frantziara berme guztiekin kanporatzea erabaki zuen Norvegiako Gobernuak. Polizi iturrien esanetan, Espainiako Gobernuaren oniritzia du erabakiak, nahiz eta Barne Ministerioak ofizialki esan duen ez dagoela jakinaren gainean.

ETAren jardun armatuaren amaiera Egiaztatzeko Nazioarteko Batzordeak kezka agertu du azken asteotan, "urratsik ez delako eman duela hilabete batzuetatik, bi aldeetatik".

Filtrazioak aurretik ere

Otsailaren 11n Efe berri agentziak zabaldu zuen ETAko buruzagitza Nazioarteko Harreman Taldearekin bilerak egiten ari zela Norvegian. Albiste hartan hainbat datu ematen ziren, eta ezker abertzaleak filtrazioen inguruko kezka agertu zuen. Alderdi independentistako iturriek adierazi dute "halako informazioak filtratzen dituztenek nazioarteko egiaztatzaileek ezarritako soluzioen agenda desbirtuatu nahi dute"."

2.- EITBn agertutakoa egun berean:

Politika

Frantziara itzuli ei dira

NORVEGIAK KANPORATU EGIN DITU 

ETAren BURUZAGIAK 

 

Erredakzioa

2013/03/05

Negoziazioek porrot egin eta gero, herrialde horretako agintariek babesa ukatu diete ETAren buruei, Ser irrati-kateak jakinarazi duenez.

Norvegiako agintariek nazioarteko egiaztatzaileekin eta Espainiako eta Frantziako gobernuen ordezkariekin negoziatzeko helburuz Oslora joan ziren ETAren buruzagiei babesa emateari utzi diote, eta, horrenbestez, kanporatu egin dituzte herrialdetik.

Poliziaren eta Espainiako Estatuaren Informazio Zerbitzuak aipatuta Ser irrati kateak iragarri duenez, Norvegiatik egotzitakoak Josu Urrutikoetxea, Josu Ternera; David Pla; eta Iratxe Sorzabal dira.

Duela zortzi hilabete heldu ziren Norvegiara, eta otsailaren 12an joan omen ziren.

Vasco Press informazio agentziaren esanetan, Espainiako eta Frantziako gobernuek ETAko buruei babesa emateari uzteko eskatu zioten Norvegiako Gobernuari.

Aipatu iturrien arabera, ETAk desarmatzearen eta desegitearen bidean pausoak ematea baztertu duelako erabaki du orain Norvegiak babesa ukatzea.

Urtarrilean nazioarteko egiaztatzaileekin egindako bileretan, ETAren buruek errefusatu egin zuten aurrerapausorik egitea, horrek Norvegiako Gobernuak babesa ukatzea ekar lezakeela bazekiten arren, betiere Vasco Pressek azaldu duenez.

ETAren buruek Espainiako eta Frantziako gobernuekin negoziatzea jarri ei zuten desamartze eta desegite prozesua abiatzeko baldintza gisa, baina Madril eta Paris aurka agertu ziren.

Barne Ministerioa: "Atxilotu egingo dituzte, nonahi"

Francisco Martinez Espainiako Gobernuaren Segurtasun estatu idazkariak adierazi duenez, ETAko kideak atxilotu egingo dituzte, "nonahi".

Martinezek ez du hizpide hartu nahi izan Norvegiako Gobernuaren erabakia, eta terroristek krimenak ordainduko dituztela baino ez du adierazi.

EAJk "logiko"tzat jo du Norvegiaren erabakia

Aitor Esteban EAJk Kongresuan duen bozeramaileak "logiko"tzat jo du Norvegiako agintariek ETAren buruak kanporatu izana.

Horren esanetan, "ezaguna" zen ETAren buruzagiak Norvegian zeudela, bertan "egiaztatzaileekin" batzartzeko, baina bilera "amaitu" egin zen eta egiaztatzaileak "Euskadira joan ziren", eragileei horren berri emateko."

3.- BERRIA egunkarian martxoaren 6an argitaratutakoa:

2013-03-06

Espainiak esan du 

ETAko kideak 

atxilotu egingo dituztela «nonahi»

 

SER irratiak dio ETAko buruzagitza kanporatu egin dutela Norvegiatik; Espainiako Gobernuak ez du baieztatu albistea.

Erredakzioa

Bake prozesuan aurrera egiteko asmoz, nazioarteko egiaztatzaileen, Espainiako eta Frantziako gobernuko ordezkarien eta ETAko buruzagitzaren arteko elkarrizketa saio bat egon da azken hilabeteotan, baina negoziazioek porrot egin dute, SER irrati kateak atzo zabaldu zuen informazioaren arabera. Komunikabide horrek jakinarazi duenez, bake prozesuan aurrerapausoak emateko asmoz zortzi hilabetez egon dira Norvegian ETAko buruzagitzako hiru kide, baina herrialde horretako gobernuak bertan egoteko baimena berritzeari uko egin eta herrialdetik kanporatu ditu, erakunde armatuko kideek negoziazioetan urratsak egiteko borondate nahikorik ez zutela ikusirik.

Informazio horri buruzko iritzia galdetu zioten atzo Francisco Martinez Estatuko Segurtasun idazkari nagusiari, eta hark ez zuen albistea gezurtatu. Adierazi zuen hedabideek zabaldutako albisteei buruzko iritzirik ez zuela emango, baina ohartarazi zuen etakide eta buruzagi guztiei «jazarriko» zaizkiela eta guztiak «atxilotuko» dituztela, «nonahi» daudela ere.

Espainiako irrati kateak emandako informazioaren arabera, baina, Espainiako Gobernuaren oniritzia izan du ETAko zuzendaritza Norvegiatik kanporatzeko erabakiak. Alabaina, Barne Ministerioak ofizialki esan duen ez dagoela jakinaren gainean.
Ustez Ram Mannikalingam buru duen nazioarteko egiaztatzaile taldearekin eta Espainiako eta Frantziako gobernuen ordezkariekin negoziatzeko helburuz joan ziren Oslora duela zortzi hilabete inguru Josu Urrutikoetxea, David Pla eta Iratxe Sorzabal ETAren zuzendaritzako kideak, baina bake prozesuan aurrerapausorik ez zen egon denbora tarte horretan, eta Norvegiako agintariek etakideei babesa emateari utzi zioten. SER irrati kateak dioenez, erakunde armatuaren hiru buruzagiek bilerak egin zituzten nazioarteko egiaztatzaileekin, Oslon eta Norvegiako beste hainbat herritan. Besteak beste, elkarrizketa horietan euskal presoen auzia konpontzeko bide orria eta desarmatze prozesua zehazten saiatu ziren bi aldeak. Negoziazioek, ordea, ez zuten aurrera egin, eta ETAko buruzagiak Frantziara kanporatzea erabaki zuen Norvegiako Gobernuak. Otsailaren 12an kanporatu omen zituzten herrialde horretatik Urrutikoetxea, Pla eta Sorzabal.

Ez da lehen aldia halako informazio bat zabaltzen dena. Joan den otsailaren 11n Efe albiste agentziak jakinarazi zuen ETAren buruzagitza Nazioarteko Harreman taldearekin bilerak egiten ari zela Norvegian. Orduan, ezker abertzaleak filtrazioen inguruko kezka agertu zuen, eta horiekin bake prozesua oztopatu nahi zela salatu zuen.

             Sinesgarritasuna eman diote

Atzo zabaldutako informazioari sinesgarritasuna eman diote ordezkari politikoek. Esaterako, Eusko Jaurlaritzak uste du Norvegiako Gobernuak ETAko buruzagiak kanporatu dituela horrek ez duelako «keinu argirik» egin bake bidean. Josu Erkoreka gobernuko eledunarentzat, «kezkagarria» da ETAk oraindik armak behin betiko lagatzeko erabakia hartu ez izana. Gogorarazi du egiaztatzaileek ETAri ohartarazi diotela solaskidetza utziko dutela baldin eta datozen hilabeteetan urrats argirik egiten ez badu. Haren ustez, Norvegiako Gobernuaren erabakia bat dator egiaztatzaileek diotenarekin, eta ETAk kontuan izan beharko luke.

PPko presidente Antonio Basagoitik, berriz, adierazi du ETAko buruzagitzak armak utzi eta «damua» agertzen ez badu «Norvegiatik, Frantziatik eta toki guztietatik» kanporatua izango dela. ETAk egin beharreko «gutxieneko urratsak» dira horiek, Basagoitiren ustez.


Orain gogoeta labur batzuk, eztabaida eta hausnarketa eragiteko:

1.- Albisteak logikoak dira, Inperialismoaren "txakur onak" soka estutzen ari dira Euskal Nazio Askapenerako Erakunde Sozialista Iraultzailearen lepo inguruan, normala denez, gero eta gehiago amore eman dezan, orain arte gutti egin izan balu bezala. Lakioa, segada eta intoxikatze operazioak ongi funtzionatu du: xake mate! Helburua ETAren errendizio absolutua baita, umiliazioa, desagertzea eta damutze publikoa. ""Vencido y derrotado el Ejército Rojo..." Bitartean, Inperialismoaren "txakur gaiztoek" militanteak atxilotzen dituzte Euskal Herrian, Frantzian, Espainian eta nonhai, eta espetxe zigor gogorretara kondenatzen dituzte gatibu dauden militanteak, lasai lasai eta inolako ondoriorik gabe. Den-dena "normaltasun demokratikoan".  Eta Herria, gero eta harrituago; presoak, gero eta kezkatuago...

 

2.- Duela jada urte batzuk errepikatzen dugu behin eta berriz "Basque Peace Process" delako horren helburua, inperialista anglo-saxoi eta sionistendako, ez dela inolaz ere balizko "Estatu Baskoa" ahalbidetzea, Oraingo Ezker Abertzaleko zuzendaritza sozialdemokrata eta erreformistak saldu eta sinestarazi nahi izan digun bezala, baizik eta Euskal Herri Langilearen borroka iraultzaile molde oro likidatzea eta ENAM suntsitzea, Sistema Kapitalista eta Inperialistan integratuz erabat. Inperialismoa errepikatzen ari da 1937-1957 urteetan PNVrekin egindako jukutria bera. Eta Oraingo Ezker Abertzalea orduko EAJ burges, kristau-demokrata eta filoinperialista bezain zozoa da, edota okerrago dena, orduko PNV bezain traidorea. Biak batera, seguraski. Bergarako besarkada eta Santoñako paktua batera! Burgesia nazionalista baten estrategia koherentea, batzuk burges ertain eta handiak, bertze batzuk, aldiz, burges txiki eta politikero profesional burokrata koadrila bat. Tragikoena da erreformisa eta likidazionista hauen atzetik Euskal Herri Langilearen sektore handiak direla, laño-laño den-dena sinetsita eta lerro-lerro Euskal Nazio Askapenerako Mugimendua izan zena galbiderat daraman estrategia batean parte hartzen... Noiz arte?

3.- Zer egin behar dugu euskal iraultzaileok? Lehenik eta behin, elkartu eta eztabaidatu. Gero, antolatu eta ekin. Honetaz guztiaz mintzatuko gara heldu den larunbatean, martxoaren 16an, arratsaldeko 7etan, Ondarruko Gaztetxean. Garaia iritsi da euskaldun iraultzaileok eta iraultzale euskaldunok aurpegia emateko eta alternatiba bat eskaintzeko Euskal Herri Langileriari, gure betiko helburuen alde: Independentzia, Sozialismoa, Birbatasuna eta Berreuskalduntzea. Eta jakina, Amnistia osoa eta baldintzarik gabea gudari eta iraultzaile ororendako. Tenorea iritsi da Euskal Herri Langileak jakin dezan badela bertze bide bat, betikoa, zaharra eta berria aldi berean: Euskal Iraultza Sozialista, Euskal Errepublika Sozialistaren bidean. Hau da, haustura iraultzailea Espainia monarkiko neofrankista eta kapitalistarekin, eta Frantzia etnozida, jakobino, nuklear eta inperialistarekin. Haustura Estatu burges horiekin, eta elkartasunezko harreman internazionalistena hango Herri Langile guztiekin, denon artean, nork bere erritmoan, Iraultza Sozialista egin dezagun. Orain ez bada garaia Iraultza Sozialista egiteko, noiz izanen da?

Larunbatean Ondarrun elkar ikusiko dugulakoan, besarkada bero eta erraldoia Euskal Iraultzan oraindik sinesten duzuen guztiondako!!! Orain borroka da bide bakarra!!! Jotake irabazi arte!!!