Burgesiaren pedagogia politikoa

BURGESIAREN PEDAGOGIA POLITIKOA

Imanol Murua Uria aski kazetari profesional zorrotza dugu, eta bere analisiak zein hausnarketak hurbildik segitu izan ditut beti, ikuspegi euskaldun independentea baitu, argia, askea, bere ikusmoldearekin konprometitua, jakina, eta bere pentsamolde zein klase-kokapenarekin koherentea, bistan da,  baina beti ere interesgarri eta gogoeta-iturri. 

       

  

Bere liburuak ere sakonak, dokumentatuak eta pentsamendu kritikoaren eragileak izan ohi dira: "Su etena Belfasten" (SUSA, 1996), "Palestina zauritua" (SUSA, 1998), "Geronimo" (Elkar, 1999), "Euskaltzaindia, ekin eta jarrai" (Euskaltzaindia, 2009), "Esan eta egin. Joxe Elorrietari elkarrizketa" (Mau Robles-Arangiz Institutua, 2009), "Loiolako hegiak" (Elkar, 2010).

BERRIA egunkarian aurtengo martxoaren 31an, igandean, artikulu mamitsu eta trinkoa argitaratu zuen, gaur egungo egoera politikoari buruzkoa. Hona hemen, hitzez hitz. Azpimarrak eta beltzezko letrak, prefosta, gureak dira.

ALDE BAKARRAREN NAHI ETA EZINA

"ETA lehergailuen lapurreta prestatzen ari da bere mehatxua autentifikatzeko". Horixe zioen La Razón egunkariak azalean joan den ostegunean, kazetaritza fantastikoak mugarik ez duen seinale. 

Bezperan, Osloko negoziaziogunea desegin izanak ondorio ezkorrak izango dituela adierazi zuen ETAk, "konponbidea atzeratzen eta zailtzen duen neurrian". Erakunde armatuaren iragana kontuan hartuta, ondorio ezkorrei buruzko hitzak mehatxutzat hartzea ulergarria litzateke, beste kontestu batean.

Gaur egungoan, ez. Ukaezina da Espainiako eta Frantziako gobernuek elkarrizketari uko egin izanak zaildu egiten duela gatazkaren ondorioei konponbidea ematea, eta agiriak nabarmena dena adierazi besterik ez du egiten, esan duen moduan esanda hitzak desitxuratu nahi dituenari aitzakia ere ematen dion arren.

Baina prozesua ez al zen ba alde bakarrekoa? Behin baino gehiagotan entzun izan dugu galdera bera, ETAk gobernuei pausoak eman ditzaten eskatu izan dienean, alde bakartasunarekin koherente izanez gero besteek zer egingo zain egon gabe desegin beharko lukeela argudiatzen dutenen ahotik. Baina erabaki nagusia (armak erabiltzen uztea) alde bakartasunetik erabakitzeak ez du esan nahi erabaki horren ondorio guztiei alde bakarretik erantzuteko modua dagoenik.

Desarmearena eztabaidagarria da, gobernuen aurrean ezin bada beste eragileren baten edo batzuen aurrean gauzatzea posible izan badaiteke, baina presoen, ihaslarien eta sasian daudenen egoerari buruz alde bakar batek erabaki dezakeena hutsaren hurrengoa da.

Presoek banaka kartzela onurak eskatuko balituzte arazoa konponduta legokeela dirudi tertulia batzuk entzunda. Kolektibo gisa jokatu nahi izate hori dela oztopo, hain zuzen, presoen auzian aurrerapausoak emateko.

Edo ETA ari dela presoen auzian ere aurrerabidea oztopatzen, desegiten ez delako. EAJri ere horixe ulertu zaio, konponbidea atzeratzearen eta zailtzearen "erantzule bakarra" ETA dela adierazi baitu agiriari emandako erantzunean.

Gobernuek uko egin diote EAJk Aieteko adierazpenean bat egin zuenean beharrezkotzat jo zuen elkarrizketari, uko egin diote EAJk ere salatzen duen espetxe politika aldatzeari, baina erantzukizuna erakunde armatuari baino ez dio leporatzen.

Espainiako Gobernuak, bitartean, Langraizko bidea hartu zutenei ere ikatzen dizkie espetxe onurak.

Espainiako Gobernuak auzi honetan izan duen bilakaerari erreparatuz gero, ETAren indarkeriaren eraginkortasunaren aitorpen inplizitua antzematen da.  

 ETA hildakorik gehien eragin zuen garaiaren osteko lehen negoziazio ahaleginean, Aljerren, presoen auzia mahaira eramaten ahalegindu zen Felipe Gonzalezen gobernuaren ordezkariak, Manuel Fragaren alderdiaren babesarekin. Hautetsien aurkako atentatuen lehen aroaren ostean, Suitzara ordezkaritza ofiziala bidali behintzat egin zuen Jose Maria Aznarrek; eta armen itzuleraren mehatxupean ahalegindu ziren Jose Luis Rodriguez Zapateroren ordezkariak, Genevan eta Oslon, elkarrizketak presoen auzira bideratzen.

Mehatxupean, Espainiako Gobernua beti prest egon da presoez hitz egiteko. Orain, ez du beharrik ikusten. 

Beste era batera esanda: ETAren indarkeriak edo haren mehatxuak elkarrizketa mahairaino mugiarazi izan du Gobernua, baina konponbide elkarrizketatua eta beste espetxe politika bat eskatzen dion euskal gizartearen gehiengoaren borondatea, ordea, ez da aski arrazoi norabide horretan mugitzen hasteko.

Pedagogia politikoaz hitz egingo dute gero."

Blog hau irakurri ohi dutenek aski ongi dakite zer pentsatzen dudan Oraingo Ezker Abertzalearen zuzendaritzak abiatu duen aldebakarttasunaren estrategia ahalkegarri eta likidazionista horretaz. Eta seguraski, irriño ironikoa loratu zaie ezpainetan Imanol Murua Uriaren idazlana irakurtzean, ikusita zein dotore eta airoski biluzten duen Burgesia Frantses eta Espainolaren diskurtso ideologiko hipokrita eta zinikoa, "biolentzia terrorista"-ri buruzkoa. Euskal Herri Langilearen beso armatuko gudari iraultzaileek egurra tira ahala banatzen zutelarik, bi Gobernu inperialistak prest zeuden edozertaz hitz egiteko, presoen auziaz bereziki eta nagusiki, eta Ezker Abertzalea instituzio burgesetara noiz etorriko zai zeuden, irrikitan... Jakina, zozoenak ere konprenitzen du (Oraingo Ezker Abertzaleko zuzendaritzako kidea ez bada, bederen...) zer pasatu den: ETA aldebakartsunez errenditu da, amore eman du, belauniko jarri da. Orduan, zertarako hitz egin? Arazoa konponduta dago! Bakea dugu, eta biba gu! Asteburu honetan, "Gesto por la Paz" izeneko ONG parapoliziala desegin da, bere lana amaitu delakotz. Prefosta, Burgesiarendako, zapalduen erresistentzia armatua bukatzea bakea baita! Guztiz koherentea da!

PNV-EAJ ere, alderdi burges baskoa den heinean, (eta horixe bertzerik ez baita praxian, nahiz eta zabaltzen duen ideologia nazionalista basko-euskaldunak Euskal Herri Langilearen sektorerik alienatuak liluraturik dauzkan...) logika eta arrazoitasun berberak aplikatzen du, Imanol Murua Uriak maisuki erakusten duenez: Aieten sinatu duena zakarrontzirat bota dute. Normala! Zer uste zenuten, bada? Aieteko konferentzia horretarako erabili zuten Burgesia espainolak, frantsesak eta baskoak, ETAk borroka armatua unilateralki uzteko, eta Euskal Herri Langilearen borroka guztiak belauniko (hau da, legalitate burgesaren muga estu-zurrunen baitan) jartzeko.

Hau guztia, Teoria Iraultzailearen ABCa da, garai batean edonork zekiena, Langileriak mende mende larrutik ikasi izan duena, malkoz, izerdiz eta odolez.

Bainan orain, aldebakartasunaren lurralde miresgarrian bizi omen garenez, egia iraultzaile hauek guztiak "iraganeko kontuak" ei dira, badakizue, "XIX. mendeko ideologia gaindituen aztarnak" edota "marxismo-leninismo totalitarioaren idei zaharkituak". Eta zinez gogor salatu nahi dutelarik iraultzaileon tinkotasuna, orduan artilleria astuna ateratzen dute, eta "stalinismoa" ere aipatzen dute. Ai ama, zer beldurra!

Hala ere, errealitatea biziki egoskorra da, klaseen arteko errealitate temati eta burugorra oso ezkutagaitza da, eta ideologia alienatzaile guztien gainetik agertzen da beti, hotz eta zorrotz, latz eta garratz...

Hona hemen azken egunetako adibide xumeak, nork bere analisia egin dezan:
 

 

Eider Zuriarrain deustuarra
 atxilotu du Ertzaintzak
 Sondikan
 

Eider Zuriarrain deustuarra atxilotu egin du Ertzaintzak, Sondikan, lanetik irtetean. Auzitegi Nazional espainolak zazpi urte eta erdiko espetxe zigorra ezarri zion iragan apirilaren 16an.
 

NAIZ.INFO|BILBO|2013/05/03

Bilboko Brankak jakinarazi duenez, ostiral arratsalde honetan atzeman du Ertzaintzak Zuriarrain deustuarra, Sondikako ikastolatik ateratzen ari zela.

Otsailean beste hainbat pertsonarekin batera epaitua izan ondoren, apirilaren 16an zazpi urte eta erdiko espetxe zigorra ezarri zion Entzutegi Nazional espainolak Zuriarraini, ETAri laguntzea emateagatik.

2011ko otsailean atxilotu zuten aurrenekoz Deustuko bizilaguna, Urruñan (Lapurdi), haren aurkako euroagindua onartu ondoren.

Hilabete bat beranduago Estatu espainolera entregatu eta espetxeratu egin zuten. 2011ko urrian aske utzi zuten, 10.000 euroko bermea ordainduta.

Iragan otsailean egindako epaiketaren ebazpena apirilean eman zuen ezagutzera Entzutegi Nazionalak, eta zazpi urte eta erdiko espetxe zigorra ezarri zion.

Atxiloketa salatzeko, manifestazioa egingo dute 20.00etan, Larrabetzun, bertan bizi baita egun Zuriarrain. Astelehenean Deustuan izango da mobilizazioa, 19.30ean.

Xabier Atristain eta Juan Mari Mariezkurrena atxilotu ditu poliziak

  

Xabier Atristain eta Juan Mari Mariezkurrena apirilaren 17an Espainiako Auzitegi Nazionalak beste hainbat euskal herritarrekin batera. Atristaini 17 urteko espetxe zigorra ezarri zioten eta 7 urte eta erdikoa Mariezkurrenari.
 

NAIZ.INFO|DONOSTIA|2013/05/04

EiTBren arabera Ertzain etxean aurkeztu du bere burua gaur arratsaldean Xabier Atristain donostiarrak. Apirilaren 17an zigortu zuen Espainiako Auzitegi Nazionalak 17 urteko espetxe zigorrera ETAko kide izatea egotzita. Auzi berean zazpi urte eta erdiko espetxe zigorra ezarri zioten gaur Hernanin Ertzaintzak atxilotu duen Juan Mari Mariezkurrenari, ETAri laguntzea egotzita. Mariezkurrenaren kasuan hainbat herritar bere etxean izan dira atzotik babesa agertzen; eguerdian, jende gutxien zegoen momentuan, Ertzaintza agertu da eta aginduak bete besterik ez zutela egiten esanda eraman dute, Hernanitik NAIZi adierazi diotenaren arabera.

Auzi beragatik atzo atxilotu zuten Eider Zuriarrain Sondikan, zazpi urte eta erdiko espetxe zigorra betetzeko ETAri laguntzea egotzita. Auzi berean 20 urteko espetxe zigorra ezarri zioten Ibai Beobide Bilboko San Inazio auzoko herritarrari (espetxean dago) eta zazpi urte eta erdikoa Euri Albizu segurarrari eta Jose Agustin Camachori.

19.30ean Konstituzio plazatik

Atxiloketaren berri izan orduko mobilizazioak iragarri dituzte. Donostian, adibidez, Konstituzio plazatik 19.30ean abiatuko da atxiloketa salatzeko manifestazioa.

 

Mobilizazioetan

 poliziaren  erasoa

jasan duten herritarren salaketa kopurua

 igo egin da

CPDT Torturaren Salaketa eta Prebentziorako koordinakundeak 2012 urteko laburpena egin du. Koordinakundeak adierazi du inkomunikazio aldian tortura eta tratu txarrak salatu dituzten herritar kopurua jaitsi egin dela.

Berria.info   2013-05-03 - 18:28:30

CPDT Torturaren Salaketa eta Prebentziorako koordinakundeak urtero egiten duen txostenean azaldu du mobilizazioetan poliziaren erasoa jasan duten herritarren salaketa kopurua igo egin dela 2012an. Jasotako salaketen %69 halako salaketak direla jakinarazi dute. Horrez gain, koordinakundeak adierazi du inkomunikazio aldian tortura eta tratu txarrak salatu dituzten herritar kopurua jaitsi egin dela, baina nabarmendu du atxiloketa mota hori desagertzearen alde lanean jarraituko duela.

"Aurreko urteetan ikusi da mobilizazioetan parte hartzean jasandako tratu txarrak ez zituztela salatzen. Askotan, salatuz gero, polizien aldetik haien aurkako salaketak eragiteko beldur zirelako", dago idatzita txostenean. Horregatik, tratu txar eta tortura salaketa guztiak ez dituela biltzen adierazi du.

Guztira Espainiako Estatuan 851 herritarrek salatu zituzten torturak edo tratu txarrak. Horietako 68 euskal herritarrak ziren. Horrez gain, hiru euskal herritarrek salatu zuten atxilotu eta Madrilera bidean tratu txarrak jasan zituztela. Datuak hartuta, 100.000 biztanletik 2,49k torturak salatu ditu 2012an.

851 herritar horien artean, 514k salatu dute Polizia Nazionalak egin ziela erasoa, 61ek Guardia Zibilak egin ziela eta 39k bertako poliziek. 35 herritarrek salatu dute Ertzaintzak egin ziela eraso. Nabarmendu dute 851 herritar horien salaketetan 53 kazetari daudela. 103 etorkinei egindako eraso salaketak dira, eta 82 presoei egindakoak.

Espainiako Auzitegi Nazi-analak

 Larrabetzuko Bizkargi Eguna

 debekatu egin du

Bizkargi mendian hildako gudariak omentzen dituzte egun horretan. 2011n ere debekatu zuen Eloy Velasco epaileak.

Berria.info   2013-05-03 - 17:24:00

Bihar eta etzi ospatu behar zuten Bizkargi Eguna, baina debekatu egin du Espainiako Auzitegi Nazionalak. Bizkargi mendian egitekoak zituzten ekitaldiak eta Larrabetzun (Bizkaia) egin behar zituztenak debekatu ditu. Horrez gain, Ertzaintzari eskatu dio ospatu ez dezaten beharrezko neurriak hartzeko.

Ez da hildako gudarien omenez urtero egin duten omenaldia debekatzen duten lehen aldia, 2011n ere debekatu baitzuen Auzitegi Nazionalak. "Terrorismoa goratuko" zela argudiatuta.

Bizkargin 1937an eusko gudariek tropa frankistei aurre egin zieten, eta frankismo garaian "askatasuna aldarrikatzeko" ikur bilkatu zen. "Gaur egun oroimena, justizia eta egia aldarrikatzeko topagune" bilakatu dela adierazi dute Bizkargi Egunaren antolatzaileek.

2013-05-04

Auzitegi Nazi-analak

 Bizkargi Eguneko ekitaldi guztiak

 debekatu egin ditu

Eusko gudarien omenez Bizkaiko mendi horretan egiten den festa eragozteko eskatu dio Ertzaintzari

Gaur eta bihar Larrabetzun (Bizkaia) eta Bizkargin egitekoak ziren Bizkargi Eguneko ekitaldi guztiak debekatu eta bertan behera uzteko agindu du Espainiako Auzitegi Nazionalak. Halaxe jakinarazi dio Segurtasun Sailari bidalitako autoan, eta ekitaldi horiek guztiak debeka ditzan «beharrezkoak diren neurri guztiak» hartzeko eskatu dio Ertzaintzari.

Gaur eta bihar dira egitekoak Bizkargi Eguneko ekitaldiak. Nagusia, biharkoa zen. Eguerdi partera arte hainbat ekitaldi zeuden antolatuta Bizkargi mendian, eta festak jarraipena izan behar zuen ondoren Larrabetzun. «Eusko gudarien oroimena eta memoria historikoaren, egiaren eta justiziaren aldarrikapena» ditu helburutzat Bizkargi egunak, eta asmo horrekin antolatu izan da urtero mendi horretan —1937an eusko gudariek tropa frankistei aurre egin zietelako da tontor hori ezaguna—. Antolatzaileek ez dute jakinarazi Bizkargi Eguna bertan behera utzi duten edo ez.

Juan Mari Maizkurrena eta Xabier Atristain

 atxilotu dituzte

ETAko kide izatea egotzita zigortu zuten Atristain, eta "ETAri laguntzea" leporatu zioten Maizkurrenari. Atzo atzeman zuten Eider Zuriarrain, auzi bera dela eta.

Berria.info   2013-05-04 - 17:55:42

Juan Mari Mariezkurrena eta Xabier Atristain atxilotu ditu Ertzaintzak gaur arratsaldean, Eusko Jaurlaritzako Segurtasun Sailak baieztatu duenez. 14:15 eta 15:00 artean izan dira atxiloketak.

Mariezkurrena Hernanin atzeman dute, eta Atristainek bere burua aurkeztu du polizia-etxean. Otsailean epaitu zituzten Mariezkurrena eta Atristain Espainiako Auzitegi Nazionalean, Ibai Beobide, Euri Albizu, Eider Zuriarrain, Miren Josune Balda, Jose Agustin Camacho, Adur Aristegi eta Jon Rosalesekin batera.

Ertzaintzak atzo atxilotu zuen Zuriarrain, Sondikan (Bizkaia).

Atristain eta Maizkurrena

 atxilotu ditu Ertzaintzak

Auzitegi Nazionalak ezarritako hamazazpi eta zazpi urteko zigorrak betetzeko espetxeratuko dituzte

Presoen sakabanaketa amaitzea eskatu zuten Iruñean, atzo. / I. ZABALETA / ARP

Xabier Atristain eta Juan Mari Maizkurrena atxilotu zituen Ertzaintzak atzo, Espainiako Auzitegi Nazionalak ezarritako zigorra betetzeko. Eusko Jaurlaritzako Segurtasun Sailak jakinarazi duenez, Ertzaintzaren Donostiako polizia etxean aurkeztu zuen bere burua Atristainek, atzo, 14:15ean. Maizkurrena, berriz, Hernanin atxilotu zuten, 14:30 aldera, bere etxean. Lekukoek Naiz.info-ri azaldu diotenez, herenegun hainbat lagun gerturatu ziren Maizkurrenaren etxera, hari babesa agertzera, eta atzo eguerdian azaldu ziren ertzainak, «jende gutxien zegoen momentuan». «Aginduak betetzen» ari zirela azaldu zuten poliziek, lekuko horien arabera.

Espainiako Auzitegi Nazionalak otsailean epaitu zituen Atristain eta Maizkurrena, Ibai Beobide, Euri Albizu, Eider Zuriarrain, Miren Josune Balda, Jose Agustin Camacho, Adur Aristegi eta Jon Rosalesekin batera. Apirilaren 16an kaleratutako epaian, 17 urteko espetxe zigorra ezarri zioten Atristaini, ETAko kide izatea egotzita. Maizkurrenari, berriz, zazpi urtekoa, ETAri laguntzea egotzita. Auzi berean 20 urteko espetxe zigorra ezarri zioten Ibai Beobideri eta zazpi urte eta erdikoa Jose Agustin Camachori, Euri Albizuri eta Eider Zurriaraini. Zurriarain herenegun atxilotu zuen Ertzaintzak, Sondikan, lanetik irten ondoren.

Herrira mugimenduak, berriz, maiatzaren 18an Euskal Herriko plazak euskal presoen eskubideen alde betetzera deitu zuen atzo Iruñean egindako agerraldi batean. 600 aulki huts jarri zituzten udaletxeko plazan, «sakabanatuta jarraitzen duten presoak gogoratzeko». Nabarmendu zuten presoak «giza eskubideak urratzen dituen espetxe politikaren biktimak» direla, eta horrek «bakerako eta irtenbiderako bidea zailtzen» duela.

2013-05-05

Bakearen Aldeko Koordinakundea. 

Azken batzarra

BAKek desegitea erabaki du

ETAk jardun armatua amaituta helburu nagusia lortu duela dio koordinakundeak; taldearen batzar nagusiak hartu du erabakia
Ekainaren 1ean Bilbon azken agurra emateko ekitaldia egingo duela iragarri du

Aitziber Laskibar Lizarribar Bilbo

Bakearen Aldeko Koordinakundeko kideak, atzo Bilbon eginiko ezohiko batzarraren amaieran. / JON HERNAEZ / ARGAZKI PRESS

• Xingola urdinen isiltasuna

Hogeita zortzi urteko ibilbidearen ondoren, bidea amaitutzat eman du Bakearen Aldeko Koordinakundeak (BAK). 1986an sortu zenean bere buruari jarri zizkion helburu nagusiak bete direla dio: ETAk jardun armatua amaitu duela eta gizarteak barneratu duela «indarkeria deslegitimatzeko» beharra. Xede nagusiak beteta, ateak itxiko ditu koordinakundeak.

ETAk jardun armatua behin betiko bukatu zuela iragarri zuenetik ari zen desegiteko aukera aztertzen Bakearen Aldeko Koordinakundea. Eta batasun handiarekin hartu du erabakia. 25. batzar nagusia egin zuen atzo, Bilbon, gaiari buruzko erabakia hartzeko. Euskal Herriko talde guztietako ordezkarien %97k babestu dute proposamena, eta aurkako botorik ez du jaso. Baiezkoa eman ez dutenek, bost lagunek, boto zuria eman dute.

Pozik hartu dute erabakia koordinakundeko kideek. Atzo eguerdian, batzarra egin eta botoak zenbatu ondoren, Edorta Martinezek eta Itziar Aspuruk eman zuten bidea bukatzeko erabakiaren nondik norakoen berri. Txalo zaparrada jaso zuten aurrean entzule zituzten taldekideengandik. Zutitu, eta luzaro aritu ziren txalo jotzen, horietako zenbait, hunkituta. Berdin erantzun zieten oholtza gainean zeuden arduradunek. Luze aritu ziren guztiak elkarri txaloka, urte hauetan elkarlanean egin dituztenen aitorpen gisa.

Martinezek eta Aspuruk irakurri zuten erabakiaren berri ematen duen agiria, Euskaraz eta Gazteleraz. Koordinakundea desegitera eraman dituen sentsazioa atzean zuten ordezkariek, pankartan idatzirik: Lortu dugu. Hizlarien beren esanetan, horixe sentitu zuten ETAk amaiera iragarri zuenean. «Azkenik, indarkeriarik gabeko etorkizun itxaropentsua ikusi ahal genuen aurrez aurre».

Erakunde armatuaren erabakia aldebakarrekoa izateak, gainera, baikortasuna areagotu egin zien, ETAren amaierak ez duela «ordainsari politikorik ekarriko» ulertu baitzuten. Eta, BAKen ustez, «ezin da bestela izan».

«Beti adierazi dugu gure gogoa eta helburua desagertzea zela», azaldu zuten Martinezek eta Aspuruk. «Gure xedea indarkeriaren amaiera zen, baita gizartearen mobilizazio bateratuaren bidezko kontzientziazioa piztu eta indartzea ere». Eta lana betetzat jo dute: «Zorionez, gaur egun, BAKen itxiera ekarri ahal dugu zuengana, akabuko helburua lortu dugulako, indarkeriaren azkena». Gainera, gizarteak ETAri «bere arbuio eta mespretxua argi asko» erakutsi diola uste dute. «Pozteko moduan gara», esan dute horregatik.

ETA eta ezker abertzalea

Hala ere, oraindik «zeregin garrantzitsu askotxo» egiteko daudela ohartarazi du koordinakundeak. Taldeak bere lana amaitutzat eman arren, asko dagoela oraindik lortzeko. ETAk desagertu egin behar duela adierazi du; behin betiko eta baldintzarik gabe desagertu behar duela. Eta, BAKen irudiko, ezker abertzaleak du «zeregin horretan eragin eta ardurarik handiena».

Proiektu politikoak eta indarkeria bananduta mantentzea ere jarri du aurrera begira egin beharrekoen artean. Baita bizi izan dutenaren «oroimen zehatza piztea» ere. Jaso beharreko memoria horretan, «giza eskubideei egin zaizkien urraketak onartu, biktimen duintasuna errespetatu eta izandako indarkeria deslegitimatuko duen kontakizuna egin» behar dela abisu eman du.

Biktima guztiak aintzat hartzeko premia ere azaldu du: «ETAk, GALek, beste talde terrorista batzuek eta polizia indarren legez kanpoko bortizkeriak eragindako biktima guztiak». Hori esan, eta ezker abertzalearen aurka egin du: «Ezker Abertzaleak ezin du aipamen orokor hori babes gisa hartu ETAk sortu dituen biktimei aitorpen zehatza ez egiteko». Areago, Ezker Abertzaleak «urte luze hauetako indarkeriaren iraupenean izan duen ardura osoa hartu behar du bere gain», esan dute Martinezek eta Aspuruk.

Espetxe politika ere hartu dute hizpide, indarrean dagoen legeria errespetatu behar dela eta «presoenganako trataera humanizatu» beharko litzatekeela esateko. Gizarteratzea erraztu beharraz aritu dira, banakako prozesuak izan behar dutela zehaztuta. Eta horretarako oinarriak «preso bakoitzak eragindako oinazearen aitorpen kritikoa» egiteak izan behar du, BAKen ustez.

Bestalde, koordinakundeak esker eta aitorpen hitzak helarazi dizkie «herrietan, auzoetan zein lantokietan beldurra eta axolagabekeria baztertu eta gizartearekin konpromiso baketsua hautatu zuten pertsonei» zein «izugarrikeriak zuzenean mehatxatu» dituztenei. «Miresmen eta hitzik beroenak», halere, biktimei egin dizkie: «Urte askoan ikusezin izan ziren gure begietan. Eurek gidatzen dute indarkeriaren deslegitimazioaren motorra».

Agurra eta kitatzea

Orain, taldea erabat desegiteko erabakia hartuta, itxiera gauzatzeko egin beharreko lan teknikoak egiteko Batzorde Kitatzailea osatu du Bakearen Aldeko Koordinakundeak. Webguneaz, taldearen erregistroen itxieraz, taldearentzat soldatapean lanean aritu den pertsonaren egoeraz eta beste jardungo du batzordeak, eta egin beharreko urrats «tekniko» guztiak egingo ditu. Koordinakundeak pilatutako ondarea ere kudeatuko du.

Eta beste zerbait ere egingo du BAKek amaiera irudikatzeko. Gizarteari agurra emateko ekitaldia prestatzen ari da. Ekainaren 1ean egingo du ekitaldia, larunbatarekin, Bilbon. Fabian Laespadak jakinarazi duenez, herritarrentzat irekia izango den ekitaldi bat egin nahi du BAKek, eta kalean egitea pentsatua du, horregatik. Oraindik erabat baieztatu gabe dagoen arren, Plaza Biribilean egitea da asmoa.

SORTU

Eider Zuriarrain eta Bizkargi: 

Estatuaren pauso inboluzionistak

Created on Friday, 03 May 2013 20:08
 

Eider Zuriarrainen atxiloketa salatu nahi du Bizkaiko  Sortuk. Beste bederatzi lagunekin batera, joan den otsailean epaitu zuten Eider Zuriarrain Espainiako Auzitegi Nazionalean eta, joan den apirilaren 16an, zazpi urteko eta sei hilabeteko espetxe zigorra ezarri zioten Zuriarraini. Ezarritako zigorraren kontra helegitea jarrita bazuen ere, gaur Ertzaintzak Sondikan atxilotu du.

Bestetik, bihar eta etzi ospatzekoa zen Bizkargi Eguna debekatu egin du Espainiako Auzitegi Nazionalak, bai Bizkargi mendian egitekoak ziren ekitaldiak, zein Larrabetzun ospatu behar zirenak. Horrez gain, Auzitegi Nazionalak Ertzaintzari eskatu dio ospatu ez dezaten beharrezko neurriak hartzeko.

Errepresioan, debekuan, eta blokeoan tematzen den Estatu espainiarraren aurrean, marko demokratikoaren mesedetan arituko den gizarte mailako metaketa zabala behar du Herri honek. Aro politiko berri batean murgildurik gaude, eta jokoan dagoena Herri honen gehiengoaren borondatea bururaino eramatea da, hots, Herri izan eta Herri gisa erabakitzea. Eider Zuriarrainen atxiloketa, zein Bizkargi Egunaren debekua Estatu espainiarraren blokeoaren estrategiaren baitan kokatzen ditugu, aro politikoari bide eman beharrean, tematu egiten da behin eta berriro Estatu espainiarra beste garai bateko eredu berdinean.

Estatua azken aldian bere jarrera eta diskurtso inboluzionistan tematzen ari da, Ezker Abertzaleari “markajea” egin nahiean. Garai berri batean gaude, eta eragile politiko eta sozial gehienak ados gaude horretan. Jendarte sektore gehienek gatazka behin betiko konpontzeko prozesuarekin bat egiten dute.

Erasoak jarraituko dira gertatzen, baina argi gelditu behar zaie bide demokratiko eta baketsuak erabiltzeko esker abertzalearen apostua atzeraezina dela.