BENETAKO
GREBA OROKOR BATEN ALDE
Hego Euskal Herria greba orokor berri batera deitua izan da,
erreforma dinamiken aurka eta eskubide sozial eta laboralen alde
aldarrikatzeko nahian. Datorren greba orokor hau, maiatzaren 30ean
izango dena, azken urteetan egin den zazpigarrena izango da eta Euskal Herriak eredu propioa. Eskubide sozial eta laboral duinak
leloarekin abiatuko da.
Greba orokorraren eskaerak honako hauek izango
dira, besteak beste: lege batzuen indargabetzea, murrizketa berrien
errefusa, etxe kaleratzeak gelditzea eta eskakizun guztien gainetik;
Euskal Herriarentzako eredu propio bat.
Eskaera guzti hauek zentzuzkoak eta behar-beharrezkoak dira Euskal
Herriko herri-mailek pairatzen ari diren egoera negargarriari lasaitasun
apur bat emateko. Tristea eta nabaria dena, zera da, lehenago egin
diren sei greba orokorrek ez dutela inondik inora Euskal Herri Langilearen egoera tamalgarria aldatu; gainera guztiz kontrakoa gertatu
da, Euskal Herri Langilearen egoera txarrera jo du, krisi kapitalistaren
etengabeko larriagotzea dela eta.
Horregatik, atez joka dugun greba
orokor honek ez du markatuta dituen helburu bat bera ere lortuko,
aurreko greba orokorren akats berberak errepikatzen baititu.
Nabaria da greba-estrategia eredu hau ez dela langile klasearen bihotzera heltzen, gero
eta gehiago dira greba faltsu hauetan itxaropena galtzen duten
langileak eta guzti honek izugarrizko inpotentzia sortzen du langile
klasean.
Itxaropena eta erantzunkizuna transmitituz eta jarraitu
beharreko bidea markatuz, hau da, borroka iraultzailearen eskola sortuz
soilik lortzen da langile klasearen begirunea lortzea.
Behar beharrezkoa da azpimarratzea greba orokor bat ezin dela
aurretik programatua egon. Greba baten orokortasunak bertan parte
hartzen duten sektore kopuru guztiek ematen dute, euren egoera zehatza
kontutan izanda edo era pedagogikoz azaldu beharreko orokortasun bat.
Hau da, eskubide sozial eta laboraletaz era abstraktuan hitz egiteak,
zertaz ari garen zehaztu gabe, ez du ez hanka ez bururik.
Kimetz erakundetik behin eta berriz azpimarratu dugu prozesu luze
batek pixkanaka pixkanaka joan behar duela indarrak metatzen eta borroka
indartzen.
Bestalde, garrantzitsua da legalitate burgesak protestarako
ezartzen dituen limiteei muzin egitea, limite hauek baitira, neurri
handi batean langile eta herritarren erantzuna eta borroka goitik behera
mugatzen dutenak.
Hau dena kontuan izanda greba egunerako edo
egunetarako animoak piztuta eta indarberrituta egotea da helburua. Modu
honetan jendearen kontzientzia piztu egingo da, beste borroka luze baten
partaide izan eta sentituko baitira.
Soilik langileek dituzten baliabide guztiak xahutu ondoren, bultzatu behar da greba orokorra,
tresna hau planifikazioz eta inteligentziaz erabili behar baita. Guztiz
beharrezkoa da borroka partzial guztiak aldarrikapen ulergarri eta
burutzeko gaitasuna duen borroka prozesu baten barruan bateratzea.
Sektoreka, eskualdeka eta herrialdeka gelditze partzialak eta
mobilizazioak eginez giroa berotu behar da mezu argi bat bidaliz:
borroka da bide bakarra.
Gainera, greba honen bitartez iniziatiba legegintza popularra
(ILP) bultzatzeko asmoa dago, herritarren eskubide sozialak idazki baten
bitartez parlamentuan aurkezteko, alegia. Hauxe bera, M15 mugimenduak
egin zuen ordainketa dazioa zela eta; adibide honek erakutsi zuen ILPak
alferrik direla eta are gehiago greba orokor baten bitartez bultzatzen
saiatzea.
Konponbidea ez dago parlamentu burgesean, ezta sistema
kapitalistaren erreforman ere, sistema kapitalista bera baita euskal
herri langilearen arazoen sortzailea. Konponbidea iraultzaren bitartez
dator, kapitalismoaren suntsiketan alde batetik eta gizarte
sozialistaren eraikuntzan bestetik. Gizarte berri honetan langile klasea
izango da estauaren, produkzio-baliabideen eta aberastasunaren jabe.
Horrela, langile klaseak berak izango du bere beharren eta premien
arabera produkzioa planifikatzeko aukera, krisi ekonomikoak betirako
saihestuz eta baztertuz. Gainera, kontuan eduki behar da, aldarrikapen
erreformista apalenak ere soilik borroka iraultzaile adoretsu baten
bitartez lor daitezkeela.
Langile klasearen antolakuntzaren premia behar beharrezkoa da langile
mugimendua eta mugimendu popularra borroka jarreretara hurreratzeko.
Bere zeregina behar den moduan egiteko, langile klasearen antolakuntza
estruktura propioetan eta independienteetan oinarritu behar da.
Antolakuntza,
klase-kontzientzia eraiki eta borroka txikiak iraultzara bideratu,
hauek dira Euskal Herriak sozialismoa eta independentzia lortzeko eman
behar dituen pausoak.
Benetako greba orokor baten alde: borroka eta klase kontzientzia garatu.
iruzkinik ez:
Argitaratu iruzkina