Filipe Bidart

 

 

Filipe Bidart: 

"Atzeman behar da aterabide bat presoentzat

 ahantzi gabe funtsezko arazoa,

 Euskal Herriaren egoera 

eta aterabide politikoa"

Felipe Bidart. Argazkia Bob Edme.

Filipe Bidart militante abertzalea izan da Ahoan Bilorik Gabe emankizuneko maiatzeko gomita. 

Euskal hedabideek hilabetero elkarrekin egiten dugun emankizunean Bidartekin mintzatu gara: "Baigorriko semea, euskalduna, irakaslea izana. Orain pixkat zahartua eta itzuli luze bat egin ondoan berriz etxera itzulia". Kanaldude, Euskal Irratiak, Ipar Euskal Herriko Hitza, Herria eta KAZETA.INFO-ko kazetarien galderei erantzunez Bidartek Euskal Herriko egoeraren inguruko azterketa egiten du historiari eta etorkizunari ere so eginez. 

Lehen atal honetan lekukotasun pertsonala egiten du aldi berean presoen egoera eta erronkak ere aztertuz. Bake prozezuari buruzko analisia egiten du, borroka armatuaren estrategiaren uztearen arrazoiak aztertuz eta desobedientzia zibilaren bide berriaren aldeko arrazoiak eskeiniz. 

Gai horien guztien inguruan Bidartek egin dituen adierazpen nabarmenen bilduma eta elkarrizketa osorik irakurtzen ahal da heldu den lerroetan.

Bidartek elkarrizketaren lehen bi ataletan Euskal Herriko egoeraren azterketa sakona egiten du, iraganari eta etorkizunari ere begiratuz.
Lekukotasun pertsonala egiten du Bidartek: "31 urtez aldaketa frango bizi eta jasan ditugu eta berriz itzultzean bada lan bat egiteko, Euskal Herria berriz ezagutzeko, ikusteko nola aldatua izan den, izan diren aldaketak eta harremanak berriz lotzeko".

Presoez hainbat adierazpen egin ditu: "Gaur egun oino segitzen dute militanteak arrestatzen, kondenatzen eta kondena dorpeak emaiten. Hori kezkagarria da, zeren eta horrek urruntzen du gero eta gehiago aterabidea eta zailtzen du bake bidea". Gaineratzen du: "Segitzen dute errepresionearen politikarekin, eta hori biziki kezkagarria da, jakinik biziko kondena zer den".

"Euskal presoek badute zantza hori, indar ikaragarria ahaide eta lagunen aldetik. Duten elkartasun hori, sentitzen den elkartasun horrek ematen die sekulako indarra, bainan kanpokoentzat biziki zaila da".

"Pentsatzen dut Frantses eta Espainol estatuak blokatzeko arrazoina eta bidea presoetan dutela". Hobeki azaltzen du estrategia horren muina: "Entsaiatzen dira mugatzea euskal arazoa euskal presoen arazora, eta euskal presoen arazoa deno ez dituzte funtsezko arazoak aipatzen aipatzen eta hori da manera bat sahiesteko egiazko eta funtsezko arazoa".

"Alde batetik atzeman behar da aterabide bat presoentzat ahantzi gabe funtsezko arazoa, Euskal Herriaren egoera eta aterabide politikoa".

Borroka armatuaren estrategiari eta estrategia aldaketari buruzko hainbat iritzi ere plazaratu ditu: "Borroka armatua abiatzea eta garatzea, baita Iparraldean ere, beharrezkoa zen Euskal Herriaren biziraupenerako"

"Bagenekien ondorio latzak izanen zirela, bai militantearentzat, bai mugimenduarentzat, bai Euskal Herriarentzat". "Nahiz eta jakin zein ondorio izanen zen beharrezkoa iruditzen zitzaigun, eta hortan sinisten dut beti".

"Garai batez beharrezkoa zen estrategia hori eramatea Iparraldean eta ene irudiko emaitza onak ekarri ditu eta orokorki egoera aintzinarazi du Iparraldean".


"Errepresioarengatik borroka armatua garatu da, beraz ez da errepresionearengatik borroka armatua gelditu baldin bada. Borroka armatua gelditu baldin bada izan da egoera aldaketagatik eta militanteen artean eta mugimendu barnean eztabaida hori geroz eta gehiago pausatu delakotz. Hausnarketa baten ondorioa izan da".

"Azken hamar urteetan zaku berean emanak izan dira borroka armatua eta terrorismoa. Horrek ondorioak izan ditu Euskal Herrian ere, baita mugimenduan ere. Horrek elementu bat gehiago ekarri du estrategia aldatzeko".

Bake prozeazuaren irakurketa egiten du Bidartek: "Gaur egun ez gara joaten gehiago enfrentatzerat, borrokarat, hausturararen egiterat, baizik eta entsaiatzen gara indarrak biltzea eta inahala geroz eta mobilizazio handiagoak egitea".

"Presoek nahi ez dutena da, eta hori argi da, bake hori izatea presoen askatzearen truk. Ez dira horretarako borrokatu, helburua ez da presondegitik ateratzea, helburua da Euskal Herria". 

"Presoek bat egiten dute prozezuarekin, Orduan presoei zer gehiago galdetzen ahal zaie? Kanpoan egin behar da indarra, ez da galde egin behar presoei, eguneroko borroka eramaten dute horiek"

"Behar dira helburu politiko horiek beti atxiki eta horiei buruz behar dugu segitu borrokan, borroka armaturik gabe". 

"Estrategia aldatzen dugu, baina helburuak beti hor dira. Gaur egun entsaiatuz inahala indar metaketa hori, herritarrak parte har araziz. Baita gurekin ados ez direnekin mintzatuz eta inhala elkartasun zabalena eginez".

"Ene ustez ETAk egin ditu aski urrats orain arte eta orain gizarteak eta Estatuek urrats batzuk egin behar dituzte. Beste urrats batzuk eginak izanen direlarik orduan negoziatzen ahalko da ETAren partetik beste urrats batzuk".

Bake prozezuaren estrategien baitan desobedientzia zibilaren inguruko iritzia ematen du Bidartek: "Borroka armatua baztertua izan dela eta ez da gibelerat egiterik. Baina borrokak segitu behar du, eta desobedientzia zibila bide egokia iruditzen zait, eta justuki orain bide berriak asmatu behar ditugu".

"Atxeman bide berri batzuk elkartasuna handitzen dutenak, bortizkeria baztertuz".

ELKARRIZKETA OSORIK (1. PARTEA)

1. atala lekukotasun pertsonala eta presoak Kanaldudek grabaturiko bideoa

Nola izan da itzultzea presondegian 19 urte pasa ondoren?  

Itzultzea ez da bakarrik presondegiarekin mugatu. Zazpi urtez izan naiz sasian. Gero 19 urtez izan naiz preso eta gero beste bost urte atzerrian. Itzuli horrek iraun du 31 urte, ondoren berriz itzuli naiz etxerat eta Euskal Herrirat agerian eta ofizialki.

Itzultzeak lehenik sekulako atsegina ekartzen du, eta bertzaldetik aldaketa frango izan dira Euskal Herrian, baita ene baitan ere. 31 urtez aldaketa frango bizi eta jasan ditugu eta berriz itzultzean bada lan bat egiteko, Euskal Herria berriz ezagutzeko, izan diren aldaketak eta harremanak berriz lotzeko. 31 urtez bada belaunaldi bat baino gehiago sortu dena eta beraz ezagutza guzti horiek egin behar dira eta ene herrian ene tokia atzeman. Ez da zaila, bainan egin behar den lan bat da eta denbora galde egiten du.

Gero eta gehiago dira zuk izan dituzun bezalako kondena luzeak dituzten pertsonak, hor dira Ion Kepa Parot, Txistor Haranburu eta Jakes Esnalen kasuak esaterako. Badira ere berrikitan auzitegian bizi osorako eman dituzten zigorrak. Nola ikusten duzu errealitate hori? Kezkatzen zaitu? Zer suposatzen du horrek? 

Bistan da kezkatzen nauela. Hori da ene arrangura handiena gaur egun, euskal presoen egoera eta ene nahikeri eta amets handiena hori da, euskal preso guztiak kanpoan izatea. Gaur egun oino segitzen dute militanteak arrestatzen, kondenatzen eta kondena dorpeak emaiten. Hori kezkagarria da, zeren eta horrek urruntzen du gero eta gehiago aterabidea eta zailtzen du bake bidea.

Zaila ikusten dut, ez dut nik gakorik egoera horren desblokeatzeko, ikusten da frantses estatuak dena blokeatua duela, ez duela deus ikusi nahi, ez duela deus negoziatu nahi, ez duela neurririk hartzen presoen alde, kontrakoa. Segitzen dute errepresionearen politikarekin, eta hori biziki kezkagarria da, jakinik biziko kondena zer den.

Familiei inposatzen zaien zigorra ere bada, presoak urrunduak dira Euskal Herritik. Ekonomikoki eta emozionalki bada karga bat. 

Bistan da hori. Sekulako pisua da mugimenduarentzat. Lehenik presoentzat, zaila da bizitzeko. Presoak militanteak dira, badakite zertarako engaiatu diren eta beraz jasaiten dute militante bezala errezki, baina eguneroko bizitzan zaila da bizitzea hori. Ez da ahantzi behar gizon emazteak direla, haien indar eta ahultasunekin.
Gero hurbilekoentzat, zeren eta badute beti kezka hori. Diren gastuak, sufrikarioak, bideetan arriskuak eta harremanetan zailtasun hori. Euskal presoek badute xantza hori, indar ikaragarria ahaide eta lagunen aldetik. Sentitzen den elkartasun horrek ematen die sekulako indarra, bainan kanpokoentzat biziki zaila da.

Mugimenduarentzat ere kezka hori bada. Pentsatzen dut Frantses eta Espainol estatuak blokatzeko arrazoina eta bidea presoetan dutela. Erran nahi dut, segitzen duteno errepresioarekin, eta presoak atxikitziz eta kondenak gero eta luzeago emanez, sahiesten dute funtsezko arazoa. Entsaiatzen dira mugatzea euskal arazoa euskal presoen arazora, eta euskal presoen arazoa deno ez dituzte funtsezko arazoak aipatzen eta hori da manera bat sahiesteko egiazko eta funtsezko arazoa.

Gaur egun aipatzen ditugu borrokaren ondorioak eta presoen egoera, presoak ematen dira aitzinean, egia da gure arrangura dela, eta izan behar da presoen egoerak eta presoen askatzeak, baina hori badakite eta horri emanen diogula lehentasuna eta hori aintzinean deno funtsezko arazoa baztertzen dute. Alde batetik atzeman behar da aterabide bat presoentzat ahantzi gabe funtsezko arazoa, Euskal Herriaren egoera eta aterabide politikoa.

Zure ustez balio zuen mementu batean borroka armatuaren alderen hautua egitea, jakinez zer sufrikario, zein ondorio pairatzen den, zuk erran duzun bezala, bai familiek, bai presoek. Zertarako balio zuen? 

Balio zuen, hortan ez da dudarik. Ez dut sekulan dudarik hortan beharrezkoa zela engaiatzea. Borroka armatua abiatzea eta garatzea, baita Iparraldean ere, beharrezkoa zen Euskal Herriaren biziraupenerako. 

Eta jakinez horrelako ondorioak izanen zirela, nahiz eta Iparraldean maila apaleko borroka eraman. Bagenekien ondorio latzak izanen zirela, bai militantearentzat, bai mugimenduarentzat, bai Euskal Herriarentzat.

Beharrezkoa zen borroka armatu hori abiatzea eta garatzea Iparraldean. 

Guk bereziki borroka eraman dugu Frantses estatuari buruz, beharrezkoa iruditzen zitzaigun borroka hori eramatea kontzientziak iratzartzeko Euskal Herriko arazo politikoa mahain gainean emateko eta aterabide batzuk proposatzeko, denbora berean Iparraldeko mugimendu abertzalea indartzeko. Nahiz eta jakin zein ondorio izanen zen beharrezkoa iruditzen zitzaigun, eta hortan sinisten dut beti. Iruditzen zait gaur egun hautu hori egin beharra zela, egin dugu eta ondorioak izan dira, emaitzak ere izan dira, Iparraldean euskal kontzientzia indartu da, abertzaletasuna indartu da, egitura batzuk azpiegitura batzuk ere gauzatu ahal izan dira. 

                 

 

Mugimendu horren, borrokaren inguruan, dinamika bat piztu da, eta dinamika horri esker garatu da mugimendua Iparraldean.

Garai batez beharrezkoa zen estrategia hori eramatea Iparraldean eta ene irudiko emaitza onak ekarri ditu eta orokorki egoera aintzinarazi du Iparraldean. Orain 30 urteren buruan, 40 urteren buruan, iruditzen zaigu ingurua aldatu dela, borrokari esker ere aldatu da, baldintzak aldatu dira, mugimenduak baditu beste tresna batzuk.

2000z geroztik borroka armatuaren estrategia baztertu dugu eta beste estrategia batean sartu gara. 

40 urtez beharrezkoa zen Euskal Herriko arazoa aipatzea eta aldarrikapenak mahain gainean ematea. Gaur egun aldarrikapen horien inguruan bada kontzientzia bat indartu dena, geroz eta jende gehiagok aldarrikapen horiek sustengatzen ditu Iparraldean eta gaur egun behar dugu beste etapa batera pasatu, eta eraiki behar ditugu gure eskakizun horiek.

2. partea Bake prozezua eta konponbidearen gaiari lotua. Ikusi Kanaldudek egin duen bideoa 

Estrategia aldaketa aipatu duzu, zer da aldatu dena hori emateko? 

Aldatu dena izan da euskal kontzientziaren garatzea, hedatzea. Euskal kontzientziak hartu du sekulako indarra lehengo egoeraren aldean. Konkretuki parte hartu dut abertzaleen bilkuretan baita abertzale mugimendutik haratagoko biltzarretan eta Iparraldeko arduradun politiko guztiak biltzen dituen bilkuretan, eta harritu naiz, entzutearekilan edozein alderdikoak izanik ere, nola mintzatzen diren Euskal Herriaren alde, Euskal Herriko instituzioaren alde, salatuz Pariseko jakobinismoa, eta galde eginez herri kontsulta bat, eta galde eginez Herria bere gain jar dadin, galde eginez ere mobilizazioak, galde eginez manifestazioa Pariseri galde egiteko erakunde berezi bat, eta horrek erakusten du funtsezko aldaketa bat izan dela azken hamarkada honetan.

Kontzientzia hartze bat izan da eta horrek erakusten du aldaketa hori, eta aldaketa horregatik beharrezkoa izan da abertzaleen aldetik ere bere jokamoldean aldaketa, horrek ekarri du estrategia aldaketa. Gaur egun ez gara joaten gehiago enfrentatzerat, borrokarat, hausturararen egiterat, baizik eta entsaiatzen gara indarrak biltzea eta inahala geroz eta mobilizazio handiagoak egitea, eta herritar gero eta gehiago mobilizatuz eta parte har araziz mugimenduan, gure eskakizun horiek erdiesteko.

Prozezua nolabait abiatzen da alde bateko deliberoarekin, presondegietan ere gogeta sakona da. Bi elemendu dira hor, batetik nola eman den eztabaida hori preso kolektiboaren baitan bake prozezu horri buruz abiatzeko? Bigarrena bake prozezuaren baitan zein izan behar den presoen ekarpena? 

Orain arte uste dut presoek ekarpen handia egin dutela, eta bereziki presoek sostengatu dutelarik estrategia aldaketa eta bake bide hau.

Ez da gauza berria, ni oroitzen naiz preso nintzelarik bagenituela horrelako eztabaidak gure artean. 

Oroitu behar da Iparraldean, Iparretarrak borroka armatuaren estrategia utzi zuen duela 10 urte baino gehiago, 2000. urteko inguruan. 

Baina beti gelditzen zen, Hegoaldeko estrategia edo borroka armatua eta eztabaida horren inguruan zen.

Presondegian izan Iparraldekoak edo Hegoaldekoak denak euskaldunak gara eta elgarrekin gara, eta elgarrekin mintzatzen gara Euskal Herriaz. Parte hartu dut eztabaida horietan beste euskal presoekilan. Eztabaida horiek aspaldikoak dira, badu 10 urte baino gehiago hortaz hitz egiten dugula mugimenduan, militanteen artean eta presoen artean.

Presoek nahi ez dutena da, eta hori argi da, bake hori izatea presoen askatzearen truk. Ez dira horretarako borrokatu, helburua ez da presondegitik ateratzea, helburua da Euskal Herria. Eztabaida guztia horren inguruan dira, presoek nahi dutena da funtsezko arazo politikoa mahai gainean pausatua izan dadin.

Militanteek, nahiago dut aipatzea militanteak, zeren ez da mugatu behar, ez gara preso eta preso ohiak, militanteak gara. 

Haien kezka gure kezka da, helburu politiko horiek ez direla utzi behar erortzea. Behar dira helburu politiko horiek beti atxiki eta horiei buruz behar dugu segitu borrokan. Borroka armaturik gabe, baina beti borrokatuz, behar da mobilizatu, behar da segitu barnean borroka politikoa eramanez.

Ez da uste behar Madrilek eta Parisek horrela egiten utziko dutela. Nahiko lukete beti helburu politikoak ahantzi eta bakarrik ondorioetara joan eta presoak askatu, banazka banazka eta hortan luzatu eta ahantzi aterabide politikoa. Beraz presoen kezka da aterabide politikoak ez direla ahantzi behar eta borroka segitu behar dela, beste gisan uste dut denak ados direla.

Estrategia aldatzen dugu, baina helburuak beti hor dira. 

Gaur egun entsaiatuz inahala indar metaketa hori, indarrak bilduz, gero eta gehiago herritarrak parte har araziz. Baita gurekin ados ez direnekin mintzatuz eta inhala elkartasun zabalena eginez. Orain arte presoen ekarpena hori izan da, eta ez dakit hori baino gehiago egiten ahal duten, erratea: "ados gara abiatu den bide horrekilan, nahiz eta gu preso izan eta ados gara aldaketa horrekin eta ez ditzagun ahantz helburu politikoak eta segi dezagun helburu politikoei buruz beste bidekilan".

Presoek nahiz eta ikusi preso gehiago badela, arrestatzeek segitzen dutela, kondenek segitzen dutela, ez dutela deus egiten presoak hurbiltzeko, ezta eri diren presoak askatzeko, ezta kondena bete duten presoak askatzeko, hala ere presoek segitzen dute estrategia berria sostengatzen. 

Bistan da, badira beti eztabaidak, kritikak eta hori, baina orokorki sostengatzen dute. Orduan presoeri zer gehiago galdetzen ahal zaie? Kanpoan egin behar da indarra, ez da galde egin behar presoei, eguneroko borroka eramaten dute horiek. Ez zaie gehiago galde egin behar, aski da galde egitea gose grebak egitea! Lana hemen Euskal Herrian egin behar da eta entsaiatu behar da hedatzea, Euskal Herritik kanpo ere gure borroka eta gaurko gure bake bide hori, ezagutarazi internazional mailan eta Europan, Parise eta Madrile pixka bat bortxarazteko neurri batzuen hartzera.


Borroka armatuaren estrategia gaur baztertua dela diozu, badira desobedientzia zibileko mugimendu batzuk, hala nola Donostian eta Ondarroan izan diren herri harresiak eta Aske Guneak. Zer diozu ekin molde berri horretaz? 

Hori arrunt baikorki ikusten dut, hori da bidea. Borroka armatua baztertua izan dela eta ez da gibelerat egiterik. 

Baina borrokak segitu behar du, mobilizazioek segitu behar dute, manifestazioek segitu behar dute. Lanean segitu behar dugu eta desobedientzia zibila bide egokia iruditzen zait, eta justuki orain bide berriak asmatu behar ditugu. Eginmoldeak asmatu, gero eta jende gehiago mobilizatzeko. Nola jokatu hemengo egoera ezagutarazteko, aiparazteko komunikabideetan, eta ez bakarrik Euskal Herrian, baina kanpoan ere Frantses estatuan, Espainiar estatuan baita Europan ere.

Europan ere ezagutarazi behar dugu egoera hau eta nire ustez ez dugu aski indar egiten, behar gara pixka bat ireki eta erakutsi ere nor garen eta besteak bezalako gizakiak garela. Euskal Herria ezagutua bada, errespetatua bada, egoera anitz hobea izanen da.

Zuk aipatzen dituzun gertakari horiek baikorrak dira, izan zen Baionan ere Aurore Martinen sostenguz eta defendatzeko horrelako mobilizazio sendo bat izan zen ere. Horrelako egitateak biderkatzea bide egokia da. Hor uste dut mugimenduak, militanteek eta euskaldunek behar dugula irudimena landu pixkat, bide berriak urratu. Atxeman bide berri batzuk elkartasuna handitzen dutenak, bortizkeria baztertuz. Baina kasu, desobedientzia zibila bide zaila da. Egin duten bezala, hor karrikan jartzea eta kaskak hartzea arraposturik eman gabe, horretarako indartsua izan behar da. Prest izan behar da, eta jakin behar da ondorioak nolakoak izanen diren, hor ere.

Estrategia aldaketa aipatzen duzu behin eta berriro, aldaketa hori ez ote da jin ahuldade baten ondorioz. Eta ez ote da berant etorri aldaketa hor? 

Hori da erraten dena, ene ustez ez. Gure herria gai izan da borroka armatuaren eramateko, bi borroka armatu eramateko ere gai izan da. Mementu batez pausatu da bai Iparraldean, bai Hegoaldean, ea bide hori segitu behar zen edo ez. Beno, hastapenetik pausatzen da galdera hori, betiko galdera da hori mugimenduan, militanteen artean. Berrogei urteko mugimenduaren ondoan argi dago baldintzak aldatu direla. Egoera aldatu baita egia da, galdera horiek gero eta zorrotzagoak direla, gero eta gehiago pausatu dela, eta eztabaida hori gero eta azkarragoa izan delarik mementu batez deliberatu da hobe zela borroka armatua uztea, ados ematea.

Ez al da egin indarraren ondorioz izan? Ez al da Estatuen garaipen bat? 

Ez, ez da errepresioarengatik. Ni konbentzitua naiz ez dela horretagik izan, borroka armatua hasi dugularik, eta hasi dutelairik Hegoaldean, zeintzun ziren baldintzak? Hamar pelatu ginen armarik gabe eta bi estaturen kontra. Eta bagenekien zein ondorio izanen zen, eta bazen tortura eta tiroketak. Zenbat hil izan dira militanteen artean? Errepresioarengatik borroka armatua garatu da, beraz ez da errepresionearengatik borroka armatua gelditu baldin bada.

Borroka armatua gelditu baldin bada izan da egoera aldaketagatik eta militanteen artean eta mugimendu barnean eztabaida hori geroz eta gehiago pausatu delakotz. Horrek ekarri du militanteen biltzeko zailtasunak ere. Baina borroka armatuaren gelditzea ez da jin ahultasun batengatik, izan da gogoeta eta ausnarketa baten ondorioa. Gaur egun Euskal Herrian baldintzak aldatu dira, gero eta gehiago borroka armatuaren beharra zalantzan da, eta mementu batez gehiengo batek erran du hobe zela uztea.

Bada beste elementu importanta bat ere kontuan hartu behar dena. 2000. urtearen inguruan mundu mailan izan diren gertakariak eta komunikabideetan aipatzen duten terrorismoaren fenomeno hori, bereziki islamistekin, egiazko terrorismoa egiten dutenak. Bonba bat ematen delarik nonahi hiri batean eta zibilak nolanahika erahiltzen direlarik eta ehunka eta milaka. Bonbak pausatzen direlarik horrela, nonahi hori egiazko terrorismoa da, ez du deus ikustekorik borroka armatuarekin. Bainan komunikabideetan bada nahasketa bat terrorismoa eta borroka armatuaren artean.

Guk askatzeko erabiltzen dugun borroka armatua arrunt ziblatua da, jomuga bereziekin eta kasu eginez ez dadila bazterreko inor hunkia izan, horrek ez du deus ikustekorik terrorismoarekin. Bada nahasketa bat hor, eta hastapenetik gu zikindu nahi izan gaituzte. Hori estatuen jokoa da, ukatu nahi baitute hor badela arazo politiko bat, borroka bat eramaten dela hor funtsezko arazoekin, eta hori sahiezteko erraten dute "horiek terroristak dira kasu egizue". Jendeari sinestarazten diote borroka armatua egiten dutenak terroristak direla eta gizartearen kontra direla eta nornahi hiltzeko kapazak direla.

 

Azken hamar urteetan zaku berean emanak izan dira borroka armatua eta terrorismoa. Horrek ondorioak izan ditu Euskal Herrian ere, baita mugimenduan ere. Mementu batez horrek elementu bat gehiago ekarri du dudan emateko borroka armatua. Ea zein ondorio ekartzen zituen. Azkenean erabakia hartua izan da, estrategia aldatzea.

Aieteko adierazpenaren ondoren jin dira Baionako eta Hegoaldeko Bake Foroa. Laster Baionan Bake Foroaren beste parte bat egin behar da. Zure ustez zein da bake foro horiek ekarpena eta garrantzia?
 

Bake Foroaren helburua da bake prozezua ezagutaraztea Euskal Herrian berean eta kanpoan ere. Manera bat da ere ezagutarazteko euskaldunei beste tokietan izan diren bake bideak eta nolako desmartxak izan diren, ze baldintzetan eramanak izan diren eta nola hortik atera ondorioak ikusteko Euskal Herrian nola eraman daiteken. Manera bat da ere sostengua bilatzeko Euskal Herritik kanpo, internazional mailan ere ezagunak diren pertsona batzuen sustengua biltzeko, ezagutzeko eta erakusteko.

 

Politikariek behin eta berriro galdetzen dute ETA desagertzea, baina IK ez da ofizialki desagertua. Zure ustez ETAk desagertu beharko luke? Eta estatuek zer eginen dute jakinik ate guztiak etxiak direla gai horretan? 

Uste dut ETAk gauza anitz egin dituela bake bide hori abiarazteko eta aintzinatzeko. ETAk orain, ETA bezala, ez du desagertzerik, erabaki du borroka armaturik ez egitea, eta ez du egiten.

 Frogatua da erabaki hori atxikia dela eta erabaki hori itzulezina dela, eta iraunkorra dela. 

Hortik harat zer eskatzen ahal zaio? ETAri geroz eta gauza gehiago eskatzen zaizkio, armak itzultzea, desagertzea… Baina ene ustez ETAk egin ditu aski urrats orain arte eta orain gizarteak eta Estatuek urrats batzuk egin behar dituzte.

Beste urrats batzuk eginak izanen direlarik, edo egiteko prest agertzen badira, orduan negoziatzen ahalko da ETAren partetik beste urrats batzuk. Baina ez zait bidezkoa iruditzen ETAri galdetzea gero eta gauza gehiago estatuek bere aldetik deus egiten ez dutelarik, eta kontrakoa, errepresioan segitzen duteno. Hori ez zait, ez egokia, ez zuzena iruditzen.

Estatuak goxoan dira egoera honetan, ala ez? 

Estatuak goxoan agertzen dira, nahi dute sinestarazi ETA horretara ailegatu baldin bada errepresioarengatik izan dela, eta hori ene irudiko ez da batere horrela. 

Sinitsarazi nahi dute errepresioarekin segitu behar dela, baina hori sinistaraztea interesatzen zaie, justu funtsezko arazo politikoa ez aipatzeko

Goxoan dira mementuan, baina estrategia berri hau garatzen badugu Frantses eta Espainol estatuak ez dira gehiago goxoan izanen. Zeren eta Euskal Herriko arazoa, eta Frantses eta Espainol estatuek Euskal Herrian pausatzen duten arazoa gero eta ezagutuagoa izanen da. Europa maila ezagutarazi behar dugu eta horrela estatuak ez dira gehiago goxoan izanen, eta beharko dute aterabide bat atzeman eta beharko dituzte beraien aldetik ere urrats batzuk eman, eta bide batzuk hartu.

BRIAN CURRIN

 

BRIAN CURRINek: 

"ETA ez da indarkeriara itzuliko, baina zatiketak izan litezke"

 

 

Jon Torner Zabala

2013-05-20 

Brian Currin abokatu eta Harremanetarako Nazioarteko Taldeko (HNT) kidea elkarrizketatu du Público egunkariak. 

ETAren barruan gerta litekeen zatiketari dagokionez, argi utzi du berak ez duela halakorik aurreikustera eraman gaitzakeen inolako informaziorik. "Beste leku batzuetan gertatu izan delako diot".

Armak entregatzeari dagokionez, alde guztien arteko konpromisoa behar dela dio abokatu hegoafrikarrak, Espainiako eta Frantziako gobernuena barne.

Hain justu, gobernuen immobilismoaz luze mintzo da Currin. Harremanetarako Taldeak bi gobernuekin inolako harremanik ez duela dio. "Ez dira haien esku zegoena egiteko prest agertu", dio. "Barne-mailako ekimen miresgarriak ere izan dira, Ipar Euskal Herrian abian jarritakoak adibidez".

Bere hitzetan, PPren eta PSOEren estrategien artean desberdintasun gutxi dago: "Badirudi estrategia bera dutela, ez kolaboratzearen estrategia. Horrekin lan egiteko modua aurkitu behar dugu. Onartu behar dugu hori dela haien lan egiteko era, eta errealitate hori onartuta aurkitu behar dugu aurrera egiteko modua".

Currinek dio bake prozesua "posible" dela orain, baina aurrera egiteko gobernuek esku hartze handiagoa izan behar dutela.

"Bake prozesuak ez du arrakastarik izango, baldin eta presoen auzia aintzat hartzen ez bada", gaineratu du. "Alde guztiak adostasunera heldu behar dira, presoen auzian akordioa lortze aldera. Arrakasta lortu duten beste prozesu batzuetan hori gertatu da".

Datorren astean Euskal Herrian izango dira HNTko kideak. "Prozesuak bizi duen geldialdia nola hautsi eta Madrilen eta Parisen jarreraz gaindi nola lan egin eztabaidatuko dugu", adierazi du Currinek.

PRESO POLITIKORIK EZ DAGO ALDEBAKARTASUNAREN LURRALDE MIRESGARRIAN

 

"THE

 WONDERFUL

BASQUE

PEACE

PROCESS"

PRESENTS:

 

PRESO POLITIKORIK

 EZ DELA

  ONARTU DU

  EUSKO LEGEBILTZARRAK

 

Espainian eta EAEn

 preso politikorik ez dagoela

 dioen testua babestu dute PSE, PP eta UPDk; 

EAJren abstentzioari esker onartu da

EH Bilduk esan du

 «kriminalizazioaren» bidea

 zabaltzen duela onartutako ebazpenak

 

 

PPk, PSEk eta UPDk bozkatu dute Espainian eta Euskal Autonomia Erkidegoan preso politikorik ez dela dioen legez besteko proposamenaren alde; abstenitu egin da EAJ, eta aurka bozkatu du EH Bilduk.

Berria.info   2013-05-16 - 12:26:20

Aurrera egiteko, zail

Eusko Legebiltzarrak 'preso politiko' esapideaz eztabaidatuko du gaurko osoko bilkuran, PPk aurkeztutako legez besteko proposamenaren bidez. Espainian preso politikorik ez dela ebatzi nahi du PPk, baina zail izango du adierazpenak aurrera egitea; alderdi guztiek aurkeztu dizkiote osoko zuzenketak PPren proposamenari.

Laura Mintegi EH Bilduko legebiltzarkideak martxoan adierazi zuen Fernando Buesa buruzagi sozialistaren hilketak "jatorri politikoa" izan zuela eta hilketa guztiak "ekidin" zitezkeela, "jatorri politikoa dutelako eta gizartearen, pertsonen eta politikarien esku dagoelako". Hitz horiek sortutako eztabaidaren harira egingo dute gaurko eztabaida.

Eztabaida legebiltzarreko bake eta bizikidetzari buruzko lantaldera eramatea proposatu du EAJk, iritzita "lehentasunezkoa" dela "oinarrizko adostasunak" lortzea. EH Bilduk, berriz, eskatu du Amnesty Internationalek 'preso politiko' esapideaz egiten duen definizioa bere egitea legebiltzarrak.

PSE-EEk aurkeztutako zuzenketan dio Espainia "estatu demokratikoa den heinean" herritarren eskubide eta askatasunak defendatzen dituela eta, beraz, "preso politikorik ez dela". Adiera hori erabiltzea delitu izatea proposatu du, berriz, UPDk, eta Espainiako Zigor Kodean "krimen terroristen ukazioa" txertatzeko eskatu du.

1. 10:27
   Eusko Legebiltzarraren gaurko osoko bilkuraren hirugarren puntuan eztabaidatuko dute preso politiko esapideaz.
2. 10:34
   'Euskal Legebiltzar Talde Popularrak egindako legez besteko proposamena, zuzenbide- estatuaren eta gizarte demokratikoaren defentsa egiteko' du izena Alderdi Popularrak aurkeztu duen testuak. Hainbat osoko zuzenketa aurkeztu dizkiote, EAJk, EH Bilduk, PSEk eta UPDk bakoitzak bana.
3. 10:36
   EH Bilduko parlamentari gehienak 'Herri harresia aurrera' leloa duten kamisetekin joan dira Legebiltzarrera.
4. 11:10
   Hasi da 'preso politikoak' esapideari buruzko eztabaida.
5. 11:13
   Borja Semper (PP): "Beharrezkoa da baztertzea egiatik urruntzen gaituena. Lotsagarria da hiltzaileei preso politiko deitzea".
6. 11:15
   Borja Semperrek (PP) dio presoak ez direla "preso politikoak", baina biktimak "biktima politikoak" direla.
7. 11:20
   Gorka Maneiro (UPD): "Lotsagarria eta onartezina da ETAko presoei 'preso politiko' deitzea. Onartezina da legebiltzar honetan EH Bilduri 'preso politiko' esapidea erabiltzen uztea".
8. 11:25
   Maneirok uste du PPren proposamena "motz" geratzen dela eta "mesprezu politikoaz" gain delitu izan behar dela "preso politiko" adiera. Espainiako Zigor Kodean "delitu terroristen ukazio" delitua gehitu nahi du.
9. 11:28
   Julen Arzuagak (EH Bildu) dio "inolako justifikazio edo zurikeriarik gabeko definizioa" ematen duela Amnistia Internazionalak. Definizio hori proposatu du koalizioak.
10. 11:35
    Presoen motibazioa, ondorioak, trataera, zigorra, espetxean ezarritako neurriak eta abar politikoak direla adierazi du Arzuagak (EH Bildu). "Iritzi askatasuna eta haren ondorio zuzena den adierazpen askatasuna" aldarrikatu du, eta galdetu du ea nor den PP besteei esateko zein hitz esan behar dituzten.
11. 11:37
    Rodolfo Ares (PSE): "Ez dago preso politikorik, zuzenbide estatu bat eta demokrazia ditugulako". Gogorarazi duenez, Europako Batzordeak iaz esan zuen "delitu terroristak" egin dituztenak ezin direla "preso politikotzat" jo.
12. 11:43
    Aresek, EH Bilduri: "Ezingo duzue historia berridatzi". Esan du ideia guztiak defenda daitezkeela era baketsuan bada, eta horri esker dagoela EH Bildu legebiltzarrean.
13. 11:48
    Maribel Vaquerok (EAJ) galdetu du zein ekarpen egiten dion gaurko eztabaidak bizikidetzari. Gaia Bake eta Bizikidetzaren Batzordean landu behar dela defendatu du, "titular ez eraikitzaileak" bilatu beharrean.
14. 11:53
    Maribel Vaquerok (EAJ) Nazio Batuen Erakundearen irizpideen alde egin du: "Ez dira kontzientzia presoak edo preso politikoak, helburu politikoak dituzten presoak dira".
15. 11:56
    Borja Semperrek (PP) Arzuagari esan dio EH Bilduk "arazo bat" duela presoekin eta koalizioarena dela arazo hori. "Ezin dugu onartu justifikatzeko asmoz "politiko" abizena jartzea".
16. 11:59
    "Minduta" dago Semper (PP) EAJren jarrerarekin, "omisioz", onartzen duelakoan Espainian preso politikoak daudela. "Bortxatzaile bat zer da, motibazio sexual okerra duen presoa?".
17. 12:02
    Gorka Maneirok (UPD) EH Bilduri: "Zuek zarete legebiltzar honen lotsa". Koalizioa legezkoa izatea ere lotsagarria dela esan du. Arrazismoarekin eta emakumeei botoa kentzearekin alderatu du 'preso politiko' adiera defendatzea.
18. 12:04
    Gogoeta egiteko eskatu die Maneirok (UPD) Urkulluri eta EAJri, eta EH Bildurekin bat egitea egotzi dio. "Zuek demokratak zarete; esan behar duzue preso politikorik ez dela".
19. 12:10
    Julen Arzuagak (EH Bildu) gogorarazi du Amnistia Internazionalak espetxe politika aldatzeko eskatu zuela, eta Torturaren Prebentziorako Europako Batzordeak baieztatu duela inkomunikazioa eta torturak izan direla.
20. 12:12
    Aresek (PSE) Arzuagari: "Denak ez gara berdinak. Ni demokrata naiz, eta zuk bidea egin behar duzu izateko".
21. 12:30
    Bozketa: UPD, PP eta PSE, proposamenaren alde; EAJ abstenitu egin da, eta kontra bozkatu du EH Bilduk. 27 boto lortuta, aurrera egin du ekimenak.
22. 12:31
    Legebiltzarrak onartu duen ebazpenak dio preso politikorik ez dagoela ez EAEn ez Espainian, ideia politikoak askatasunez defendatu daitezkeela legediaren barruan baldin bada, eta Espainia Zuzenbide Estatu bat dela, non herritarren eskubideak eta askatasunak babesten diren.
    

    

    
    

    Preso politikoak kontzeptua erabiltzea eragozteko urratsa egin du Eusko Legebiltzarrak. PPk eraman du gaia osoko bilkurara, PSEk eta UPDk bat egin dute proposamenarekin, eta EAJren abstentzioari esker aurrera atera da legez besteko proposamena. Euskal Herriko eta Espainiako kartzeletan preso politikorik ez dagoela eta «eskubideak eta askatasunak erabat bermaturik» daudela dio Eusko Legebiltzarrak onartutako ebazpenak. EH Bildu taldeak baino ez du kontrako botoa eman. Onartutako testua, berez, adierazpen politiko hutsa da, baina EH Bilduk ohartarazi duenez, etorkizunean preso politiko esapidearen «kriminalizazioa» ahalbidetu dezake, eta, beraz, ondorio judizialak izan ditzake hitz hori erabiltzeak.
    
    Legebiltzarrean izandako eztabaidaren jatorria martxoan izandako osoko bilkura batean dago. Laura Mintegi EH Bilduko legebiltzarkideak orduan adierazi zuen Fernando Buesa buruzagi sozialistaren hilketak «jatorri politikoa» izan zuela eta hilketa guztiak «ekidin» zitezkeela, «jatorri politikoa dutelako eta gizartearen, pertsonen eta politikarien esku dagoelako». Hitz horiek sortutako polemikaren harira eraman du PPk preso politiko kontzeptua erabiltzearen aurkako proposamena osoko bilkurara.
    
    PPk eta PSEk hitzartutako erdibideko zuzenketak aurrera egin du azkenean. Bi talde horien eta UPDren 27 boto lortuta, legebiltzarrak ebatzi du, «irmotasun osoz», Espainian eta Euskal Autonomia Erkidegoan ez dela preso politikorik, ETAko presoak izendatzeko esapide hori erabiltzea arbuiatu du, eta azpimarratu du ideia politikoak defendatzeko arazorik ez dagoela legeen arabera baldin bada, eta Espainia zuzenbide estatu bat dela, non herritarren eskubideak eta askatasuna babesten diren.
    
    Eztabaidan, preso politiko esapidea erabiltzearen aurkako argudioetan bat egin zuten PPk, PSEk eta UPDk, bai eta EH Bilduren aurka jotzeko orduan ere. Diskurtso gogorrena UPDk erabili zuen, adiera hori erabiltzea delitu izatea proposatu baitzuen Gorka Maneirok. Haren ustez, «onartezina eta lotsagarria» da preso poliko esatea, baina areago EH Bilduri esapide hori erabiltzen uztea. Maneiroren ustez, PPren proposamena «motz» geratzen da, eta Espainiako Zigor Kodeak «delitu terroristen ukazio delitua» jaso beharko luke.
    
    Borja Semper PPkoak, berriz, adierazi zuen «ETAko presoei» izaera politikoa ematea «iraina» dela gizarte demokratikoentzat, eta «lotsagarria» dela horrela deitzea «hilketak» egin dituztenei. Preso politikorik ez dagoela baina ETAk eragindakoak «biktima politikoak» direla esan zuen. Semperren ustez, EH Bilduk «arazo bat» du presoekin, eta «politiko» abizena erabiltzen du «bere aurpegia zuritzeko asmoz». Halaber, jeltzaleek proposamenaren aldeko botoa eman ez izana gaitzetsi zuen, iritzita jeltzaleek «omisioz» onartzen dutela preso politikoak daudela.
    
    Bide beretik aritu zen Rodolfo Ares sozialista: «Hemen ez dago preso politikorik, zuzenbide estatu bat eta demokrazia ditugulako». Gogoratu zuen Europako Batzordeak iaz esan zuela «delitu terroristak» egin dituztenak ezin direla «preso politikotzat» jo. Eta EH Bildukoei ere ohartarazi zien oraindik bide asko dutela demokratak izateko eta ezin izango dutela «historia berridatzi».

    
    
    Ez alde, ez kontra
    
    Jeltzaleek, berriz, eztabaida legebiltzarreko bake eta bizikidetzari buruzko lantaldera eramatea proposatu zuten, uste dutelako «lehentasunezkoa» dela «oinarrizko adostasunak» lortzea. Hala, PPri eta UPDri lantaldera batu daitezen dei egin zien Maribel Vaquero legebiltzarkideak, eta lantaldetik kanpo «eztabaida antzuak» elikatzen jarraitzeari uzteko eskatu zien.
    
    Jeltzaleak Nazio Batuen Erakundearen irizpideen alde egin zuen preso politiko kontzeptua erabiltzeko orduan: «Ez dira kontzientzia presoak edo preso politikoak, helburu politikoak dituzten presoak dira».
    

    

    
    Osoko bilkuran abstentzioaren alde egin arren, ondoren Joseba Egibar jeltzaleak aitortu zuen «atzerapausoa» dela PP eta PSEren ebazpena aurrera atera izana. Izan ere, esan zuen PPk lantaldean parte hartzea baino nahiago duela zenbait gairekin komunikabideetan «oihartzuna» lortzea.
    
    EH Bildurentzat ere «atzerapausoa» da onartutako ebazpena, «ideien kriminalizazioari» ateak irekitzen dizkiolako, bai eta etorkizunean ondorio juridikoak izateko aukera zabaltzen duelako ere: «Auzitegi Nazionalean eta Gorenean hona begira daude, frankotiratzaileak bezala, errepresio judizialean sakontzeko prest». Jeltzaleen abstentzioa «oso larritzat» jo zuen Julen Arzuaga EH Bilduko legebiltzarkideak, eta «ahulezia politikoa» leporatu zien PPren eta PSEren «joko arduragabean» sartzeagatik.
    
    Preso politikoez hitz egitea debekatu nahian PPk, PSEk eta UPDk iritzi eta adierazpen askatasunak urratu nahi dituztela salatu zuen Arzuagak, eta Amnesty Internationalek preso politiko esapideaz egiten duen definizioa bere egitea proposatu zion legebiltzarrari.
    
    Bizkaian, beste horrenbeste
    
    Bizkaiko Batzar Nagusiek ere antzeko proposamen bat onartu zuten atzo, PPren ekimenez. Espainiako Estatuan preso politikorik ez dagoela dioen ebazpena babestu zuten PPk eta PSEk, EAJ abstenitu egin zen eta Bilduk kontrako botoa eman zuen.

     

    

    
    
    
    
    
    
    
     

PNV EUSKAL HERRI LANGILEAREN ETSAIA

BURGESIA BASKOA

EUSKAL LANGILERIAREN ETSAIA DA,

OLIGARKIA

 ESPAINOLISTA ETA NEOFRANKISTAREN

MORROIA,

KAPITALISMOAREN ZERBITZARIA,

INPERIALISMOAREN ZAKURRA!!! 
 

EZ DUZU SINESTEN? BEGIRA!

 

ASKE GUNEA

Urtza Alkorta atxilotu dute ertzainek

Gutxienez 30 furgoneta eraman dituzte Ondarroara. 06:30 aldera iritsi dira poliziak Aske Gunera, eta 08:00 inguruan hasi dira jendea ateratzen. 10:00 aldera hartu dute atxilo Alkorta, polizia operazioa hasi eta hiru ordu baino gehiagora.

Ertzaintza gaur goizaldean joan da Ondarroara Urtza Alkorta atxilotzera. Goizeko seirak inguruan entzun da turruna, eta zazpiak aldera ailegatu dira 30 furgonetatik gora, eta Ondarroako Alamedan zeuden herritarrek harresia osatu dute zubian, Alkortaren inguruan. Ertzaintzaren itsasontzi bat ere bertan da.

Ehunka lagun elkartu dira Alkorta babesteko, eta poliziek inguratuta dute zubia. "Ez gaituzue geldituko", "Zuek hil zenuten Iñigo Cabacas" eta beste lelo batzuk oihukatzen ari dira zubian batutakoek. EH Bilduko legebiltzarkide Maribi Ugarteburu, Laura Mintegi eta Unai Urruzuno Aske Gunean dira. "Euskal jendartearen eskariari kasurik egin ez, eta Espainiari men eginez polizia bidali du EAJk", esan du Ugarteburuk Info7 irratian eginiko elkarrizketa batean.

 

Hain justu, atxilo hartzearekin mehatxu egin dio ertzain batek Ugartebururi, hura aforatu txartela erakusten ari zitzaion bitartean. "Berdin dit zer zaren, hurrengoan atxilotuta zatoz", esan dio.

Bost ohartarazpen

Bost aldiz ohartarazi die Ertzaintzak protestan ari direnei Alkorta atxilotzera doazela, "Auzitegi Nazionalak igorritako aginduak betez". Elkarretaratzean jarraitzen dutenek erantzukizun penalak eta administratiboak izan ditzaketela adierazi die Ertzaintzak.

 

Minutu batzuk geroago hutsarazi dute Alamedan ezarri duten karpa, eta zortziak aldera hasi dira jendea ateratzen. Ordu erdi igaro ostean hasi dira eskaileratik jendea ateratzen. Ondarroako alkatea izan da aterarazi duten lehenetako bat, eta besoetatik eta hanketatik tiraka ari dira poliziak. Zauriak artatzeko materiala kendu egin diete erizaintza lanetan ari direnei.

Banan-banan atera behar izan dituzte Alkorta babesten ari zirenak. Besoetatik, hanketatik eta iletik tiraka eraman ditu Ertzaintzak hainbat pertsona, eta kolpe ugari eman dizkie. Zubia hutsarazten hasi eta bi ordura iritsi dira Alkortarengana, eta atxilo hartu dute.

Tentsio uneak izan dira hurrena, Alkorta eramaterakoan. Furgonetei bidea eragotzi diete hainbat herritarrek, eta furgonetetatik irten eta oldartu egin zaizkie ertzainak. Egoera baretu, eta joan egin dira poliziak, Alkorta atxilo hartuta.

Urtza Alkorta azken minutuetan zutik egon da Ertzantzari erabiltzen ari den indarkeriagatik kargu hartuz. 

10etarako arrastaka eraman dute. Bideo garrantzitsuenak Lander Arbelaitzen blogean. Maite Bidartek Info 7n azaldu duenez, Beñat Apalategi Donostian AskeGuneko bozeramaile aritu zena belarrietatik tiraka eraman dute, furgoian atxilo. 

Streaming bidez zuzenean ematen ari da Lea-Artibai eta Mutrikuko Hitza eta irratiz Info7 irratia.  8:34ean ertzain batek Maribi Ugarteburu parlamentaria mehatxatu du: "Berdin zait zer zaren, hurrena atxilotuta joango zara". Laura Mintegik horren gainean Info7n adierazi du: "Goizeko 6etan deitu dit Beltran de Herediak esanez euren kontsigna biolentziarik eza zela. Ezin dituzte kontrolatu bere ertzain guztiak, batzuk saiatzen ari dira gauzak behar bezala egiten baina beste batzuk ez". 

Urkulluri zuzendu zaio: "Hausnarketa sakona egin behar duela eta behingoz erabaki noren polizia den, euskal polizia edo espainiar poliziaren adar bat. Euskal herritarrak Madrilera eramango dituena. Erabaki dezala nori zor dioten leialtasuna". AskeGuneaz esan du "Inflexio puntua markatu duela. Herri hau esaten ari da ez duela onartuko eskubide urraketarik". 

 

DONOSTIAKO ASKE GUNEko

HANKA SARTZE BERA ERREPIKATZEN:

ORAINGO EZKER ABERTZALEA

BURGESIAREN

  TXOTXONGILO BAT

 BERTZERIK EZ DA,

ALDERDI BURGES ERREFORMISTA BAT,

EUSKAL GAZTE MIRESGARRIEN

 INDAR ETA KEMENA

BALIATZEN ETA ERABILTZEN,  

PNVrekiko LEHIA ELEKTORALEAN NAGUSITZEKO... 
 
 

GAZTEOK, ESNA ZAITEZTE

 BERANDUEGI IZAN BAINO LEHEN!!!

ZUEN BORROKA,

ZUEN KURAIA,

ZUEN AUSARDIA

EZ UTZI

POLITIKERO PROFESIONAL ERREFORMISTA BATZUEN ESKUETAN,

HAIEK GERO PNVrekin GOXO ETA DEMOKRATIKOKI  

"BATASUN NAZIONALA"

NEGOZIATZEKO

ZUEN MALKO, ODOL ETA IZERDIAREN GAINEAN!!! 
 

PNV KAPITALAREN MORROIA DA

ESPAINOLISMOAREN ZERBITZARIA,

INPERIALISMOAREN ZAKURRA,

 

EUSKAL HERRI LANGILEAren

E T S A I A

 Erreakzioak. 

Alkorta atxilotzeko

 "baliabideak xahutu" behar izatea

 egotzi dio Urkulluk 

EH Bilduri

J. Olano   2013-05-15 - 14:17:55

Iñigo Urkullu

 (Eusko Jaurlaritzako lehendakaria)

Ertzaintzaren polizia operazioa "eredugarria" izan dela nabarmendu du Iñigo Urkullu Eusko Jaurlaritzako lehendakariak, eta gizartean "beharrik gabe tentsioa sortzea" aurpegiratu dio EH Bilduri. Ezker abertzaleari "arduraz" jokatzeko eskatu dio, eta ohartarazi du polizia "integrala" dela Ertzaintza eta beraz agindu judizialak betearazi behar dituela.

Halaber, ohartarazi du Alkorta atxilotzeko operazioaren eraginez "baliabideak xahutu" dituztela, eta horren erantzule egin du EH Bildu.

Estefania Beltran de Heredia 

(Eusko Jaurlaritzako Segurtasun Saila)

Radio Euskadin mintzatu da Eusko Jaurlaritzako Segurtasun sailburu Estefania Beltran de Heredia Urtza Alkorta atxilotzeko polizia operazioaren inguruan. Polizia zoriondu eta eskerrak eman dizkio, eta gaineratu du "harro" dagoela "gure Ertzaintza bezalako Polizia baten" buru izateaz: "Ertzaintzak pertsona guztien segurtasuna bermatu du".

Alkortaren atxiloketa oztopatu nahi izan dutenen erresistentzia "kasu batzuetan aktiboa" izan dela eta "hedabideen grabazioek" hala erakusten dutela uste du Beltran de Herediak: "Pertsona askok, euren erresistentziarekin, Ertzaintzak agindu judizial bat betetzea galarazi nahi izan dute".

Gainera, Ezker Abertzaleko buruzagiei leporatu die "gizartea Ertzaintzaren aurka" jarri nahi izatea: "Ekintza hauen arduradunei dei egiten diet hausnarketa bat egin dezaten, pentsa dezaten zein punturaino saiatzen ari diren Ertzaintzari eta gizarteari egoztea ez dagokien ardura".

 

Argia Ituarte 

(Ondarroako alkatea)

Hunkituta hitz egin du Argia Ituarte Ondarroako alkateak Info7 irratian egin dioten elkarrizketan. Gaur bizitakoa "oso gogorra" izan dela esan du, eta erantsi du herrian ez dituztela ahaztuko ez gaurko eguna eta ezta Alkorta babesteko Alamedan igarotako egunak ere.

 

Laura Mintegi

(EH BILDU)

"Hausnarketa bat" egiteko eskatu dio Laura Mintegi EH Bilduko bozeramaileak Ertzaintzari, iritzita poliziek "ikuskizun tristea eta penagarria" eman dutela. "Euskal polizia den edo Espainiako Poliziaren adar bat den" erabaki beharko du Ertzaintzak, Mintegiren esanetan.

"Euskal Poliziak Espainiako agintariei eta boterei egiten die men eta hori ez da ulertzen", kritikatu du. "Herriak esan du nahikoa dela, atxiloketen zikloa amaitu dela eta horregatik Ertzaintzak hausnarketa egin behar du. Zeinen menpe dagoen ikusi behar du".

 

Asier Vega 

(Alternatiba)

Alternatibaren Bilboko bozeramaile Asier Vegak txalotu egin du Ondarroako Zumardian erakutsitako "Herri duintasun eredua, zeinetan ehunka lagunek delitu ezagun bakartzat militantzia politikoa duen gazte bat babesten eguneko 24 orduak eman dituzten".

Baina atxiloketaren gainetik ere, Alternatibak nabarmendu du Donostiako Boulevardean gertatu bezala, “Ondarroa erresistentzia bakezalearen, herritar duintasunaren eta elkartasunaren eredu bilakatu dela mundu osoaren aurrean”.

Vegak gogorarazi du Alkortaren aitortza torturapean lortu zutela, berak salatu zuenez, eta Nazioarteko Amnistia bezalako erakunde batek Espainian “tortura Estatuaren egiturazko arazoa” dela esan berri duela.

 

Jose Antonio Pastor

 (PSE)

Alkortaren atxiloketa ez dela Ertzaintzaren "nahikeria" izan nabarmendu du Jose Antonio Pastor PSEko legebiltzarkideak, eta azaldu du Ertzaintzak "agindu judizial bat betearazteko" jardun duela. ETBn eginiko elkarrizketa batean, Pastorrek esan du "eboluzio baikorra" antzeman duela Ezker Abertzalean, erresistentzia era baketsuan egitera deitu dutela-eta. Hala ere, Alkorta ez atxilotzeko eskaria kritikatu du.

Bestalde, EITBk Ondarroako Aske Guneari eginiko jarraipen informatiboa kritikatu du PSEk. "Nabarmena izan da atxilotuaren aurkezpena herritar bat gehiago izango balitz bezala, baztertuta bost urteko espetxe zigorrera kondenatu dutela ETAko talde bati laguntzeagatik", esan du.

Borja Semper

 (PP)

"Lotsagarritzat" jo du Borja Semper legebiltzarkideak Laura Mintegi EH Bilduk Eusko Legebiltzarrean duen taldearen bozeramailea Ondarroako Aske Gunean egotea, eta ertzainen "profesionaltasuna" goraipatu du: "Era lotsagarrian jardun dutenak Mintegi eta abar izan dira".

Gorka Maneiro

 (UPD)

Ondarroako "zirkuarekin" lehenago amaitu ez izana kritikatu dio Gorka Maneiro UPDko legebiltzarkideak Eusko Jaurlaritzari. "Hobe berandu, inoiz ez baino", esan du, baina erantsi du "denbora gehiegi" igarotzen utzi dela.

Gainera, "tamalgarria" iritzi dio EH Bilduko legebiltzarkide ugari Aske Gunean egoteari —han ziren Laura Mintegi, Unai Urruzuno eta Maribi Ugarteburu—, eta zalantzan jarri du Alkorta babestu dutenen jarrera baketsua izan dela: "Gaizkile baten atxiloketa saihesten saiatu dira"

 

Politika VS biolentziA?

POLITIKA VS BIOLENTZIA?

Itxaso Urtiaga

Taupadek bizi gaituzte. Taupada bakoitzaz zuri-beltza kolorezta daitekeela ikusia dugu; taupaka, ametsak errealitate bihur daitezkeela. Taupadaz taupada herri oso bat batu eta aske-gune ederrak eraiki daitezkeela frogatu dugu, lar-arte arantzatsuenetan ere, udaberri indartsuak lora daitezkeela. AskeGunea beste gauza askoren artean horixe izan baita, askatasun beharraz kateaturiko herri baten taupada, etsipen grisean ito nahi gaituztenei desafiatzeko harresia; taupadaz-taupada, eskuz-esku eraikiriko herri-harresi itzela. Lagun batek esaten zidan zinez zaila zela hainbeste emozio kontrajarri kudeatzea, hainbeste sentsazio, pentsamendu eta bizipen prozesatzea. Eta hala da. Baina AskeGunea mugarri bat izatea nahi badugu ezinbestekoa da haren gainean pentsatzea, hausnartzea, halako esperientzia batek eman dakizuken irakaspenik txikiena ere jasotzeko. Ondorengo zirriborroak, bada, ezin bestelako pretentsiorik izan: AskeGunearen itzalean, politika kontzeptuaren gaineko eztabaida zabaltzea da nire asmoa.

Agnès Cugno-k “Violence et Politique. Biolentzia eta politika” idazkian ezin hobeki azaltzen duen moduan, sistema demokratikoetan biolentzia eta politika zuzenean elkar kontra jarriak direnaren sinesmena izaten da nagusi. Nola eratzen da sinesmen hau?

Laburki esateko, Estatu modernoak egituratzean, elkarbizitza kolektiboaren baitan sor zitezkeen kontrajartzeak modu baketsu eta justuan kudeatu eta bideratzeko eginkizuna beregain hartu zuten, teorian. Horretarako, batetik, guztientzat berdinak izango ziren joko-arau propioak ezarri ziren lekuan leku (eskubideak, betebeharrak, legeak, arauak…) eta bestetik, joko-arau horiek guztiengandik errespetatuak izateko bermeak finkatu ziren. Eginkizunok bete ahal izateko, Estatuak indarkeria fisiko legitimoaren monopolioa bereganatu zuen, Max Weberren esaldi famatuak dioen moduan. Legitimoa zaio, ustez, biolentzia hau estatu-kide guztien ongizatea bermatzeko soilik erabiliko duelakoan. Honela ezkutatzen da, bada, Estatu baten biolentzia legitimitatearen itzalean, jardun politikoaren izenenean kamuflatuz.

Biolentziaren ezkutatze eta aurpegi-aldatze honetatik eratortzen da politikaVSbiolentzia-ren sinismena. Dikotomia honetan bi ideia nagusi biltzen dira:

Batetik politika biolentzia ez denaren ideia. Era berean, baiezpen honetatik ia zuzenean atera daitekeen suposizioa da biolentzia ez dela politika.

Eta bestetik, politikak biolentziari kontra egiteko betebeharra duenaren ideia. Eginkizun hau bete ahal izateko, Estatuak(politikak) biolentzia zer den eta zer ez definitu beharko du, eta beraz, politikoa zer den eta zer ez finkatzeko ahalmena dauka… eta hau, lagunok, sekulako boterea izatea da.

Honarte esandako apurretik nahiko erraz ikusi daiteke batetik, politikaVSbiolentzia dikotomia guztiz faltsua dela, erakutsi denez politika bera biolentzia baita (inork legitimoa kontsideratzeagatik ez baitio biolentzia izateari uzten eta gainera, legitimoa den horri sekulako kiratsa darion honetan, legitimotzat jotzekotan lehenik legitimitatearen inguruko eztabaida bat inposatzen dela esango nuke); eta bestetik, dikotomia horrek estatu bateko ordenua eta botere-banaketa babestu eta betikotzeko baliabideak ematen dizkiola, hain justu ere, botere politikoa duen horri. Izan ere, ‘biolentzia’ edota ‘politika’ zer den eta zer ez definitzeko ahalmena berak duen neurrian, ‘zer den legala eta zer ez’ edota ‘zer den zilegi eta zer ez’ erabakitzeko ahalmena baitauka. Esan gabe doa, ahalmen honek botere-postuetan betiko irauteko posibilitateak ematen dizkiola bati, edota baita gogoko ez duen edonori aukera hori ebazteko baliabideak ere. EHan badugu horren adibiderik: erreparatu besterik ez dago, esaterako, ‘partiduen lege’ santu horrekin errealitatea -demokratak (politikoak) VS biolentoen- artean sailkatuz ze proiektu politiko botere-gune ofizialetatik urrun mantentzea lortu duten.

Bada hasiera batean itxuraz definizio ariketa huts bat irudi zitekeena (zer den politikoa, zer biolentzia etabar zehaztea), egiaz, errealitatea ulertu, antolatu, aldatu edota mantentzeko modua dela ikus dezakegu, errealitatea eraikitzeko bidea, alegia. Horregatik, arreta berezia eskaini beharko genioke geure praktika politikoan alderdi diskurtsiboari, borroka dimentsio horretan zer hobetu asko dugulakoan bainago. Horren erakusle da, esaterako, urrutira joan gabe AskeGunearen atzeko auziaren harira behin baino gehiagotan entzun dudan esaldi batean sumatzen dudan akatsa. Zehazki,  “8 gazte lan politikoagatik espetxeratuak izango direla” dioen salaketaz ari naiz. Salaketaren formulazioaz, alegia.

Halako adierazpen irmoen bidez jendartean inpaktu gogor bat eragin asmo dela esango nuke, onartezintasunean sustraituriko erreakzio bat sortzea, hain zuzen. Komunikatiboki esaldi borobila izan daiteke. Argia. Sinplea. Laburra. Ulerterraza. Halaber, ez dakit jabetzen garen politika terminoaren erabilpen horrekin ‘politika’ kontzeptuaren zein kontsiderazio defendatzen edota sustatzen aurki gintezkeen nahi gabean.

Lan politikoa egin izanagatik espetxeratuak izatea onartezina dela esatean…

…esaten ari garena da inor politika egiteagatik espetxeratzea ez dela justua, politika egitea ez delako delitu edota ez lukeela izan beharko bederen. Hau da, politika egitea legala dela edota izan beharko lukeela diogu. Honekin, indirektoki esaten ari garena da politika egitea ez dela biolentzia praktikatzea, jakin baitakigu biolentzia praktikatzea delitua dela eta gainera oso kontziente baikara herri honetan biolentziaren elementua bereziki erabilia (izan) dela ilegalizazio, kriminalizazio eta errepresio estrategiaren argudio bezala. Horregatik geure herriko testuinguruan jardun politikoa burutzea ilegala ez dela aldarrikatzea, politika egitea biolentzia praktikatzea ez dela iradokitzea da, eta honekin, biolentzia ez dela politika onartzen ari gara, zeharka bada ere (horrek suposatzen duen guztiarekin..: benetan uste dugu ekintza biolento batek ezin duela ekintza politikoa izan?).

Azken buruan, lan politikoa egin izanagatik espetxeratuak izatearen salaketa, orain eta hemen, politika eta biolentzia elkar antagonikoak direnaren suposizioan sostengatzen delakoan nago. Ondorioz, esaldi argi, sinple, labur eta ulerterraz horrekin nahi gabean politikaVSbiolentzia dikotomia (faltsua eta arriskutsua) erreproduzitzen gabiltza, bai eta dikotomia horrek inplikatzen duen entramado guztia zeharka ametitu eta elikatzen ere, denboran iraunaraziz.

Egungo gizarte-eredua legitimatu, blindatu eta iraunarazteko balio duten dikotomia eta kontzeptuak elikatu eta erreproduzitzera ez jauzteko beharrezkoa da kontzeptu gakoak identifikatu, auzitan jarri, aztertu, eztabaidatu eta definizio ariketa kritiko eta propio bat egin eta sustatzea. Horretarako, gaurkoan galdera zuzenak: zeri deritzogu politika? Zer kontsideratzen dugu, zehazki, jardun politikoa? Nola apurtu PolitikaVSbiolentzia dikotomia? Zerbait salbatu beharko al genuke dikotomia horretatik?

BIBLIOGRAFIA:

- CUGNO, Agnès, Violence et Politique. Biolentzia eta politika.

Ez da ba Ezker Abertzale Berriarentzat koherentea dikotomia (faltsu) hori onartzea? Ez du zentzu honetan bere kontzientziazio lana egin azkeneko hiru urte (gutxienez) hauen buruan? ''La 'm' sobra y estorba'', ''soilik bide baketsu eta politikoetatik'' eramaten d(ut)en estrategia berri honetan. Hala esan zen hasieratik. Erabat ados Itxasoren ideiarekin, baina ez gaitu harritu behar. Berez, esaldi horren (benetazko) mezua aski neurtuta dago eta.