Marx eta Engels : Biografia (1)

KARL MARX

FRIEDRICH

ENGELS

MILITANTE KOMUNISTA IRAULTZAILEAK

 

“Filosofoek ,

mundua era desberdinetara interpretatzea,

besterik ez dute egin,

baina kontua

 hura eraldatzea da”

“Mamu  bat  dabil  Europan  zehar:

Komunismoaren  mamua”

“Orain  arteko

sozietate guztien  historia

klase  borrokaren  historia  da”

 

 

1.- MILITANTE

 KOMUNISTA IRAULTZAILEAK

         Zapaldu eta zapaltzaileen arteko gatazkak gidatzen du Historia, esplotatu eta esplotatzaileen artekoak, azpiratu eta azpiratzaileen artekoak, menderatu eta menderatzaileen artekoak. Klase borrokak, alegia Historiaren giltza, motorra eta bihotza dira. Esklaboak, jopuak, proletarioak, langileak eta nekazariak... 

Etengabeko klase borrokan murgildurik, inor ezin da neutrala izan. Kokatzen garen tokiak baldintzatzen gaitu eta sakonki moldatzen du gure ikuspegia alde batera edo bestera, gure klase interesen arabera batzuetan, menderatzen gaituzten ideologia zapaltzaileen mesedetan besteetan. Ez dugu botere-sare eta zapaldu-zapaltzaile harreman hauetatik ihes egiterik, Praxi Iraultzailearen bidez ez bada. Botere harremanen amaraunak biltzen gaitu bere baitan. Neutralkeriak zapaltzaileei lagundu izan die beti, mendez mende. Hori da munduko Herri Langile guztiok malkoz, izerdiz eta odolez Historian zehar ikasi duguna. Klase interesek, zapaltzaileek bere interesetan zabaldutako ideologia toxikatzaileek eta produkzio sozialean oro har guk geuk okupatzen dugun funtzioak bereziki eta nagusiki errotik baldintzatzen dituzte gure ikuspegiak eta jokabideak.

Baldintzatu, bai, bainan ez determinatu, zapaldu guztion gogo-bihotzean Utopia Komunistaren pindar eta txinparta bizi baita: zapaldu eta zapaltzailerik gabeko mundu berdintasunezko bat, askatasuna zapalduondako, libertatea esplotatuondako!

Horregatik zehaztu nahi dugu Karl Marx eta Friedrich Engels militante komunista iraultzaile miresgarrien biografia hau nondik idatzia den, zein klase-haututatik pentsatua den, zertarako izkiriatu dugun eta zer genuen gogoan lan hau egiterakoan. Irakurleak bere iritzi propio eta kritikoa egin dezan, eta aldi berean gurea lana osa, hobe eta kritika dezan . Praxi iraultzailea baita (Teoria praktikatua eta Praktika teorizatua) zapalkuntzaren amaraunetatik askatuko gaituen bide bakarra. Praxi Iraultzailearen Filosofia abiatu zuten Marxek eta Engelsek 1845ean, hain zuzen. Eta guk XXI. mende hasiera honetan, bide beretik segituko nahi dugu, bururaino, hots, Komunismoraino.

Euskaldun iraultzaileak gara, eta iraultzaile euskaldunak. Euskal Herria da gure Aberria. Hobeki eta sakonkiago esateko, gure Amerria. Ama Euskara, Ama Lurra, Ama Nafarroa eta Ama Euskal Herria. Euskaldunak gara, Euskaraz bizi nahi dugu, Euskara da gure Herri eta Nazioaren hizkuntza bakarra. 

 

Euskal Herri Langilea askatu nahi dugu bere kate guztietatik: zapalkuntza ekonomiko kapitalista, mendez mende Estatu inperialistek (Nafar Estatuak ere barne!) burutu duten etnozidioa, hasierako euskal zibilizazio matriarkala suntsitu zuèn patriarkatua, ekozidioak eragiten dituen desarrollismo industrialista, eta abar ... 

Horretarako, bide bakarra: Euskal Iraultza Sozialista egitea! Euskal Herri Langilea da gure klasea, langile guztien talde soziala. Zapalduak eta azpiratuak, esplotatuak eta menderatuak. Horren kontzientzia dugun heinean, iraultzaileak, antikapitalistak, komunistak gara. Kapitalismoa suntsitu nahi dugu, eta Komunismoa eraiki. Herria osatu, zeren zapalkuntza, klase gizartea, patriarkatua, benetako eritasuna baitira, egiazko gaixotasuna, zinezko minbizia.

Horren aurka, langile guztion askamina eta bizimina aldarrikatu nahi ditugu, zapaldu guztion libertatea. Euskara eta Askatasuna, hots, Euskal Herri birbatu, independente, sozialista eta euskalduna. Euskal Errepublika Sozialista, munduko Herri Langile guztien Konfederazio Komunistaren bidean.

Blog honen helburua, militante iraultzaile euskaldunon kontzientzia sakontzea da, eta ondorioz, gure praktika iraultzailea indartu eta azkartzea. Horregatik eta horretarako  prestatu dugu Marx eta Engelsen biografia hau. Beren lan eta borrokak ezagutuz, beren teoria eta praktika estudiatuz, beren neke eta pozak jakinez eta ikasiz, Euskal Iraultza Sozialista egiteko behar dugun prestakuntza teoriko eta praktika eskura dezagun. Ez modu abstraktu eta eskolastikoan, Teoria Iraultzaileak zerutik jaitsiko liratekeen jakintza goitiarra bailiran, baizik eta metodo historiko eta dialektikoan, borroka eta kontraesan historikoetan eta klase borrokaren bihotzean. Marx eta Engelsek beren garaian egin zuten bezala. 

53 ataletan eginen dugu, beraz, irakurketa luzea eta sistematikoa izanen da, eta aldi berean Marx eta Engelsen pentsamenduaren sarrera orokor bat, Euskaraz sekulan egin den luzeena. Zuen kritikak, oharrak eta ekarpenak biziki eskertuko dizkizuegu, bihotz-bihotzez.

Gora Euskal Herri Langilea! 

     Gora Euskal Iraultza Sozialista! 

      Jo ta ke irabazi arte!

NON - ZER

 1.-  Militante komunista iraultzaileak.

 2.-  Haurtzaroa eta nerabezaroa : 1814 - 1835.

 3.-  Unibertsitateak: 1835 - 1841.

 4.-  Hegel.

 5.- “Rheinische Zeitung” : 1842 - 1843.

 6.-  Karl eta Jennyren ezkontza.

 7.-  Paris : “Deutsch-Französische Jahrbücher”. 

       1843 - 1845.

 8.-  Ingalaterra. Langile klasearen miseria. 

        1842 - 1845

 9.- “Parisko eskuizkribuak”. 1844.

10.- Brussel : 1845 - 1848.

11.-“Familia Sakratua” . 1844 - 1845.

12.-“Feuerbachi buruzko tesiak”. 1845.

13.-  Praxiaren Filosofia.

14.-“Langile klasearen egoera Ingalaterran”. 

        1845

15.-“Ideologia alemana”. 1845.

16.-“Filosofiaren miseria”. 1847.

17.- Komunisten Liga. 1847.

18.-“Alderdi komunistaren manifestua”. 1848.

19.- 1848ko iraultzak Europan.

20.- Kolonia : “Neue Rheinische Zeitung”. 

       1847-1849.

21.- Londres. Berriz ere erbestean. 1849 - 1851.

22.- Komunista Iraultzaileen Elkarte Unibertsala. 

       1850 -1852.

23.-“Klase borrokak Frantzian 1848tik 1850era”. 

       1850

24.-“Iraultza eta kontrairaultza Alemanian”. 

        1851 - 1852.

25.-“Luis Bonaparteren Brumarioren 18a”. 1852.

26.- 1852 - 1856 : urte gogorrak.

27.- 1857 - 1858ko eskuizkribuak : “Grundisse”.

28.- 1859 : “Ekonomia politikoaren kritikari

        ekarpena”.

29.- 1860 - 1862 : lan gogorren urteak.

30.- 1863 : Mary Burnsen heriotza.

31.- 1864 - 1876 : Langileen Nazioarteko Elkartea.

32.- Marx eta Bakunin. 1844 - 1876.

33.- 1865 : “Soldata, ordainsaria eta irabazia”:

34.- 1867 :  “Das Kapital”.

35.- “Alemaniako nekazarien gerra”.

36.- 1871 : “Gerra zibila Frantzian”.   

        Parisko Commune.

37.- “Etxebizitzaren arazoari ekarpena”.

38.- 1873 : osasun krisi larria

39.- 1875 : “Gothako programari kritika”.

40.- “Anti-Dühring”. 1878 - 1880.

41.-“Naturaren dialektika”. 1884.

42.- 1881 : Errusiako iraultza.

43.- Paradigma marxistaren sorrera.

44.- Jennyren heriotza.

45.- 1882 : munduan barna ibiltari.

46.- 1883 :  Marxen heriotza.

47.- 1885 : “Das Kapital”. Bigarren liburukia

48.-“Sozialismo utopikotik sozialismo 

       zientifikora”. 1880

49.-“Familia, jabetza pribatu eta  Estatuaren  

        jatorria”. 1884

50.- 1894 : “Das Kapital” Hirugarren liburukia.

51.- Engelsen heriotza.

52.- Paradigma marxistaren finkatzea.

53.- Bilana : Marx, Engels eta XXI. mendeko
        Komunismoa.