Itziar Moreno eta Oihana Garmendia
presoak gose greban dira
Muret Seysseseko espetxean
beraiekiko duten jarrera salatzeko
Argitaratua: 2013-05-29 17:51:19
Muret Seysses espetxean diren
Itziar Moreno eta Oihana Garmendia euskal preso politikoak gose greba
egiten ari dira astelehenetik. Gose greba honekin espetxea beraien aurka
izaten ari den jarrera salatu nahi dute. Jarrera honen adibide azken
hiru egunetan Itziar Morenok funtzionarioekin izan dituen bi liskarrak
dira. Astelehenean, Itziar Moreno bilbotarrak eztabaida bat izan zuen
funtzionario batekin, orduan funtzionarioak bultza eta lurrera bota
zuelarik. Eskuburdinekin eta oso modu txarrean mitardera (zigor ziegara)
eraman zuten Itziar. Gertaera honen ondoren, azken aldian espetxearen
aldetik jasaten ari diren jarrera salatzeko gose greban sartzea erabaki
zuten. Etxeratek "beste behin gure senide eta lagunen eskubideak
errespetatzen hasteko garaia dela" aldarrikatu du.
Astelehenetik gose greba abiatu zutenetik, tentsio egoera ez da aldatu. Gaur bertan, Itziar Morenok beste liskar bat izan du funtzionario batekin. Izan ere, gaur goizean medikutara eramateko bere bila joan direnean, funtzionarioei komuneko paperik ez zegoela eta ekartzeko eskatzean, funtzionarioek ezezkoa eman diote. Eta berriro ere mitardeko ziegara arrastaka eraman dute Itziar.
Itziar Morenok eta Oihana Garmendiak aspalditik bizi dute tentsio giroa espetxe honetan, eta funtzionarioek beraiekiko duten jarrera lotsagarria da. Honakoa, funtzionarioek euskal preso politikoekiko jarrera desegokia dutela salatzen dugun bigarren kasua da, aste honetan bertan. Gure senide eta lagunek egunero espetxe ezberdinetan bizi behar izaten dituzte mehatxu, irain edo erasoak, euren eskubideak guztiz urratuz.
Muret Seysses espetxean
euren eskubideen aldeko borrokarekin jarraitzen dute
2013-05-31
Muret
Seysses espetxean dauden Itziar Moreno eta Oihana Garmendia euskal
preso politikoek gose greba bat hasi zuten astelehenean, maiatzaren
27an, espetxeak beraien aurka izaten ari den jarrera salatzeko. Itziar
Moreno bilbotarrak eztabaida bat izan zuen funtzionarioarekin, eta
ordutik mitardean (zigor ziegan) dute; 25 eguneko zigorra ezarri
diotelarik.
Oihana Garmendiak, ordea, medikuaren
gomendioak jarraituz gaur gose greba amaitutzat eman behar izan du.
Hala ere, Oihanak gose greban egon ez arren, borrokarekin jarraitu eta
espetxeko janaria errefusatuko du hemendik aurrera.
Gauzak
honela, Itziar Morenok jada bosgarren eguna du gaurkoa gose greban, eta
egoera aldatzen ez den bitartean gose grebarekin jarraitzeko asmoa
erakutsi du.
Gainera, espetxe berean dagoen Ruben Rivero ere gaur bertan
gose greba burutzen hasi da, elkartasuna adierazteko.
Ondorioz, Muret Seysses espetxean dauden Itziar Moreno eta Ruben Rivero euskal preso politikoak gose greban daude.
Egoera hau
onartezina da. Hiru euskal preso politiko euren eskubideen aldeko
borrokan daude, eta jarraituko dute espetxeak eurekiko jarrera aldatzen
ez duen bitartean. Horregatik, batetik, beste behin gure haserrea
adierazi nahi dugu, giza eskubideak eskubide direlako, eta ez direlako,
eta ez daudelako jokoan. Eta bestetik, gure elkartasun osoa adierazi
nahi diegu Muret Seysses espetxean dauden gure senideei. Zuekin gaude!
Etxean eta bizirik nahi ditugulako....
2013-05-27
Kandido Sagarzazu presoak
Murcia II espetxeko funtzionario baten erasoa jasan du
Maiatzaren
21ean, Kandido Sagarzazu donostiarra Murcia II espetxeko kiroldegian
aurkitzen zen, funtzionario bat oso jarrera oldarkorrarekin gerturatu
zitzaionean. Kandidok funtzionarioaren jarrera ikusita egokiena kasurik
ez egitea zela erabaki zuen. Baina, orduan honek eraso egin zion, eta
kolpe bat eman zion besoan. Ondorioz, Kandidok besoa guztiz ubelduta
izan duelarik. Funtzionarioaren jarrera guztiz ulergaitza izan zen,
bat-batean oldartu baitzen.
Erasoaren ostean,
Kandido isolamendura eraman zuten, 48 ordurako. Eta espetxe berean
dagoen Mikel Izpura euskal preso politikoak elkartasuna adierazteko
plantoa egin zuen, bera ere isolamendura eraman zezaten.
Etxerat
elkartetik guztiz arbuiatzen dugu funtzionario honek Kandido Sagarzazu
presoarekiko erakutsitako jarrera oldarkor eta agresiboa. Guztiz
ulergaitza eta lekuz kanpokoa izan zen. Gure senide eta lagunek
eskubideak dituzte, eta eskubide hauek errespetatuak izan behar dute.
Eta jarrera hauek, erasoak eta mehatxuak onartezinak dira.
2013-05-31
Ion Kepa Parot-i
laugarren baldintzapeko
askatasunaren eskaera
ukatu egin diote
Ion Kepa Parot euskal preso politikoaren laugarren baldintzapeko askatasunaren eskaera ukatu zuten atzo. Epaitegiak onartu zuen, baina fiskalaren helegiteagatik zintzilik gelditu zen bere askatasuna. Beste behin ere, epaileek arrazoi politikoak aipatzen dituzte ukapena esplikatzeko (damuketarik ez dela izan beste ainitzen artean).
Oroitarazten dugu Ion Kepa Parotek baldintzapekoa lortzeko lege frantsesak ezartzen dituen irizpideak duela 8 urte betetzen dituela, eta joan den hilabetean bere 24garren kartzel urtean sartu zela. Gure haserrea eta bere eta senideekiko elkartasun osoa adierazi nahi ditugu, eta irizpide horiek betetzen dituzten preso guztien askatze berehala exijitzen dugu.
2013-06-05 ETXERAT
ErantzunEzabatuMuret Seysses espetxeko presoek borroka amaitu dute, Itziar Moreno espetxez mugitu ostean
Muret Seysses espetxeko euskal preso politikoak borrokan zeuden maiatzaren 27tik, espetxeak eurekiko duen jarrera eta Itziar Morenok funtzionarioengandik jasotako erasoak salatzeko. Itziar Moreno eta Ruben Rivero gose greban zeuden, eta Oihana Garmendiak eta Julen Mujikak espetxeko janariari uko egiten zioten.
Azken berrien arabera, Itziar Moreno Muret Seysses espetxetik mugitu eta Fresnesera eraman dute. Ondorioz, Itziarrek hamar egunen ostean, gose greba amaitutzat eman du, eta Oihana Garmendia, Julen Mujika eta Ruben Riverok ere utzi dute borrokaldia.
Egoerak buelta eman izanaz pozten gara, baina, berriro horrelako egoerarik ez errepikatzea espero dugu. Eta gure senide eta lagunen eskubideak errespetatuak izatea.