STALIN: LENINISMOAREN OINARRIAK (1)

LENINISMOAREN OINARRIAK (1)

 

SARRERA

J.V. Stalinek, 

Sverdlov Unibertsitatean 1924an

 belaunaldi leninistari emandako hitzaldiak
 

Leninismoaren oinarriak: gai zabala da hauxe. Gai hau osorik profitatzeko eta ustiatzeko, liburu oso bat, edo are gehiago, liburu sorta oso bat beharrezkoa izango litzateke. Horregatik, guztiz naturala da hitzaldi hauek Leninismoaren azalpen oso bat ez izatea. Hala ere, aurkezpen xehe bat egitea beharrezko ikusten dut, gerora Leninismoa bete-betean ikasteko abiapuntu gisa beharrezko izanen dena.

Leninismoaren oinarriak azaltzea ez da Leninek munduaz zuen ikusmoldea aurkeztea. Leninen munduaren ikuskera eta Leninismoaren oinarriak ez dira gauza bera. Lenin marxista da, beraz, berak munduaz duen ikuskera Marxismoan datza. Baina honek ez du esan nahi Leninismoaren oinarrien azalpena plazaratzeak Marxismoaren oinarrietatik hasi beharko lukeenik. Leninismoa aurkezteak, Leninen lanetan eta pentsamoldean, zer berririk eta berezirik dagoen azaltzea eta Marxismoaren ondareari, aurrez zegoenarekiko egindako ekarpenak aurkeztean datza; hau da, Leninek berak ekoizturikoa aurkeztea. Modu honetan mintzatuko naiz hitzaldi hauetan Leninismoaren oinarriez.

            Zer da ba, leninismoa?

Batzuen aburuz, Leninismoa, Marxismoa Errusian emandako baldintza berezietara moldatua eta bertan aplikatua da. Definizio honek egiatik zerbait badu ere, hankamotz geratzen da. Egia da Leninek Marxismoa Errusian maisutasunez aplikatu zuela. Baina Leninismoa soil-soilik Errusiako baldintza berezietan aplikaturiko Marxismoa izanen balitz, orduan, Leninismoa fenomeno nazional bat soilik izanen litzateke, errusiar gertakari bat besterik ez. Halere, jakin badakigu Leninismoa nazioarteko gertakari bat dela, toki guztietan errotutakoa, ez Errusian bakarrik. Horregatik, nire ustez definizio hau hankamotz geratzen da.

Beste batzuek diotenagatik, ordea, Leninismoa XIX. mendeko 40. hamarkadako Marxismoaren ezaugarri iraultzaileen berpizkunde bat izanen litzateke. Marxismoaren aro bien banaketa hori, Marxismoa lehen aro iraultzaile baten eta aro berantiar moderatu baten erdibitzen duen banaketa xinple eta ergel hori alde batera uzten badugu, arestian aipatutako definizio honek, akastuna eta okerra bada ere, egiaren izpiren bat baduela onartu beharko dugu. Egia da Leninek Marxismoaren eduki iraultzailea, II Internazionaleko oportunista horiek usteldutakoa, berpiztu egin zuela. Bainan hau ez da egia osoa. Egia ez da soilik berpiztu egin zuela, baizik eta aurrera eraman zuela, Marxismoaren garapena Kapitalismoaren eta proletalgoaren borrokaren baldintza berrietara egokituz.

            Zer da leninismoa orduan?

Leninismoa, Inperialismoaren eta Iraultza proletarioaren garaiko Marxismoa da. Edo hobeki esanda: Leninismoa orokorrean, Iraultza proletarioaren teoria eta taktika da, eta batez ere, proletalgoaren diktaduraren teoria eta taktika da. Marx eta Engels garai aurreiraultzailean (Iraultza proletarioaz ari gara) aritu ziren, oraindik Inperialismo garatu bat ez zegoenean, langileak oraindik Iraultzarako trebatzen ari zirenean, Iraultza proletario saihestezina epe laburrera gertatzeke ez zegoenean. Lenin, ordea, Marx eta Engelsen ikaslea berau, Inperialismo garatuaren aroan aritu zen, Iraultza proletarioa zabalduz dabilen aroan, Iraultza proletarioak, Demokrazia Burgesa suntsituz eta Langile Demokraziari eta Sobieten aroari hasiera emanez, herrialde batean garaipena lortu duen aroan.

 

Horregatik,
Leninismoa
 Marxismoaren osteko garapena da.

Leninismoaren baitan nabarmentzen dena bere berea duen izate iraultzaile eta borrokalari sutsua da. Hau egia bada ere, Leninismoa berezi egiten duten ezaugarriak bi dira: bata, Iraultza proletarioaren erroetatik ernaldu zela, honen zigilu-marka eramanaz; eta bigarrena, II. Internazionaleko oportunisten aurkako borroka ideologikoetan, Kapitalismoaren aurka arrakastaz borrokatzeko ezinbestekoak diren borroketan sendotu zela. Ezin dugu ahantzi Marx eta Engelsen eta Leninen artean, II. Internazionalaren oportunismoaren nagusikeriaren aro luzea zabaltzen dela, eta oportunismo honen aurkako borroka etengabea Leninismoaren zeregin garrantzitsuenetako bat dela.